Read Ninia Yali IMAMAT 17 Bible Online

IMAMAT 17 - Ninia Yali bible

IMAMAT 17

¹TUHAN en wene melaleg su Harun inim at omaliki inim ap homi Israel on mundoho inim enobam hweag-esowag ulug Musa obam wene foruk kwit,

³“Ap misig eke en An nobahet wam sapi mel domba mel, kambing mel waroho og-nirik waharuk kwit halug, wam aire o TUHAN Obam Sabo saleg on sokolma etmano en watuk kamuhup. Ne, aren lahe amumu en watuk halug de ap ai wam amep amumu en belapsimu unggum sahaloho fesi, ulug at ai ebe Allah omaliki on welaruhu fug.

⁵Airoho diyug ulug wene melaleg hweag-esebag aire iren wam TUHAN obahet waroho feik laul en ulug we yabukmu en hesangge watlug waharuk ale ai fahet de it ap homi Israel on halug de TUHAN Obam Sabo salegma neg walug waharuk kamag ulug. Iren wam anggerang owam fahet waroho feik laul ulug halug de iren eneitogdoho walug it imam enekit TUHAN Obam Sabo saleg on sokolma feik waharukmu watuk kamuhup.

⁶Ware folug it imam en wam amep anyo oko mezbah anyo ombandu kwe hilil-esauk karuhu. Hilil-esalug asei anyo yaldukmu amben en TUHAN endmama ahayeg hauk karuhu.

⁷It ap homi Israel on halug de hindik-hundig TUHAN obam dipdeg lit neg welamuhup. Ne, hiren we misiham ulug oho eke di wam su wam di angge su angge yabukmu wereg on mungguat jin enepe enggat deg lit enolok deg en ulug enobahet wam waroho fouk fug. Wene melaleg sure hole folug higitdoho duruk kwit neg welamuhup.

⁸Ap homi Israel on eke en oho ne it bohon famen hininim yugdoho hit Israel on henesahalimu wereg on en oho lahe wam waroho yaleg angge yal-utuk on ulug oho ne wam amu on fahet ulug oho,

⁹TUHAN obahet waroho feik watmin boruk halug de aren TUHAN Obam Sabo saleg on sokolma neg feik waharuk karuhu. Ne, aren lahe obale amumu en waroho foruk halug de at aire Allah omaliki on wereg de bohup fug.

¹⁰ Ne, ap homi Israel on oho, ne it bohon famen ap homi Israel on enesahalimu yugdoho wereg on oho eke en mep nauk halug de TUHAN en unggum obam fohu ne at aire at omaliki on de wereg bohu fug.

¹¹ Di angge su angge oluk wereg angge aire ebe oluk de mep fam neg wereg. Ai halug de TUHAN en uruk kwit de amep de mundoho abirangge At omaliki enesiag elehapdoho foukwag ulug mezbah fam etmano neg hililduk kamuhup. Ne, mep aire ebe oluk deg ma Aren enesiag elehapdoho foruk karuhu.

¹²Ai fahet it ap homi Israel on oho ne it bohon famen it Israel on enesahalimu yugdoho wereg on oho mep na fug ulug ili febag ai.

¹³Ap homi Israel on en oho ne it bohon famen it Israel on enesahalimu yugdoho wereg on en oho suwe bak di angge su angge amu on famen na alereg on senetil lauk kwit halug, aren amep wilibi folug de amep ai kwenang fam salduk karuhu.

¹⁴Di angge su angge mundoho oluk wereg angge aire ebe oluk de mundoho amep fam neg wereg, ai halug de TUHAN en uruk kwit de it ap homi Israel on halug de mep ai mundoho nauk kamuhup fug isi. Ap sa en eke wene duk fug ulug ili wereg on ai sahaloho duruk halug de at ai Allah omaliki on wereg de bohup fug.

¹⁵Ap homi Israel on oho it bohon on oho misig eke en di angge su angge amu wareg on oho olomene en senggeleg on oho ino eke nauk halug de, at ai asum ik ho dalug ebe inim kume waroho nangno degman mo obuk urukmu neg de ap anyo ebe horeg on atuk karuhu.

¹⁶Ne, aren lahe airoho duruk eleg halug de at duruk on onggo ambiangma hauk karuhu, isi ulug hweag-umuk,” ulug hweag-etfag.