Read Ninia Yali IMAMAT 14 Bible Online

IMAMAT 14 - Ninia Yali bible

IMAMAT 14

¹ TUHAN en ap eke ouk hwenanggo humon walug fano atuk mu ebe buhun-duruk kwit duruk kamuhup ale ulug wene melaleg Musa fam febag on de su: Ap anyo ebe mun buhundeg ulug ukoho salim aire ap anyo ebe it imam enekit walug waharuk kamuhup.

³Walug waharukmu it imam etmano en o sabo salegman dag fil walug wilibik lalug ap anyo mundoho fano atsi ane ulug kumu hauk kamuhup. Ne, kumu hauk men lahe ap anyo ebe mundoho fano atsi halug,

⁴at ai en suwe biren ousa wereg fug on inim, e lak enggik sehelet misig eke inim, hekel mebon kongdeg angge misig inim, hisop enggik misig inim walug wamag ulug it imam etmano en hweag-utuk kamuhup.

⁵Walug waharukmu suwe misig ekere waruk belanga kwenang on fam laleg angge ik il wirik on ik eleruk fam en wilibik waharuk on en hwenanggoho wereg on anyo emberimmu en watuk kamuhup.

⁶Suwe eke anyo inim e lak enggik sehelet anyo inim, hekel mebon anyo inim, hisop enggik misig anyo inim de suwe wareg anyo amep fam yuhul halug,

⁷it imam en suwe anyo amep enggik sabirenam ap a ouk famen fano atuk on anyo at ebe mundoho fano aha enoluk amag ulug at anyo fene kwetete esauk karuhu. Ai debelug suwe eke oluk wereg on anyore o lei fil fotog-esauk karuhu.

⁸Airoho debelug ap anyo asum ik ho dalug, oruk mundoho abirangge baloho kume wat-dauk karuhu. Airoho durukmu at anyo ebe mun buhun on aha ulug o sabo wirigmu etmano kwik lauk karuhu, famen de enggik nukoho sabiren eke inim at amu neg o sabo salegma etmano kwik lahu fug.

⁹Nukoho sabit angge neg de at anyo oruk inim, ombanisong inim, il oruk inim, ameteruk mundoho ebe fam wilibig on inim, bal-dalug, asum ik horoho kume wat-daukmu neg de at mundoho ebe fam buhun on atuk karuhu.

¹⁰Nukoho ligin anggere ap anyo en domba yohombuk on biren inim domba hwe on misig umur tahun misig deg on enebe enahapmale eleg on neg walug waruhu. Ai en foma re zaitun ahalue sepertiga liter inim, tepung zaitun ahalue inim meneneg angge 3 kilogram inim walug waruhu.

¹¹Walug waruhu mu it imam en ap ebe inim angge walug waruhu angge etmano inim walug o TUHAN Obam Sabo salegma sokolma etmano feik waharuk kamuhup.

¹²Feik watlug it imam etmano en domba yohombuk on etano misig eke inim zaitun ahalue en sepertiga liter eke inim oko obalmangge waroho yalduk on ulug TUHAN fahet enggik dum wareg yalduk karuhu.

¹³Domba aire enesiag elehap dukwag ulug on watuk mu inim yal-umukoho watuk mu inim etmano en obale wam watuk mu enegma en watuk kamuhup. Wam obalmangge ulug watuk on inim ap homi enesiag elehapdoho ulug watuk on inim etare mun horeg on deg ma it imam etmano en hwelaukmu deg ma domba aire eta en neg watuk kamuhup.

¹⁴Ware folug it imam etmano en domba omalik doron anyo amep dorangge lohon walug, ap ebe buhun aha ulug hweag-umul ulug deg on anyo fam, esanggo amuluk bekit fil on fam inim, enggik foap bekit fil on fam inim, eyog foap bekit fil on fam inim, aroreberuk karuhu.

¹⁵Airoho debelug it imam anyo en zaitun ahalue dorangge lohon walug onggwareg enggik hware fil on fam belabe foruk karuhu.

¹⁶Mundoho belabe folug de at enggik bekit fil on ahalue anyo fam yuhul halug de TUHAN Obam Sabo salegma etmano enggik sabirenam kwetete esauk karuhu.

