Read Ninia Yali IMAMAT 19 Bible Online

IMAMAT 19 - Ninia Yali bible

IMAMAT 19

¹ TUHAN en Musa fam hweag-utuk kwit, ap homi it enunggul unuk Israel on fam hweag-esowag ulug hweag-etfag: “An de henakni TUHAN Allah nobabut fano mun eneg welahimu hit oho fano eneg welemek.

³ An henakni TUHAN Allah nebe An neg deg ma An den wene diroho diyug suroho diyug ulug hweag-hesauihik hagdoho henemu hundomog en henaknisi henesingasi enalong boruk kwit henenggik nukoho sabit anggere An nobahet eneko folug welamek.

⁴ Henakni TUHAN Allah An namu neg deg ma hiren kembu apne wa fug. Hiren emas on mel perak on mel bosie on mel lale folug mot-duruk kamuhup fug.

⁵An den hit henobam fanoap henobahaukwag ulug wam waroho og-nutuk mu An den wauk kamag ulug halug de An den wene melaleg diroho duruk kamuhup ulug hweag-hesauihik anyo hagdoho duruk kamuk.

⁶Wam ai ware folug senggelduk kwit de ino halug de hit ebe waruhup salim ai oho likia oho nauk kamuhup fano neg. Famen de wam lenggareg etmano nukoho henahaneg angge inim wereg neg halug de na fug ale atsi mu ulug de felelengdoho indok yaliyug.

⁷Wam saliog angge aruhu on etma hit nahup halug de wam An nobahet waroho og-numuhup on ai An wahuk fug.

⁸Ap eke en wam aire An nobahet nobaharuk on anyo furebouk fug angge lenggareg saliog angge atuk on anyo nauk halug de siag duhu on ai unggum onggwareg en obam fahat dahu mu re An den at ai ebere An nomaliki on wereg de boruk karuhuk fug.

⁹ Hit heneyabukmu gandum a yaho on balduk kwit halug elan kwe wilibuhu on de mundoho baluk fug. Ne, gandum anggen mundoho baldil lalug foma embesehup on aire nikangge ondolik la fug.

¹⁰Ai higitdoho henakni TUHAN Allah An namu neg deg lahimu, heneyabuk anggur yabukmu etmano anggen atam mundoho balug en foma alinlan foruk on baldul ulug sombandoho la fug. Ne, anggen amu dahanoho wamburuk on oho wahup hayog. Etma re ap homi bohon inim enengge eleg on inim hwelowag ulug embeseruk kamuk.

¹¹ Yoholi angge weheg, seiale lal-enebeheg, henele en seiale enobam dopno eseheg, duk fug.

¹² Henakni TUHAN Allah An neg deg lahimu anggere, An nunuk sebeloho fehep ha alereg ma, hiren ap homi di angge su angge abug hweag-esalug henendama en de og-uruhuk fug boruk kwit halug de An nunuk hombuk baloho hweag-esa fug.

¹³ Hiren ap homi hininim wereg on fam henele omamneroho, Og-nimin, og-nimin, ulug lal-enebeheg, enengge deloho hweleheg duk fug. Ap eke en onggo og-nesowag ulug yabuk wutuk halug enenggik onggo folo-folo og-esa fug angge embeselug henenggik hup eke inim nohokup hayog.

¹⁴ Henakni Allah An neg deg lahimu An nobam henakoldoho nalong bolug wereg lit de ap homi enesanggo dahom on hururung enebeheg, inil hupnig on fahet eneyog dungdoho wat-dowag ulug helep yoma feheg duk fug.

¹⁵ Hiren it eke unggum enobam feheg, enawene bilinggeheg duruk kwit de demdoho neg bilingguruk kamuhup. Hiren ap dungon henakol enebeheg ap enenggik eleg on inibil aheg duk fug.

¹⁶Henakni Allah An deg lahimu hit henobabut duhup fam ap homi hinim welahep on eke waram no, ap homi henunggul unuk hiron inil hanim abug siagdoho saharuk fug.

¹⁷ It eke hinim minggirig hagdoho neg weregman siag dehep ha no[7] ai elehap debeselug de henelok bouk fug angge neg welamek.

¹⁸ Henakni TUHAN An deg ma ap homi en enehum kwe het enendama sebeleg lit foroho wereg halug hiren oho airoho enebeheg, henerim enebeheg duruk kwit welam fug. We henonggwareg henebe henenda hundig deg welahep ai hag it henori hinim wereg on etma enebe henenda hundig enepuk kamek.

