Read Ninia Yali IMAMAT 21 Bible Online

IMAMAT 21 - Ninia Yali bible

IMAMAT 21

¹TUHAN en diroho-suroho duruk kamuhup ulug melaleg su it Harun inim at ambiangma on inim en duruk kamuhup ale hweag-esowag ulug Musa hweag-etfag. Hweag-utuk kwit, “It imam halug de at isinga, akni inim omalik inim are inim waratuk halug neg de aren ap homi sal-enepukmu lauk karuhu famen de aren ori-erekwi amu on sal-enepukmu lahumu ebe emere fahat dahu hayog.

³At erek ahun owan hwelauk eleg on famen o at inim misigmu wereg on halug neg de saldukmu lauk karuhu.

⁴Aren ohwe owesi erekwi wareg sal-enepukmu lahu fam ebe emere fahat dahu hayog.

⁵ Ap imam en halug de fong watuk kwit ulug aren oruk foma fil keheboroho baleheg, ombanisong baleheg, unggul morog-morog angge fam onggwareg ahap bale fahat-deheg duhu hayog.

⁶At de An nobahet nauk angge waroho og-nirik waharuk karuhu mu re ebe fano eneg horeg wereg lit duruk karuhu. At ebere An nonggwareg nangge eneg on deg ma An nunuk saharuhu hayog.

⁷It imam aire An nonggwareg nangge deg ma iren enohwesi homi hambena duruk eleg on inim ne hwe ap ahap ha fug angge wereg on inim ap en oko minggiroho embeseswa fug on inim halug neg og-enepuk kamuhup.

⁸Henakni TUHAN nebe An at deg ma An nebe nonggwareg nobabut fano eneg horeg welahi hag An nomaliki inim enobabut fano eneg horeg welamag ulug eneko fahat dauihik mu it ap homi Israel on en halug de it imam on aire An nobahet nauk angge waroho yal-nutuk mu it aire at onggwareg fahet eneko fahat dasi on ulug fag-duruk kamuhup fano.

⁹Ap imam ahaloho eke hambena duruk on atuk halug de aren akni sebeloho forukmu indokma yaluhupmu wararuhu fano.

¹⁰At it imam enowe leho on Imam Agung aire sum log asum it imam en wan-duruk on anyo wan-debelug ahalue unggulmu hililoho unduhuk foruhukmu re aren fong waroho ulug asum fiogdoho embeseheg, oruk anggen soaleheg duhu hayog.

¹¹At aire ap wareg on ai akni oho onggwareg isinga oho deg kweleg famen de aren An nobam Sabo wirigmu embeselug wilibik lahu fam o emet amnore o An Nobam etman wiliplug ap wareg wereg ma etma kwik lahu hayog. At ebere an nonggwareg fahet eneg welamag ulug og-nutswama re aren ebe emeroho fahat-dahu hayog.

¹³At de homi sohwe on halug inim, hwe ap en oko embeseswa on inim, ite hwe hambena duruk katsi on inim eke og-enebuhu hayog. We hwele duhum on ap inim nohosi fug on at unggul unuk on famen en neg hwelauk karuhu.

¹⁵Henakni TUHAN nebe An at deg ma An den neg at aire imam enowe leho on Imam Agung welamag ulug eneko firihik. Ai halug de aren wene melaleg su sahalduk halug de at omaliki enobabut eneg horeg welam on ai enebe emet amuhup,” ebag

¹⁶At TUHAN en wene su at Harun hweag-irik lowag ulug miming-duruk kwit, “Hat hambiangma on en eke ebe fam ahapmale deg on en halug de nobahet waroho yal-nutuk mu etmano og-nirik waruhu hayog. Wene aire mundoho welaruhu ale fahet.

¹⁸Ap eke An nobahet waroho og-nirik waharuk on halug de at ebe fam il hupnig eleg, eyog holureg fug, orohole fam aik baleg fug ebe abirangge fanoroho ahapmale eleg on halug,

¹⁹eyog siag on, enggik holu on,

²⁰ambol kuno deg on, eyog horog on, il sihilig on, ahap fam yebil angge wereg on, ogwali oho on en halug de An nobahet walug og-nirik waharuk karuhu fug.

²¹At Harun ambiangma en ondoho on halug de it enebe fam enahapmale deg on en An nobahet nauk angge waroho yal-nirik waharuk kamuhup hayog.

²²Ai famen de iren nauk angge mun hik-horeg on inim we horeg on eneko foruk on inim An nobahet oko feik waharuk on etma nauk kamuhup fano.

²³Henakni TUHAN nebe An at deg ma, ap ai ebe fam ahapmale deg ma aren sum kain o Ambe Enegma hwiliroho boreg on anyo aluluk horogma aik lauk karuhu hayog. Di angge su angge o ilonggoma waroho yalduk kwit duruk angge etma An den eneko fahat dauihik mu, ap ai en An nangge eneko wereg angge etma fam emere fohu hayog, isi iyug ulug, hweag-esa lowag,” ulug hweag-etfag.

²⁴Wene melaleg diroho-suroho duruk kamuhup ulug ai at Musa en at Harun inim at omaliki inim it ap homi Israel on inim hweag-esebag alere ai.