Read Ninia Yali IMAMAT 13 Bible Online

IMAMAT 13 - Ninia Yali bible

IMAMAT 13

¹At TUHAN en wene melaleg su it Musa inim Harun inim enobam febag.

²Ap misig eke ahap fam yebil duk-duk angge mel burag mel huhul angge unggul kuron obam deg ma yebil hum am alereg halug de ap ai walug it Harun ambiangma on imam enekit walug waharuk kamuhup.

³Walug waharukmu imam etmano en ap anyo ahapma yebil deg fil anyo inil kumu hauk men lahe fomane etmano horog ha deg kweleg yebil wereg ma etano neg obale yatdoho hilinggig halug de, ap ai ouk mun anggin on deg boruk kamuhup. Ai bolug imam en ap su ketia emereg welatmisi hweag-utuk kamuhup.

⁴Famen de ahap ouk deg fil etano lahe kut degman ahap fomane etmano weregman yebil deg ma etano obale yatdoho hilinggig eleg halug de yebil deg ma eta oruk mel kutdeg eleg halug de ap ai o oko nukoho enggik sabiren amumu fohupmu welaruhu.

⁵Airoho fohupmu wereg ma nukoho sabirangge anyo re it imam en nikangge kumu hauk karuhu. Kumu hauk men lahe yebil anyo yahi duk fug angge misig ale etano neg deg ma hahureg halug de ap anyo nikangge enggik nukoho sabiren eke inim amumu welamag ulug hweag-umuhup.

⁶Ne, nukoho sabit angge anyo imam en il kumu hauk men lahe ahap yebil wereg fil anyo mun sayongno ulug ekema inim yahi-uk fug angge wereg halug de it imam en ap ebe mun horeg wereg uruk kamuhup, ne ebe fam yebil ouk wereg on aire mun humon deg boruk kamuhup fug. Ap ai mundoho airoho atuk halug de aren asum ho dauk mu ebe mun buhun atuk karuhu.

⁷Famen de imam etmano en ap su ebe buhun aha uruk men aouk anyo ekenim yahi duruk halug ap anyo en folo-folo imam enekit hweag-esauk karuhu.

⁸Airoho hweag-esaukmu imam en inil kumu hauk men lahe demdoho ouk anyo yahireg halug de ap su ouk anggin humon deg ulug, ap ebe anyo at emereg welamag uruk kamuhup.

⁹Ap eke ahap fam ouk anggin humon deg halug de imam etmano enekit walug waharuk kamuhup.

¹⁰Walug waharukmu imam etmano en kumu hauk men lahe ap anyo ahap fam unggul kurangge firigmen yebil buragdoho oruk yebil wereg ma etano kut deg halug de ap ai ouk hwenanggo deg boruk kamuhup,

¹¹ai bolug imam en ap su emereg welamag ulug hweag-utuk kamuhup. Ne, at mundoho emereg wereg ma at amumu welamag ulug hweag-utuk kamuhup fug.

¹²Ne, imam etmano en hauk men lahe huhul-huhul unggul kurangge anyo unggulmen bekit eyog fam deg halug,

¹³ne iren kumu hauk men yebil anyo mundoho ebe fam abirangge saharegman ahap fam mundoho kut neg deg halug de ap su mundoho buhun on aha uruk kamuhup.

¹⁴Famen de nikangge burag yihiruk halug de it imam etmano en kumu hauk kamuhup.

¹⁵Kumu hauk men ai demdoho burag hwenanggo halug ap su ahap fam ouk humon deg ma ulug de at su emereg welamag hweag-utuk kamuhup.

¹⁶Famen de burag hwenanggo anyo ahumbut atlug ahap kut atuk halug ap anyo imam enekit hweag-esauk karuhu.

¹⁷Kumu howag ulug hweag-esaukmu yebil burag anyo lahe demdoho ahumbut atsi halug ap su ebe buhun aha uruk kamuhup.

¹⁸Ne, ap misig eke lahe at ebe fam bot mundoho ahumbut atsi on weregman

¹⁹famen anyo obale kwe duk-duk angge unggul kurangge oho fit-fit angge unggul mep sahaleg angge oho enam atuk halug ap anyo en imam folo-folo hweag-esauk karuhu.

