Read Ninia Yali IMAMAT 11 Bible Online

IMAMAT 11 - Ninia Yali bible

IMAMAT 11

¹TUHAN en wene melaleg su it Musa inim Harun inim fam enobam febag. Foruk kwit de,

²“It ap homi inunggul unuk Israel on halug, di angge su angge kwenang ambuema oluk wereg on en eneyog sehelet dokwareg on mel enengge nalug en nikangge luhuk folug nauk on mel halug de buhun on deg ma nauk kamuhup fano.

⁴Wam unta inim bak unuk pelanduk mel, bak kelinci ebe mel aire it enomalik endag-enepuk, eneyog sehelet mel dokwareg famen de saliog angge on deg ma na fug.

⁷Wam de na fug. Wam de eyog sehelet dokwareg famen de at asiburu nalug nikangge luko nauk fug mu wam aire saliog angge on.

⁸Wam aire saliog angge on deg ma ino mel nahup fug ne ebe wareg angge fam inim bal hahup fug.

⁹Hit de di ikan su ikan amurul wilibig on mel abunggu wereg on mel en dihinig-yihinig on etma nauk kamuhup fano.

¹⁰Di oluk-oluk angge su oluk-oluk angge ik fam wereg on famen amurul mel abunggu mel wilibig eleg on de mun saliog angge on anggere nauk kamuhup fug. Ne, wareg filik fam oho bal-hauk kamuhup fug.

¹³Di suwe su suwe etma enesahalimu en emereg ma nauk kamuhup fug on de su: Suwe ikwesahop hag on inim, simu-simu hag on inim, suwe findi en unuk amu-amu on inim, suwe nasar inim, suwe gagak mel, suwe siyomayo hag mel, suwe walu hag on amu-amu on mel, suwe kasa mel, kwindik mel etma mun nauk kamuhup fug.

²⁰Oluk-oluk angge en ahwerabul wilibig on etma mun ousa on.

²¹Famen de aroho hweik-duruk on neg de fano.

²²Aireg ma bulue mel, senal mel, bulue ahap unon mel neg de nauk kamuhup fano.

²³Famen de oluk-oluk angge en ahwerabul wilibig on mel kwenang kwe lobo duruk on mel neg de saliog angge on.

²⁴Ap misig eke di oluk-oluk angge su oluk-oluk angge su on en wareg filik misig eke bal-haukmu ebe emereg weregman mo obuk uruk karuhu on de su: Di angge su angge enggiahap wilibig on mel, it eneyog sehelet dokwareg on famen enengge nauk angge nikangge luko nauk on neg de fug, di angge su angge en eyog ohwam wilibig men eyog ahap yaron mel halug. Ne, ap eke en lahe di angge su angge ai on en wareg filik eke walug lahureg halug de aren asum ho dauk karuhu famen de at ebe neg de emereg weregman mo obuk uruk karuhu.

²⁹Bak kwenang fam on mel, bak lohon mel, bak doron mel, esele mel, yahaye amu-amu on mel, dabi hag landak mel, marea mel, malong mel, sioplo mel, sohop anggen mel mundoho aire mun ousa on.

³¹Ap eke en di angge su angge ai bal-hauk halug oho ne wareg filik bal-hauk halug ohore at ebe emereg weregman mo obuk uruk karuhu.

³²Ne, di angge su angge ai wareg filik en lahe amu angge eke emberimmu wamburuk halug amu angge ai emereg wereg laruhu. Amu angge aire nunggwangge fahet duruk angge ai deg kweleg e on fam hilinggig angge ane, sum kain on fam ane, ahap on fam ane, sum karung on fam ane deg kweleg misig angge ai ik fam kwelaboho fohup, famen de deg kweleg misig angge ai emereg weregman mo obuk uruk karuhu.

³³Ne, wareg filik ai lahe waruk belanga kwenang on fam laleg angge ilonggoma wamburuk halug di angge su angge waruk ai elma wereg angge etmano mundoho emet atuk karuhu. Ne, waruk aire erap esahup fano.

³⁴Nauk angge belanga ai fam en ik en bal-hahu halug de emet aruhu ne ik belanga ai elma wereg on ohore emet aruhu neg.

³⁵Di angge su angge wareg filik misig eke amu angge fam wamburuk halug, emet atuk karuhu. Ne, indok menggaldukmu anglo inim weratuk angge kwenang on fam buhundeg angge fam wamburuk halug de mundoho emet aruhu mu erap esahup fano.

³⁶Di angge su angge amu on de wareg filik en sen hauk halug de mundoho emet atuk karuhu famen de we ik bohwe inim ne ik eleruk wilipuk on inim fam neg de eleg.

³⁷Ware filik ai lahe anggen a foluhuk on ulug wereg on fam wamburuk halug anggen aire emet aruhu fug we fano horeg welaruhu.

³⁸Famen de anggen ai lahe ik fam sale folug weregman wareg filik anyo obam wamburuk halug de ai mundoho emet aruhu.

³⁹Ap sa en eke di angge su angge ousa wereg on wareg filik fam bal-hauk halug at ai emereg weregman mo obuk uruk karuhu.

⁴⁰Ap en wareg filik ai walug lahu halug oho nahu halug ohore asum ik ho dahu famen ebe neg emereg weregman mo obuk uruk karuhu.

⁴¹Di oluk-oluk angge su oluk-oluk angge kwenang emberim fam lobo duruk angge mel misigmu lohoum-lohoum duruk on mel eyog ohwan wilibig on halug mel, eyog humdoho wilibig on halug mel, de mundoho ousa deg ma nahup mun ousa.

⁴³Hit henonggwareg en oluk-oluk angge ai on nauk fam emet dahup ai ousa.

⁴⁴ An henakni TUHAN Allah nebe An deg lahimu, An nebe mun eneg horeg welahi ai hagdoho hit inim mundoho eneg horeg neg welamek.

⁴⁵An eneg horeg welahi hag hit inim eneg horeg welamek. An TUHAN hit o Mesir en An nebe TUHAN Allah we An neg amag ulug og-heneplug wilibik waharihik on nebe An.

⁴⁶Oluk-oluk angge di angge su angge suwe, bak, wam ik fam oluk wereg angge inim, kwenang fene lobo duruk angge inim, fahet enawene melaleg febag on de ai.

⁴⁷Hiren di angge su angge en nauk on de ke on, ne nauk eleg on orohole fano on de ke on, emereg on de ke on ulug fubi dauk kamuhup fano,” ulug hweag-esebag.