¹⁷Airoho debelug ahalue enggikmu dorangge wereg on etano fam de atam ap ebe buhun aha hweag-umul ulug wereg on anyo fam ebene aroreberuk kwe etano neg, esanggo amuluk bekit fil inim, enggik foap bekit fil on fam inim, eyog foap bekit fil on fam inim aroreberuk karuhu.

¹⁸Ai debelug ahalue foma wereg on etmano abirangge re ap anyo unggulmu hilil-esauk karuhu. Airoho duruk fam it imam en TUHAN il hanim ap anyo ebe fam fanoap deg welamag ulug duruk kamuhup.

¹⁹Airoho debelug at imam en ap emereg wereg on anyo buhun amag ulug de wam asiag elehapdoho ulug on anyo waroho og-utlug, ai en wam yaleg angge fahet waroho yal-utuk on anyo fahet watuk karuhu.

²⁰Ware folug, amep wereg eleg angge on yalukwag ulug feik waharuk on anyo inim, waroho yalduk angge emberimmu etmano yalduk karuhu. Airoho duruk fam it imam en ap anyo ebe fanoap deg welamag ulug airoho duruk fam de ap anyo ebe buhun on atuk karuhu.

²¹Ne, ap ai lahe enggik eleg deg lit duk fug alereg on halug de, obalmangge foruk on fahet halug de aren domba yohombuk on omalik misig TUHAN obahet enggik dum wareg foruk on ulug walug waharuk karuhu fano. Ai inim seberohore eke amep wereg eleg angge on foruk on ulug de satu kilo tepung meneneg angge inim sepertiga liter zaitun ahalue inim walug waharuk karuhu fano.

²²Eke ap ai en suwe muluk ket sauwe on biren ane suwe yalma ane ket sauwe on ane walug watlug, ekere enesiag elehapdoho foukwag ulug fahet, ne ekere yal angge yal-utuk on fahet ulug walug waharuk karuhu.

²³Abirangge waroho yal-utuk angge aire ap anyo en nukoho ligin salim at onggwareg ebe buhun-duruk salim anyo walug de it imam enekit TUHAN Obam Sabo salegma sokolma etano feik waharuk karuhu.

²⁴Feik waharukmu it imam etmano en domba omalik anyo inim, zaitun ahalue anyo inim TUHAN obahet enggik dum waroho forukmu ai it imam enengge atuk karuhu.

²⁵Airebelug it imam en domba omalik anyo waroho amep dorangge walug de ap buhundeg on atmisi ulug boruk on anyo esanggo amuluk fam inim, enggik foap bekit fil on fam inim, eyog foap bekit fil on fam inim aroreberuk karuhu.

²⁶It imam etmano en de ahalue enggik endangge hware fil on fam belabe folug,

²⁷enggik bekit fil en de ahalue anyo enggik sabirenam TUHAN Obam Sabo wirig on anyo fam kwetete esauk karuhu.

²⁸Ai debelug ahalue foma at enggikmu wereg on etano fam de atam ap anyo ebene wam mep fam deberuk kwe etmano esanggo amuluk bekit fil on fam inim, enggik foap bekit fil on fam inim, eyog foap bekit fil on fam inim ap ebe buhun atmisi ulug wereg on anyo fam aroreberuk karuhu.

²⁹Ne, ahalue abirangge foma re ap anyo TUHAN il hanim ebe buhundoho ulug unggulmu hilil-esauk kamuhup.

³⁰Ai debelug it imam etmano en suwe muluk oho yalma ket sauwe on oho,

³¹ekere asiag elehapdoho foukwag ulug, ne ekere yal angge yal-utuk on inim seberoho enenggik dum wareg foruk on fahet ulug foruk karuhu. Airoho foruk ai fam it imam etmano en ap anyo TUHAN il hanim buhundoho foruk karuhu.

³²Ap enggik eleg on eke ouk burag hwenanggo humon halug buhundoho feseruk kamuhup ale ulug wene melaleg hweag-esebag on de ai.

³³TUHAN en Musa inim Harun inim wene melaleg su enobam foruk kwit,

³⁴it Ap homi Israel o Kanaan TUHAN en og-hesasimu etmano mundoho kwik lahupdeg halug o wirig fam fubut atuk halug duruk kamuhup ale ulug wene melaleg ai enobam febag.

³⁵Wene melaleg enobam foruk kwit de, “Ap eke en obam wirig fam fubut on eke il hil lauk kwit halug folo-folo it imam hweag-esa lauk karuhu.