²⁰It kumu howag ulug hweag-esaukmu iren kumu hauk men lahe fit-fit angge aire ahap amu kwe etmano hareg kweleg yebil anyo neg obale yatdoho degman ahap aluluk kwe etano oho kutdoho deg halug de, bot anyo re indip de yebil burag on en disi ulug ap su emereg welamag hweag-utuk kamuhup.

²¹Famen de imam etmano en kumu hauk men oruk yebil wereg kwe etmano kut-am fug angge ne ahap fomane hagdoho yebil wereg ma etmano inim obale yatdoho hilinggig eleg angge deg ma we orohole amumulitdoho neg deg halug ap anyo nukoho sabiren amumu welamag ulug hweag-utuk kamuhup.

²²Ne, kurangge duk deg on anyo yahi uruk halug de ap su yebil burag anggin on deg ulug imam on en ap su emereg welamag ulug hweag-utuk kamuhup.

²³Famen de kurangge duk deg on anyo aham duk fug angge ne yahiroho mel lohon la fug angge deg halug de aire we bot obalekwe ulug ap ai at ebe buhundeg uruk kamuhup.

²⁴Ap misig eke ahap indok en han nauk men ahap indok en han yaleg kwe anyo kutdoho mep-mep alereg halug,

²⁵it imam en inil kumu hauk kamuhup. Kumu halug ahap amukwe etmano fano degman yebil wereg ma anyo obale yatdoho deg ma oruk yebil wereg kwe etmano inim kutdoho deg halug, yebil hwenanggo on indok en han weraho angge ai elma at obam aik wahasi ulug imam on en ap su emereg welamag hweag-utuk kamuhup.

²⁶Famen de oruk yebil wereg ma etma kut deg elegman, ne yebil ele anyo yatdoho fugmen ahap fomane deg hagdoho deg ma we dorangge amumulit deg halug ap ai amumu nukoho sabiren welamag ulug hweag-utuk kamuhup.

²⁷Nukoho sabit anggere imam etmano en kumu hauk kamuhup. Kumu hauk men duk-duk angge unggul kurangge anyo yahireg halug de ap su yebil hwenanggo on deg ulug emereg welamag ulug uruk kamuhup.

²⁸Famen de duk-duk angge unggul kurangge anyo lahe aham-duk fug angge, yahi mel duk fug angge we orohole neg kut deg halug, aire ahapma yebil burag on deg fug, we indok en han yaleg ai en unggulmu kutdeg ulug imam en ap su ebe mun buhundeg uruk kamuhup.

²⁹Ap misig eke ane, hwe misig eke ane, at aouk unggul ahap fam oho, elahandu fam oho deg halug,

³⁰imam en inil kumu hauk kamuhup. Ne, kumu hauk men lahe ahap amu kwe etmano horog hareg kweleg yebil wereg ma etano obale yatdeg halug inim oruk inim ombanisong inim oho mumiroho hwet heheg lauk halug inim de ap ai yebil hwenanggo on duruk ulug ap su at ebe emereg welamag hweag-utuk kamuhup.

³¹Ne, imam en kumu hauk men ouk yebil wereg on aire ahap amu kwe etmano higitdoho obale yatdeg fug famen oruk oho ombanisong oho fanoroho wilibig eleg halug de ap ai nukoho sabirenam amumu welamag ulug hweag-umuhup.

³²Ne, nukoho sabit angge re imam en il kumu halug yebil anyo yahi duk fug angge oruk mel ombanisong mel yebil deg ma etano sel deg lam fug angge ahap ohore amu kwe etmano higitdoho yebil deg ma etano obale yatdoho deg fug halug de,

³³ap ai oruk inim ombanisong inim yebil wereg ma on etano bal-dalug at ebe nukoho sabiren amumu welamag ulug hweag-utuk kamuhup.

³⁴Nukoho sabit salim imam en inil nikangge kumu halug, kumu hauk men aouk yebil anyo yahiruk fug angge ahap yebil deg ma anyo oho obale yatdoho deg fug we ahap amu kwe deg hagdoho deg halug, ap ai ebe buhundeg ulug hweag-utuk mu asum ho dauk karuhu.

