Read Ninia Yali IMAMAT 20 Bible Online

IMAMAT 20 - Ninia Yali bible

IMAMAT 20

¹TUHAN en it ap homi Israel on fam wene su hweag-esowag ulug Musa hweag-utuk kwit, “Ap homi hiron en oho ne it bohon famen henesahalimu wereg on en oho enomalik waroho kembu unuk Molokh ai og-utuk halug de ap homi abirangge en hwik helep fam waruhupmu ebe binggi wararuhu.

³Ap eke en omalik waroho kembu Molokh fam og-irik lauk halug de An nobam Sabo wirig on emeroho feheg, nunuk mundoho fano eneg welahi anyo sebeloho feheg durukmu An den ap ai unggum obam fohuk deg at ebe An nomaliki on wereg de bohuk fug.

⁴Ap anyo en lahe at airoho duruk famen ap homi en inil hupnoho hagdoho duruk kwit onggo unggum ohom fug angge wereg halug de,

⁵An den namu en ap ai ebe inim ohwe omaliki inim, ap homi at inim seberoho An embeselug kembu Molokh mot-duhup on inim unggum og-esahuk. Ne, it aire An nomaliki on de wereg bohuk fug.

⁶Ap eke en it hein og angge ap homi waratswa on eneheime inim seberuruk kwit enele matuk on fam komo ale hweag-nesowag ulug enekit lauk halug de An den ap ai obam unggum fohukdeg at ai An nomaliki on wereg fug bohuk.

⁷An henakni TUHAN Allah nobabut mun fano eneg welahi hag hit oho airoho welamuhup en henonggwareg en ohwale fahat dauk kamek.

⁸Henakni TUHAN An at deg lit hit henebe An nonggwareg fahet eneko henobaharihik mu, An nawene melaleg lisu baleg ai fik furebelug duruk kamek,” ulug, ebag.

⁹ TUHAN en wene melaleg su Musa obam foruk kwit, “Ap eke en akni oho isinga oho wip-enepuk halug unggum obam folug binggi waruhup fano. Ne, at wararuhu on aire onggwareg asiag onggo.

¹⁰ Ap homi Israel on en lahe it inunggul unuk misig Israel on enohwesi eke inim hambena duruk halug de ap ai inim hwe ai inim unggum enobam folug binggi enowaruhup.

¹¹ Ap misig eke en akni ohwe eke inim nohoruk halug de akni en on omamne fam siahapdoho forukmu, hwe ai inim ap inim unggum enobam folug binggi enowaruhup. Ne, it waramuhup on aire enonggwareg en duruk onggo neg waramuhup.

¹² Ap misig eke en eyamalhwe inim seberuruk halug de it enebe birenet hambena duhupmu enonggwareg en duhup on onggo unggum enobam folug binggi enowaruhupmu waramuhup.

¹³ Ap misig eke en lahe ap on amu on eke inim seberuruk halug de it enebe birenet siag mundoho me nape doho obabut mun nong hongdoho on duhupmu re it enesiag onggo unggum enobam folug enowaruhupmu waramuhup.

¹⁴ Ap eke en ohwe ahaloho et isinga et og-enepuk halug de aren ai mun duk fug alereg on deheikma ulug enebe henahanet indokma yal-enebuhupmu waramuhup. Enobabut airoho duruk on aire hit henesahalimu eke welaruhu hayog.

¹⁵ Ap misig eke wam mel, mene mel, hag angge inim seberuruk halug de ap ai inim wam anyo inim binggi enowaruhup.

¹⁶Hwele misig eke en wam, mene hag angge inim seberuruk halug de wam ai inim hwele ai inim binggi enowaruhup. Ne, it waramuhup on aire enonggwareg siag en waramuhup.

¹⁷ Ap on misig eke en at onggwareg erek inim oho, ne enakni misig famen enisinga amu-amu on halug oho, enisinga misig on famen enaknisi amu-amu on halug oho inim seberuruk halug de it ai mundoho duk fug alereg on dehesama ulug enonggwareg en duruk onggo hwelahup. Ne, it aire An nomaliki on wereg de bohuk fug.

¹⁸ Ap misig eke en hwele eke amep bigalem fam lauk on anyo lauk kweleg inim seberuruk halug de it ai An nomaliki on wereg de bohuk fug.

¹⁹ Ap misig eke en ombalo inim seberuruk halug de iren kwasikdoho duruk ai onggo enebe birenet hwelahup neg.

²⁰Ap misig eke en akni aut oho isinga aut oho inim seberuruk halug aren akni aut unuk sebeloho forukmu, it welamuhup deg waramuhup hwili etma enomalik endag da fug angge welamuhup, ulug hwe ai et ap ai et unggum enobam fohup.

²¹ Ap misig eke en are ohwe bal-dauk halug de aren are mabenapdoho fohureg mundoho duk fug alereg on ai duhumu re, welamuhup deg waramuhup hwili en de enomalik endag-enebuhup fug,” ebag.

²²TUHAN en uruk kwit, “An den og-heneplug lahukmu o Kanaan etma en muko wilip-henebuk nore An den nawene melaleg inim diroho diyug suroho diyug ulug inim hweag-hesauk kahi on ai furoho hole folug duruk kamek.

²³It ap homi o etma wereg on en de An nahummu me nape ale neg duruk en hit it enobam etma kwik lowag ulug it muko wilibi feserihik. Anggere hiren it ap homi etma eneitogdoho wereg ale inim iren duruk katswa ale duruk on inim enahut wal-heheg duruk kamuhup fug.

²⁴An henakni TUHAN Allah ap homi di inunggul unuk su inunggul wereg on famen hit eneko henobaharihik on anyo deg ma, kwenang ebe mundoho hesilig lit di anggen su anggen humdoho wereg ma etma re hit og-hesahuk ulug abug hweag-hesauihik mu re hit henonggwareg henengge amag ulug og-hesahuk.

²⁵Aireg ma hiren wam di angge su angge nauk on inim nauk eleg on inim ai fik furoho aham deberuk kamuhup. Ne, wam ousa wereg on de nauk kamuhup fug. Wam aire An den ousa on irihik mu re hit nauk halug de henebe emet atuk kamuhup.

²⁶An henakni TUHAN Allah An at deg ma An nobabut fano horeg welahi hag An nobahet hit inim fano eneg welamuhup. Hit de ap homi inunggul unuk amu on famen An nonggwareg nangge welamag ulug eneko henobaharihik.

²⁷Ap en oho homi en oho ap homi waratswa on eneheime inim seberuruk kwit inim nohoruk halug de ap aire helep hwik binggi waruhup. Ne, at wararuhu aire at onggwareg asiag fam, isi ulug, hweag-esakiyug ulug,” hweag-etfag.