Read Ninia Yali IMAMAT 16 Bible Online

IMAMAT 16 - Ninia Yali bible

IMAMAT 16

¹Harun omaliki biren etano Allah fahet unggulowam foruk angge yalduk kwit, indok TUHAN enda boruk eleg ale on fam yalduk katfag fam waratfag ma, TUHAN ele Musa fam hweag-utuk kwit, diroho ebag:

² “Hat howe Harun fam diroho hweag-imin, At de nukoho mundoho momaleg on anyo fam neg de Ambe Mun Amu Enegma etma peti wene sali waroho og-henepihik ulug kwelaboho wereg angge anyo fam sebeloho, nebe o hena anggulog fam wereg lit henelohotma enam atuk karuhuk ai en de at Harun en An nonggwareg Nobam kain huliroho balegma etma nukoho di salim kuruk kamuhup ulug wene baleg higitdoho ai salim neg kuruk kamagdoho hweag-umuk. Ne, aren wene su sahale folug duhu halug de at ebe wararuhu.

³ Wene baleg ai higitdoho at Harun An Nobam Ambe Mun Amu Enegma etma kwimin ulug halug de aren sapi yohombuk sawe on eke asiag elehap deberuk on fahet inim domba yohombuk on misig waroho yal angge yalduk on inim walug neg de Ambe Mun Amu Enegma ai kwik lauk karuhu,” ulug hweag-etfag.

⁴Ekenim uruk kwit: “Aren yabuk airoho duruk kwit wene melaleg su furoho duruk kamag. At ebe owan Ambe Mun Amu Enegma etma kwik la fug angge wereg lit de kume fanoroho watlug de sum imam en wan-duruk on anyo wan-dauk kamag. Sum ai ebe sum inim, eyog sum baleg on inim, ombahalug hagdoho wan-duruk angge inim, unggul asum inim wan-dauk kamag. Ai mundohore hekel lenan ai fam yihig on neg wan-duruk karuhu.

⁵Ap homi Israel on en enesiag elehapdoho nenobahaukwag ulug de kambing yohombuk on biren feheg, yal angge indok waroho yal-nomag ulug de domba yohombuk on misig ai wep-debeheg dulug de at Harun akit feik waharuk kamag.

⁶At Harun onggwareg siag duruk on fahet inim at ohwe, omaliki siag duswa on fahet inim de An den enesiag elehapdoho fesoukwag ulug sapi yohombuk on misig neg waroho yal-nutuk kamag.

⁷Wam kambing yohombuk on biren etano it ap homi Israel on en walug An Nobam Sabo wirigmu sokolma etma feik waharuk kamuhup.

⁸Eta feik waharukmu helep anggen wal-hauk kwit ebe biren, eke “TUHAN fahet,” ulug eneg ale deberuk kamuhup, ne eke re Azazel[5] fahet kamuhup.

⁹Airoho wal-hauk men helep anggen Kambing TUHAN fahet eneko foruk on anyo enesiag apeleg fam atuk on aire ap homi en siag duswa on anyo An den elehapdoho fesoukwag ulug waroho og-nutuk kamuhup.

¹⁰Ne, kambing Azazel fahet ulug helep anggen obam aruhu on aire oluk angge An henakni TUHAN nil hanim eneko folug An den ap homi Israel on enesiag elehapdoho fesoukwag ulug de o lekma ap homi elegma etma siloho Azazel fahet wilibi feseruk kamuhup.

¹¹At Harun en wam sapi yohombuk on anyo at asiag nim ohwe omaliki enesiag inim elehapdoho fesoukwag ulug waroho senggeloho folug,

¹²indok de mezbah emberimmu etmano en elemesag hag angge walug indok anggen inim humdoho walug de amben fano angge dupa enenggik birenam yinggiloho wa hwal angge inim walug de Ambe Mun Amu Enegma anyo kuruk kamag.

¹³Walug kulug dupa aire peti An den sali wene waroho og-henepihik ulug yohwareg wereg angge anyo olohotma en yaluhumu, hobure e peti ai elma dopnoreg on anyo fam saluhumu Harun en il ha fug alereg laruhu. Il fu hauk halug de at ebe wararuhu.

¹⁴Airoho duruk kwit wam sapi anyo amep dorangge enggikmu walug peti An den wene sali waroho og-henepihik ulug wereg on anyo aplit fene kwesaloho ware feheg, ne orohole fil de enggik sabirenam kwetete doho ware feheg dukwag.

¹⁵ Ai mundoho debelug de, ap homi Israel on mundoho enesiag elehapdoho fesoukwag ulug at Harun en kambing eke waroho senggeluhu. Senggele folug amep de Ambe Mun Amu Enegma etma walug kulug, wam sapi amep anyo fam duhu hagdoho peti An den wene sali waroho og-henepihik ulug wereg angge anyo aplit fene etmano kweteteroho ware feheg, orohole kwe kwete roho ware feheg duhu.

¹⁶Aren airoho duhu ai fam ap homi Israel on en Ambe Mun Amu Enegma anyo siahapdoho feheg, it mundoho siag neg deheg, duruk on ai elehapdoho fesehuk. An Nonggwareg Nobam Sabo sum on fam saleg on ai ap homi Israel on enobam sabo saleg on sahalimu wereg ma etma it siag emereg neg duruk kwit emere fehesa ulug buhun-duruk karuhu.