¹⁹ An den wene diroho suroho duruk kamuk ulug melal-henepuk kahi on ai fik furoho duruk nu. Wam unggul unuk amu on en yohombuk on inim hwe on inim sebe enebuk fug. Ne, yabuk wirig misig on fam a orohole biren on yaruk fug. Sum hekel orohole biren on fam seleben deg on wan-duk fug.

²⁰Ap eke en hwele amingming angge on ap eke en hweimohweap dowag ulug de obam onggo baluhuk ulug abug neg hweag-utuk mu at onggo hunduruhuk ulug boruk on anyo en owan wa fug kweleg at hwele anyo akni atam on anyo inim seberuruk halug de inim unggum enobam og-esahup.[8] Aireg famen de hwele ai at ap ai amingming angge wereg ai en de enebe binggi enowaruhup fug.

²¹Ap ai en hwele ai inim seberuhupmu, duruk onggo ulug obalma re wam domba yohombuk on eke An nobam Sabo wirig on sokolma walug feik wamag.

²²Feik waharukmu ap ai en siag disi on ai An den elehapdoho foukwag ulug it imam en An den ap homi siag duswa on elehapdoho fesoukwag ulug duruk kwit wam domba ai waroho og-nomag. Airoho duruk halug An den ap ai en siag disi on ai elehapdoho fohuk.

²³Hit fobik o kwenang Kanaan fam kwik lahup deg halug de di ahan su ahan yaruhupmu anggen yihiku on etma tahun henahan duruk kweleg anggen yihiku on halug de saliog angge on boruk kwit nauk kamuhup fug.

²⁴Ne, tahun henahan welatlug ohwaneg on fam anggen yihiku on neg de An henakni Allah dang-napuk kwit An nobahet fohup.

²⁵Tahun foap on fam anggen etma yihiruk halug de hit nauk kamuhup. Henakni TUHAN Allah An at deg ma, An den diroho-suroho diyug ulug wene melaleg hweag-hesauk kahi on ai higitdoho duruk halug de henahan anggen etma humdoho yihiruk karuhu.

²⁶ Mep nenggeg, di hwal su hwal deheg duruk kamuhup fug.

²⁷ Henoruk henunggul hohoboroho baleheg, henombanisong oho hohoboroho baleheg duruk kamuhup fug.

²⁸Henakni TUHAN Allah An at deg ma henori waratuk mu henenda fu en henahap fam bal deheg henebe fam ambumbu debeheg duruk kamuhup fug.

²⁹ Henomaliki it hwelani angge sebeleg hag boruk kwit o kembu obam etma hambena duruk[9] kamag ulug feseik la fug. Hiren airoho duruk halug de henobam siahapdoho feheg, o hit welahepma etma kwasikdoho duruk on saha eheg duhu.

³⁰ Henakni TUHAN An at deg ma henenggik nukoho sabit angge An nobahet we kel waroho welaheg o bumbuk An mot-napuk kamuhupmu etma eneko feheg duruk kamuhup.

³¹ Henakni TUHAN Allah An at deg ma hein-og angge ap homi wareg on enaheime enembolma wereg lit hweag-esauk on ai en komo henebukwag ulug enekit la fug. Hit airoho lahup halug de henebe siag apdoho fahat dahup.

³²Henaknisi henesingasi enelong boruk kwit, leho feseheg duruk kamek. Henakni TUHAN An at deg ma henekol napuk kwit leho nobahakeg duruk kamek.

³³ Ap bog on hit henanggwenang fam wereg on siahap debeseruk kam fug.

³⁴Henakni TUHAN An at deg ma ap homi hiron fam debeseruk kahep ai hagdoho hiren it bohon etma fahet airoho debeseheg, hit henonggwareg henebe henenda hundig welahep hagdoho it ai inim airoho henenda hundig welaheg, duruk kamek. It ap bohon ai wereg hagdoho hit ohore airoho o Mesir welatuhup ale anyo henenda wenggel-hakiyug.

³⁵ Hiren di angge su angge ap homi eke enobam onggo waul ulug ilit-hauk angge meteran mel, anggin wal-hauk angge timbangan mel, waruk di on su on ilit-duruk angge takaran mel fam wal-heheg og-esauk hag og-esa fug angge henele en laloho duk fug.

³⁶Henakni TUHAN An at deg lit o Mesir en og-heneplug wilibik waharihik ai en de ilit angge meteran mel, anggin wal-hauk angge timbangan mel, waruk di on su on ilit-hauk angge takaran mel, demdoho on fam higitdoho wal-hauk kamuk.

³⁷Henakni TUHAN de An at deg ma diroho-suroho duruk kamuhup ulug hweag-hisihi ai mundoho fik furoho duruk kamuk, isi ulug hweag-esakiyug,” ulug, hweag-etfag.