Read Ninia Yali IMAMAT 15 Bible Online

IMAMAT 15 - Ninia Yali bible

IMAMAT 15

¹TUHAN en Musa inim Harun inim wene melaleg su enobam febag.

²Ap homi inunggul unuk Israel on halug, ap eke en ahap enggalimu on en muluna hag angge wilibik waharuk halug de wilibik waharuk angge aire emereg welaruhu.

³Aire mundoho wilibik waharuk on et nin ilonggoma wereg on et fahet.

⁴Ap ai en hweria aruhu mu halug inim nohokumu halug inim oho mundoho emet aruhu.

⁵Ap misig eke en ap aireg on anyo ahap bal-hauk halug inim, at nohorukmu etmano bal-hauk halug inim, at hweriatuk mu etmano obalma hweriatuk halug inim, aren wasulahap belapukmu hweriatuk halug inim, ap ai asum ik horoho kume wat-dahureg, at ebe emereg weregman neg mo obuk uruk karuhu.

⁹Ap ahap enggalimu on famen muluna hag angge wilibik waharuk on anyo en wam sapi emberimmu huratlug lakoho lit doalduk angge anyo fam hweria aruhu halug oho amu angge fam halug ohore mundoho emet neg atuk karuhu.

¹⁰Ap misig eke en ap anyo obale hweriatuk angge fam lohon bal-hahu halug de at ebe emereg weregman neg mo obuk uruk karuhu. Ne, it eke en angge anyo leko walug lauk halug de at asum ik horoho kume wat-dalug ebe emereg weregman neg mo obuk uruk karuhu.

¹¹Ne, ap ahap enggalimu on famen muluna hag angge wilibik waharuk on anyo en at atam enggik ho-da fug angge ap amu on sen-enesauk halug de ap aren sen-hauk on anyo asum ik fam ho-dalug kume waroho weregman neg mo obuk uruk karuhu.

¹²Waruk belanga ap ai en sen hauk on halug de erapdoho embeseruk kamuhup, ne di angge su angge duruk angge sen hauk halug inim de ik horuruk kamuhup.

¹³Ne, ap anyo fano atuk halug de aren enggik nukoho sabiren eke inim nangno hauk karuhu. Airoho nangno halug neg de aren asum ik fam ho-dalug ebe inim ik eleruk wilipuk on fam kume wat-dalug duhumu neg de at ebe buhundeg on aruhu.

¹⁴Nukoho ligin on fam de ap anyo en suwe muluk ket sauwe on biren inim ite suwe yalma ket sauwe on oho walug it imam etmano enekit o TUHAN Obam Sabo salegma etmano og-esa waharuk karuhu.

¹⁵Og-esa waharukmu it imam etmano en suwe misig ekere at asiag elehapdoho foukwag ulug, ne ekere aren yaleg angge yal-utuk on ulug og-utuk kamuhup. Airoho duruk fam ap anyo ebe buhundeg welamag ulug it Allah il hanim duruk on en TUHAN alukwema en duruk kamuhup ai.

¹⁶Ap misig eke en ahap enggalimu on famen ahalue mani wilibik waharuk halug de ap ai ebe kume waruhu famen de at ebe emereg weregman neg mo obuk uruk karuhu.

¹⁷Di angge su angge sum kain on en wirig angge fam oho ahap fam en wirig angge fam oho ap ahalue ai en bal hauk halug de di angge su angge etma re mundoho emereg weregman mo obuk uruk karuhu.

¹⁸Ap eke homi inim seberoho noholug halug ap halug oho hwe halug oho it enebe kume wat-dahup famen de enebe emereg weregman neg mo obuk uruk karuhu.

¹⁹Hwe misig eke aren amep bigalem misig fam lauk on anyo duruk halug de at ebe enggik nukoho sabiren emereg welaruhu. Ne, ap eke en at ai bal-hahu halug de ai ap ai ebe emereg weregman neg mo obuk uruk karuhu.

²⁰Amu angge nunggwangge hwe ai at amep lauk nohoku angge halug oho doaloho hweriaruhu angge halug ohore mundoho emereg welaruhu.

²¹Ap eke en at hwe anyo amep lauk kwit hwerieg welatsi mu bal-hauk halug oho, nohoruk katsi mu bal-hauk halug oho asum ik fam ho-dalug kume waruhureg at ebe emereg wereg ma neg mo obuk uruk karuhu.

²⁴Ap misig eke en hwe amep lauk on fam inim seberuhup halug de ap ai enggik nukoho sabiren emereg welaruhu ne at nohoruk karuhu mu etma ohore emereg neg welaruhu.

²⁵Hwe misig eke amep bigalem fam lauk on anyo nukoho dahandoho amep lauk halug oho, ite amep lauk kwit neg wereg halug oho at aire atam amep lauk li emereg welatsi hagdoho amep lauk li eta inim ebe emereg welaruhu.

²⁶Amep lauk li ai at nohosimu halug oho at hweria atsi mu halug oho mundoho emet aruhu.

²⁷Ap sa en at obale ai fam sen hauk halug de at ebe emereg welaruhu. At ebe asum ik fam ho-dalug ebe kume waroho emereg wereg ma neg mo obuk uruk karuhu.

²⁸Hwe anyo amep mundoho bal atuk halug at enggik nukoho sabiren nangno hauk kwit welaruhureg neg de at anyo ebe buhundeg on aruhu.

²⁹Nukoho enggik ligin salim aren suwe muluk ket sauwe on biren inim, ite suwe yalma ket sauwe on inim walug o TUHAN Obam Sabo saleg on sokolma etma it Allah il hanim duruk on og-esa waharuk karuhu.

³⁰Walug waharukmu it imam etmano en suwe misig ekere at asiag elehapdoho foukwag ulug ne misig ekere waroho yal angge yal-utuk on ulug forukmu, airoho duruk ai fam it imam en hwe anyo fahet TUHAN olohotma en buhundoho foruk kamuhup.

³¹TUHAN en Musa miming-duruk kwit, ap homi inunggul unuk Israel on en TUHAN Obam Sabo saleg on it enobam sabo sahalimu wereg anyo emere fouk no nanggig li em it emereg welamuhup ne nanggig li em we welamuhup ai fureboukwagdoho hweag-esa lakin, ne iren TUHAN Obam Sabo ai emere fohup halug de it enebe waramuhup.

³²Ulug airoho it ap enahap enenggalimu on fam ouk deg lit muluna hag angge wilibik waharuk halug inim, ahalue wilibik waharuk halug inim,

³³it homi enamep bigalem hundig fam waharuk on anyo waharuk li duruk kamuhup ale ulug inim, ap eke hwe amep lauk kweleg inim seberuruk halug duruk kamuhup ale ulug inim wene melaleg airoho hweag-esebag.