³⁶Hweag-irik laukmu at imam anyo en fubut deg on anyo owam il kumu ha wam fug mu di angge su angge o ai ilonggoma wereg angge mundoho wilibi foukwag ulug hweag-esauk karuhu. Hweag-esaukmu wilibi forukmu neg de at il kumu hauk karuhu, famen de airoho duhup fug halug de di angge su angge mundoho o ai ilonggoma wereg angge aire mundoho emet atuk karuhu.

³⁷Inil kumu hauk men orohole yonggwa baleg angge aben mel, orohole mep-mep aleroho obahat fam lisulug kuruk halug de,

³⁸it imam etmano en o anyo embeselug enenggik sabiren sok laroho embeserukmu welaruhu.

³⁹Sak laroho welatlug enenggik nukoho sabit angge ai neg de fubut anyo ekema inim saha isi ane ulug at anyo en nikangge il kumu ha waharuk karuhu. Ne, kumu hauk men fubut anyo mundoho saha isi halug,

⁴⁰aren helep obahat wirigmu fubut ai en aro isi on ulug etmano inim bal-hasi halug inim de helep ai mel ahap dag kwe liliban duswa on ai mel de o kota dag fil obale emereg ma etma hwik-esa lakiek ulug hweag-esahu.

⁴¹

⁴²Hwik-esalug helep oko wilibi feseruk on anyo obalma re helep keron wiri folug, o anyo obahat abirangge inim, ahap dag fil liliban duruk on inim de mundoho keron fam neg duhup.

⁴³Atam on omano felelengdoho embeselug helep keron obalma folug ahap dag fil keron fam neg liliban duhup men fubut anyo nikale wereg neg deg halug,

⁴⁴it imam en fubut anyo ekenim saha isi ane ulug nikangge inil kumu hauk kamuhup. Kumu hauk men wereg neg halug de o ai emereg wereg uruk kamuhup.

⁴⁵Airoho ulug o anyo mundoho meiyaloho helep inim, e inim, ahap dag kwe liliban duruk angge etmano inim mundoho o kota dag fil hwik-esa lauk kamuhup.

⁴⁶Airoho duk fug mu ap misig eke o ai ilonggoma kwik lahu halug de ap ai ebe emereg weregman mo obuk uruk karuhu.

⁴⁷Ap eke o ai ilonggoma nohosi halug oho, asiburu nasi halug ohore at asum ho dahu.

⁴⁸Famen de o anyo obahat dag kwe liliban duswa hwili en it imam etmano watlug kumu hauk men fubut anyo ekenim enam atsi fug halug, fubut anyo mundoho eleg atsi mu ulug aren o su mundoho horeg wereg uruk karuhu.

⁴⁹O ai buhun-dukwag ulug de it imam etmano en de suwe biren inim, e lak inim, hekel mebon inim, hisop enggik sehelet misig inim walug,

⁵⁰suwe misig ekere waruk belanga ik il wirik on eleruk ahaik famen hwenanggeg on hwenanggoho wereg on anyo emberimmu en watuk karuhu.

⁵¹Ware folug e lak inim, sabu mebon inim, hisop enggik sehelet inim, suwe oluk wereg on anyo inim de suwe wareg on anyo amep fam inim ik il wirik on anyo fam inim yuhul halug de o anyo fene enenggik sabirenam kwetete esauk kamuhup.

⁵²Airoho debelug suwe oluk wereg on anyore o kota dag fil leimu etma wilibi feseruk kamuhup. Airoho duruk fam de it imam en o anyo fahet buhun-durukmu o anyo buhundeg on atuk karuhu,” ulug hweag-esebag.

⁵³

⁵⁴Ap homi enahap fam yebil burag fahet inim,

⁵⁵duk-duk angge fahet inim, enahap fam unggul kurangge duk-duk angge deg on fahet inim, enebe fam fit-fit angge deg on fahet inim enesum fam fubut deg on fahet inim, enobam fam fubut deg on fahet inim duruk kamuhup ale ulug wene melaleg airoho hweag-esebag.

⁵⁶

⁵⁷Wene melaleg airoho hweag-esebag aire di angge su angge aire mun fano buhundeg wereg a emereg wereg a ulug eneg deg ma hauk kamag ulug hweag-esebag.