Read Ninia Yali IMAMAT 2 Bible Online

IMAMAT 2 - Ninia Yali bible

IMAMAT 2

¹Ekenim uruk kwit, “Ap misig en TUHAN dang duruk kwit nauk angge TUHAN fahet feik watmin boruk halug, nauk on feik waharuk angge aire tepung mun fano on zaitun ahalue hililoho kemenyan hendali hag angge emberim kwe damuloho folug feik waharuk kamuhup.

²Nauk angge unuk wareg feik waharuk kamuhup on ai amben TUHAN ahummu fano amag ulug de, at walug waharuk on anyo en walug watlug it imam at Harun ambiangma on omano enekit og-esa waharuk karuhu. Og-esa waharukmu it imam etali em yabuk duruk on omano en, abirangge ai mundoho TUHAN obahet fehe ulug eneg dohore tepung omano enenggik misig en yinggiloho wa hagdoho walug zaitun ahalue anyo inim kemenyan hendali hag angge anyo inim waroho yaldukmu emberimmu omano yalduk kamuhup.

³Unuk wareg nauk angge feik waharuk angge foma etmanore it imam omano enobahet. TUHAN fahet feik waharuk on en minggiroho deg ma nauk angge unuk wareg aire mun horeg on welaruhu.

⁴Ne, unuk wareg feik waharuk angge ai lahe roti weratuk mu en weraho angge walug feik waharuk halug de, roti aire wilimdoho tepung al on en aham deg angge inim zaitun ahalue inim fituk angge ragi eleg angge wirig on halug neg. Ne, zaitun ahalue fam aroreg on halug oho fano.

⁵Ne, feik waharuk angge ai lahe roti ke doho weratuk mu en weraho angge halug de roti aire fituk angge ragi eleg angge tepung al on fam inim zaitun ahalue inim fam wirig on halug neg.

⁶Roti feik waharuk on anyo kut-kut debelug de zaitun ahalue anyo obam belabe foruk kamuhup.

⁷Ne, walug feik waharuk on ai lahe roti kuali fam osoho on halug, roti aire tepung al inim zaitun ahalue inim fam wirig angge halug.

⁸Roti airoho weraho on aire TUHAN obahet folug it Allah il hanim omano en waroho yaldukmu etmano feik lowag ulug og-esahup.

⁹Unuk wareg feik waharuk angge ai TUHAN ahummu amben fano howag ulug it imam en roti anyo foma minggiroho walug de waroho yaldukmu etmano abirangge ai TUHAN mundoho og-erehe ulug yale feik waharuk kamuhup.

¹⁰Roti aire nauk angge TUHAN fahet feik waharuk on en deg ma mun horeg laruhu. Ne, foma abirangge anyo it Allah il hanim enobahet welaruhu.

¹¹Kin ahalue inim fituk angge inim de TUHAN obahet feik wam fug alereg ma, unuk wareg TUHAN obahet on halug kin ahalue inim futuk angge inim, inim mangno duruk kamuhup fug.

¹²Di angge su angge kwenangma yatuk mu tahun hundig-hundig anggen balduk angge en keram on halug de TUHAN obahet dag feik waharuk kamuhup famen de waroho yaldukmu etmano yalduk kamuhup fug.

¹³Mayu aire hit inim Allah inim wene katukdoho wareg wereg ulug enegdoho deg ma unuk wareg hundig feik waharuk kwit de mayu foloho neg. Ai halug de di angge su angge abirangge feik waharuk angge aire mayu foloho neg.

¹⁴Ne, hiren lahe henegandum keram on anggen baloho TUHAN fahet feik waharuk kwit halug gandum ket sahalduk on ane ket iringguruk on ane halug neg walug feik waharuk kamuhup.

¹⁵Gandum aire zaitun ahalue emberimmu belaboho kemenyan hendali hag angge anyo emberim kwe folug walug waharuk kamuhup.

¹⁶Airoho walug waharukmu it imam omano en abirangge TUHAN fahet mundoho fehe ulug eneg aleroho gandum etano en minggiroho foma inim ahalue anyo inim kemenyan anyo abirangge inim yalduk kamuhup,” ulug hweag-etfag.