³⁵Famen de at ebe buhundeg ulug hweag-umuhupmen aouk anyo nikangge yahi duruk halug,

³⁶imam en nikangge inil kumu hauk kamuhup. Kumu hauk men demdoho aouk anyo yahireg halug, ap su obam ouk wereg ma ebe emereg welaruhu ulug mundoho enameg deg ma imam en oruk inim ombanisong inim kumu hauk kamuhup fug.

³⁷Famen de imam en boruk kwit aouk yahi duruk eleg, oruk inim ombanisong inim ouk deg ma etano fanoroho wilipuk halug de aouk anyo mundoho fano ulug it imam en ap su ebe buhundeg uruk kamuhup.

³⁸Ap eke ane, hwe eke ane, ahap fam duk-duk angge unggul kurangge deg halug de,

³⁹it imam en ap ai ebene inil kumu hauk kamuhup. Kumu hauk men duk-duk angge ai orohole hesiloho deg halug de aire sike buke obam atsi ulug at ebe buhundeg uruk kamuhup.

⁴⁰Ap on misig eke unggul ambol fil oho alukwe fil oho delag deg halug unggul delag deg ai fam ap ai emereg uhup hayog.

⁴¹

⁴²Famen de unggul ahap delag deg ma etano fit-fit angge mep sahaloho deg halug de ap ai ouk hwenanggo deg boruk kamuhup.

⁴³It imam en ap anyo ahap fam inil kumu hauk men demdoho unggul kurangge firig lit mep sahaleg halug,

⁴⁴ap ai unggulmu ouk hwenanggo wereg en ulug imam en ap su emereg welamag uruk kamuhup.

⁴⁵Ap misig eke ahap fam ouk burag humon deg halug de aren asum denel heheg lauk on wan-dalug oruk inim anggen yihukwag ulug embeselug, orohole apma fil sale fahat dalug, “Emereg on! Emereg on!” ulug ele hwiril noruk karuhu.

⁴⁶Aren a ouk ai on wauk li aire at ebe emereg on wereg lit at ebe o sabo salegma en dagma it ap homi amu on en weregman yatdoho welaruhu.

⁴⁷Sum wan-duruk on fam inim kain wam domba ahap fam wirig on inim kain wol on fam on inim lenan hekel il sako on fam wirig on inim, ite di angge su angge mundoho ahap fam en wirig on inim fam fubut[4] deg halug, ne fubut ai lahe orohole hesiloho deg halug oho, orohole mep-mep alereg halug oho re fubut aire mun yahi il lauk on deg ma imam enobam unug-esa waharuk kamuhup.

⁴⁸

⁴⁹

⁵⁰Di angge su angge etmano imam en inil kumu halug de oko amumu nukoho sabirenam welamag ulug foruk kamuhup.

⁵¹Folug nukoho sabit angge anyo nikangge inil kumu hauk men fubut anyo mun amu on fam inim sahareg halug di angge su angge aire emereg on boruk kamuhup.

⁵²Ai bolug imam en fubut aire mun saha uruk on deg ma ulug indok fam elehapdoho foruk kamuhup.

⁵³Famen de imam etmano eke kumu hauk men fubut anyo di angge su angge amu on etmano fam sahareg fug halug de,

⁵⁴aren di angge su angge etmano ik horoho folug nukoho sabirenam welamag ulug hweag-esauk karuhu.

⁵⁵Airoho welatlug imam en inil kumu halug fubut aire sahauk fug angge orohole misig ale neg deg halug ne di angge su angge etma oho fubut we alukwe fil oho ambol fil oho deg halug, di angge su angge etma re mun emereg ulug indok yalduk kamuhup.

⁵⁶Famen de inil kumu haukmu etmano en fubut duruk on anyo eleg hag aik lauk halug de sum di angge su angge etmano en fubut duruk fil etmanore deneloho embeseruk kamuhup.

⁵⁷Ne, fubut anyo lahe nikangge indip duruk halug de at onggwareg on anyo en di angge su angge etma indok yalduk karuhu.

⁵⁸Ne, di angge su angge fam fubut deg on anyo horurukmu eleg atuk halug, no etma ekenim horulug neg de mundoho buhun on aha boruk kamuhup.

⁵⁹Airoho sum wan-duruk on inim, kain lenan fam wirig on inim, wol fam seleben deg on inim, di angge su angge mundoho ahap on fam en wirig on inim fam fubut duruk halug duruk kamuhup ale ulug wene melale fesebag.