¹⁷At Harun Ambe Mun Amu Enegma etma kwik lalug ap homi siag duswa on An den ho-nenebukwag ulug duruk katlug wilibik waharuk hwili en ap homi An Nobam Sabo saleg on ai ilonggoma eke mun welamuhup de fug. At Harun onggwareg siag disi on fahet inim, ohwe omaliki siag duswa on fahet inim ap homi Israel on abirangge en siag duswa on fahet inim, An den mundoho elehapdoho nenobahaukwag ulug debelug,

¹⁸at ebe mundoho wilibik watlug de di angge su angge waroho An nobahet yaldukmu mezbah ai horimin ulug waruhu. Watlug de sapi inim, domba inim amep dorangge lohon walug de mezbah anyo unggut ambiang foma-foma andimuk hag angge hilinggig angge fam etma aro debehu.

¹⁹At enggik dum en mep anyo lohon oko walug de di angge su angge waroho yal-nutuk angge anyo fene enggik sabirenam kwetete heheg warukwag. Airoho duhu ai fam ap homi Israel on en An waroho yal-nutuk angge emere foruk on ai An nonggwareg fahet neg welamag ulug buhun-niruhun, isi ulug hweag-iruhun,” ulug hweag-etfag.

²⁰Ekenim uruk kwit: “Ambe Mun Amu Enegma anyo mundoho buhun-debelug foma ambe dag fil etmano oho buhun-debeheg, mezbah fam etmano horebeheg, dulug de, at Harun en kambing Azazel[6] fahet oluk eneko foruk on helep anggen obam aruhu on anyo an henakni TUHAN nobahet nobahakup.

²¹Airoho nobahalug at Harun enggik biren en kambing anyo unggulmu sebeleg lit ap homi Israel on en kwasikdoho duswa on mel, Nele sahale folug duswa on mel, siag duswa on mel abirangge fagdoho foukwag. Airoho duhu ai fam it ap homi Israel on en siag duswa on anyo abirangge horoho kambing Azazel ai unggulmu fohu. Airoho debehumu ap eke ayonggo fohup on anyo en kambing anyo siloho walug o leimu ap homi elegma etma monde feik lauk kamag.

²²Walug lalug de kambing ai en ap homi Israel on en siag duswa on abirangge walug de o leimu ap homi elegma etma lowagdoho etma fotog-esauk kamag.

²³ Anyo mundoho debelug Harun de An Nobam Sabo sum fam salegma anyo kwik lalug sum it imam en enesum wan-duruk on Ambe Mun Amu Enegma anyo kwikoho wan-disi on anyo nonggoloho foruk karuhu.

²⁴Airoho debelug wilibik watlug de ik eke kume watuk mu enegma anyo ware folug onggwareg asum we hesangge on wan-dauk karuhu. Airoho mundoho debelug de at ebe wilibik watlug at onggwareg siag disi on fahet inim it ap homi Israel siag duswa on fahet inim, fahet An den elehapdoho fesoukwag ulug wam waroho yal-nutuk kamag.

²⁵Airoho duruk kwit it siag duswa on fahet wam waroho yal-numuhup on ai seire mezbah fam etman yalduk kamag.

²⁶At ap eke wam kambing Azazel fahet siloho o leimu monde feik lahureg waruhu on aire at ebe ambol somban obam sabo sum on fam salegma etmano owan kwik la fug kweleg atam asum ik horoho ebe kume ware fahat dalug kwik lauk karuhu.

²⁷ Ne, sapi yohombuk on mel kambing eke anyo mel de ap homi en siag duswa on An den elehapdoho fesoukwag ulug wat-nutlug amep de Ambe Mun Amu Enegma atlug no walug kuhu on ai ebere walug o sabo salegma etmano dag fil wilibik lalug wam ebe birenet ahap inim, ebe inim, ilonggomangge inim mundoho re indok yalukwag.

²⁸It ap airoho yaluhup on ai enebe owan o saboma la fug angge asum horoho kume ware folug lauk karuhu,” ulug hweag-etfag.

²⁹ At Allah en airoho hweag-esebagdeg eke diroho hweag-umuk ebag, “O bigalem henenggik wenaharuk kwit bigalem sabit on tanggal 10 fam de ap homi Israel on mel, it ap bohon inim wereg on mel etma abirangge enambilik hweang wereg lit yabuk duruk kamuhup ousa. Nukoho ai salim de ap homi Israel on enebe fano enobam horeg welamag ulug iren siag duswa on ai An den elehapdoho fesoukwag ulug airoho duruk kamuhup. Duruk kamuhup ale fahet wene melaleg baloho fehi ai higitdoho neg duruk kwit neg welamuhup.

³²Ap imam duruk kamag ulug enowe unggul sebeloho unduhuk fousa on halug aren de An den ap homi siag duswa on elehapdoho fesoukwag ulug duruk karuhu. Aren airoho duruk kwit sum ai duruk kwit wan-duruk on wan-deheg, dulug de

³³o Ambe Mun Amu Enegma anyo fahet inim, An Nobam ambe dag fil fahet inim, di angge su angge waroho an yal-nutuk on fahet inim, An enakni TUHAN nobahet inim, ap homi Israel on mundoho fahet inim, enebe fam buhundeg welamag ulug airoho duruk kamuhup.

³⁴Airoho duruk kamuhup aire ap homi Israel on en siag duruk on An den elehapdoho fesoukwag ulug de tahun hundomog de enenggik misham duruk kamuhup ulug wene ebe hundomog de baloho fehi on su higitdoho furebelug duruk kamuhup ulug hweag-umuk,” ulug hweag-etfag. Airoho hweag-etfag ma at Musa TUHAN en wene melaleg hweag-etfag ale anyo higitdoho debag.