Read Ninia Yali IMAMAT 12 Bible Online

IMAMAT 12 - Ninia Yali bible

IMAMAT 12

¹TUHAN en wene melaleg Musa obam febag on de su.

²Ap homi inunggul unuk Israel on en halug, hwe misig eke en omalik ap angge endag dauk halug de, nukoho sabiren aire hwe ai amep laukmu wereg hagdoho at emereg welaruhu.

³ Nukoho ligin salim neg de omalik anyo ahap enggalimu on balduk kamuhup.

⁴At ebere nukoho 33 en welaruhu deg en oho re amep lauk karuhu mu emereg welaruhu. Aren wene kabog-duruk kwit fahet duruk angge fam bal-hahu fug ne TUHAN Obam Sabo salegma oho kwik lahu fug deg weregman at ebe horuhup hwili neg de kwik lahu.

⁵Ne, hwe eke en at omalik hwelani angge endag dahu halug de at enggik nukoho 14 en at amep lauk li wereg hagdoho emereg welaruhu. Ai debelug at enggik nukoho 66 en amep wilibik waharuk on nangno hauk kwit emereg welaruhu.

⁶Ne, hwe ai aren omalik ap angge oho hwelani angge oho endag dahu halug oho at emereg welaruhu on anyo lahe mundoho eleg aik lauk halug, hwe anyo en TUHAN fahet og-ituk on walug it imam enekit o TUHAN Obam Sabo sokolma waharuk karuhu. Ne aren TUHAN fahet walug waharuk karuhu angge aire aren yal angge yal-utuk on ulug aren domba omalik umur tahun misig on inim ne asiag elehapdoho foukwag ulug de suwe merpati ket sauwe on oho tekukur oho walug waharuk karuhu.

⁷Walug waharukmu it imam en hwe anyo ebe emereg wereg on anyo fahet horoho ulug TUHAN og-utuk mu at ebe buhun atuk karuhu. It homi en enomalik endag dalug halug duruk kamuhup alere ai.

⁸ Ne, at hwe ai en lahe domba fouk duk ale anggin atuk halug de aren suwe merpati ket sauwe on biren oho ite suwe tekukur keron biren inim walug waharuk karuhu. Walug watlug misig de yal angge fahet waroho yal-utuk on ulug, ne misig ekere at asiag elehapdoho yal-utuk on ulug walug waharuk karuhu. Walug waharukmu re it imam en de hwe anyo ebe buhun amag ulug durukmu at hwe anyo ebe buhun atuk karuhu.