Read Ninia Yali IMAMAT 18 Bible Online

IMAMAT 18 - Ninia Yali bible

IMAMAT 18

¹TUHAN en Musa miming-duruk kwit, wene melaleg su it ap homi Israel on hweag-esowag ulug obam febag, “An henakni TUHAN Allah nebe An neg.

³Hiren ap homi Mesir hit atam welatuhupmu etmano on oho ne ap homi o Kanaan on An den ketia og-heneplug lahukmu etma on oho it enobabut duruk ale ilit duk fug.

⁴An henakni TUHAN Allah nebe An neg. Ai halug de nawene lisu baleg wereg on melaloho og-hesauihik on ai neg fik furoho duruk kamek.

⁵ Henakni TUHAN nebere An. Ne, hiren An nawene lisu baloho og-hesauihik on ai inim wene melaleg hweag-hesauihik on ai inim fik furoho duruk kamek. Ne, hiren fik furoho duruk halug de henebe henoluk wendareg welamuhup,” ulug ebag.

⁶TUHAN en awene melaleg su hweag-esebag. “Hit henonggwareg henerekwi on misig eke inim hinim seberuk fug.

⁷Hakni ohwe aire at hakni en on ne haren de hisinga deg ma hakni ohwe inim seberuk fug.

⁸ Hat hakni ohwesi amu on misig eke inim seberuruk fam at hakni sebeloho fouk fug.

⁹ Hat herek hwele angge inim oho ne at eke isinga amu on famen henakni misig on hat hobam en hinim kul henepswa on halug oho ne amumu en kulswa on halug oho inim seberuk fug.

¹⁰Hombalosi inim seberuruk halug de hat honggwareg en henggali apdoho fahat dahun anggere inim seberuk fug.

¹¹Haren herek hwele angge henakni misig famen henesinga amu-amu on halug oho, henesinga misig famen henakni amu-amu on halug ohore at aire hat herek deg ma inim seberuk fug.

¹² Haren hakni erek inim oho ne hisinga ehe inim oho nisinga, noan deg ma ulug hinim seberuk fug.

¹⁴Haren hakni are ohwe ai hisinga hwe deg ma hinim seberuk fug.

¹⁵ Haren hamloho ohwe oho ahun oho howe ohwe inim oho seberuk fug.

¹⁶ Hwe haren hinim atam seberuruhup on omalik inim oho ombalo inim ulug ohore it aire hat indip on deg ma hinim seberuk fug. Ne, airoho duruk on aire mun kwasik on deg ma.

¹⁸Hat honggwareg hohwe oluk wereg kweleg at aut hat hwela fug.

¹⁹ Hwe misig amep lauk li aire at ebe mun emereg wereg ma at aireg kweleg inim seberuk fug.

²⁰ Haren ap amu on enohwesi inim seberuruk halug de airoho duruk ai fam hebe emeroho fahat-da fug.

²¹ Haren homalik misig eke kembu Molokh mot-durukmu waroho salukwag ulug og-esa fug. Airoho duruk halug de hakni TUHAN Allah anyo unuk sebeloho fehen ha no.

²² It ap-ap neg inim seberuruk ale aire Allah en At mun erim deg ma re hit ap-ap seberuk fug.

²³ Ap en halug oho homi en halug ohore wam, mene, di angge su angge fam inim seberuk fug. Airoho duruk ai fam de enebe emeroho fahat dauk.

²⁴It ap homi o Kanaan fam hit welam fug mu wereg on etma en airoho enebe emere fahat dauk katswa ma, hit o kwenang etma fam welamag ulug it muko wilibi fesehuk. Anggere hiren airoho henonggwareg emere fahat-da fug.

²⁵Hit ap homi Israel on halug inim ne it bohon famen hit henesahalimu yugdoho wereg on inim en de wene melaleg diroho diyug ulug hweag-hesauk on aire fik-furoho duruk kamuhup. Ite enobabut mun me nape on duruk katswa fam enanggwenang emeroho fousa ma, TUHAN en unggum enobam folug hit suma welamuhup fug ulug hweag-esauihik. Famen de hit de obabut mundoho siag on aire duk fug.

²⁸Hit owan etma wereg eleg kweleg ap homi TUHAN enapeleg on etma wereg ma TUHAN en muko wilibi fesehu hag hiroho Aren unggum henobam folug kwenang etma famen muko wilibi henobahauk no.

²⁹Hit heneluk deg, ap eke en mun me nape ale ai duruk halug de at ebe Allah omaliki on wereg bohup fug anyo.”

³⁰Aireg ma TUHAN en uruk kwit, “Ap homi Kanaan on hit etma owan wereg elegma wereg lit duruk katswa hagdoho duruk kamuhup fug. Hit henonggwareg en enobabut aireg on ai duruk fam emeroho fahat dehep ha no An den wene melaleg hweag-hesauk kahi on su fik-furoho duruk kamek, ulug An henakni TUHAN Allah en uruk kahi, isi ulug airoho hweag-esakin,” ulug hweag-etfag.