Read Ninia Yali IMAMAT 22 Bible Online

IMAMAT 22 - Ninia Yali bible

IMAMAT 22

¹TUHAN en diroho-suroho duruk kamuhup ale ulug su it Harun inim at omaliki inim hweag-esowag ulug Musa miming-duruk kwit, “Henakni TUHAN nebe An at deg ma An nunuk mun fano eneg horeg wereg on anyo siaho fehep halereg anggere it ap homi Israel on en nobahet eneko feik waharuk angge etma re fik-furoho neg deberuk kamuk.

³Henakni TUHAN nebe An at. Ai halug de ap misig hit henambiangma on ebe emereg wereg lit en it ap homi Israel on en eneko folug waroho og-nirik waharuk angge etmano fam horogma aik lahureg mezbah fam etmano waroho yaluhu fug. Wene melaleg su re hindik-hundig duruk kamuhup.

⁴It Harun ambiangma on eke ouk ahap fam burag hag duruk kwit halug oho, ahap enggalimu on ouk deg lit muluna hag angge wilibik waharuk halug ohore at ebe owan buhundeg hweag-om eleg kweleg aren di angge su angge An nobahet feik waharuk angge etma eke nahu hayog. Ap imam misig eke en ap wareg fam bal-hauk halug inim, ahap enggalimu on famen ahalue muluna wilibik waharuk halug inim,

⁵wam oho ap oho emereg wereg kweleg bal-esauk halug de ap ebe emereg welaruhu.

⁶Ap imam misig eke indip ke famen at emereg wereg halug, deg kweleg at emereg weregman neg mo obuk uruk karuhu. Ne, mo mundoho obuk uruk men at ebe kume wareg eleg halug de aren wam An nobahet foruk on etmano nahu fug.

⁷Ite mo obuk uhumu at ebe mundoho buhun dobahat dalug neg de ai at nauk kamag ulug on deg ma nahu fano.

⁸Henakni TUHAN An at deg ma, ap ai en wam amu waratuk on inim olomene en senggelduk on inim ai ino lohon nahu hayog. Ne, at nahu halug de at ebe emereg on aruhu.

⁹Henakni TUHAN nebe An at, ne it aire An nonggwareg fahet eneko fahat dauihik mu re it imam mundoho en halug de An den wene melaleg mun eneko folug diroho-suroho duruk kamuhup ulug hweag-esauk kahi on ai fik-furebelug duruk kamag. Ne, it airoho duruk kamuhup fug halug iren TUHAN Nawene melaleg mun horeg on ai sahaloho fohup halug de enebe waramuhup.

¹⁰Ap homi An nobahet folug og-nirik waharuk angge aire ap amu on it imam inim enobam misigmu on halug oho ne iren yabuk onggo baleg wit-enepuk on halug oho eke nahup fug. We it imam on enahain elekwe on neg nahup fano.

¹¹Famen de it enamingming angge it imam on en enonggwareg ene uang fam onggo balswa on halug inim ne it enobam endag-atswa on halug inim neg de imam on en nauk kamag ulug wereg angge ai nahup fano.

¹²It imam enahwelani ap imam duruk fug on we hesangge on inim hwelauk halug de An nobahet foruk angge aire nahup hayog.

¹³Famen de it imam on enahwelani sohwe wereg on halug inim, omalik eleg angge minggiroho embeseswa ma akni isinga enobam wahasireg wereg ma akni en hwalduk on halug neg de at akni fil atuk on etma nauk karuhu. We imam enahain elekwe on neg An nobahet foruk angge etma nauk kamuhup fano.

¹⁴Ne, at eke imam ahain elekwe on fug famen fetagdoho nauk angge An TUHAN nobahet feik waharuk on etmano nauk halug, aren obalma imam dua puluh persen eke inim dopnoroho og-esahu.

¹⁵An nobahet eneko feik waharuk angge etma imam en emeroho fohup hayog.

¹⁶Henakni TUHAN nebe An at, An den neg og-nirik waharuk angge etma eneko ferihik mu re ap we hesangge on en nowag ulug embesouk fug. Embeseruk fam de ap siaho forukmu at ebe fam unggum atuk karuhu,” ebag

¹⁷TUHAN en it Harun inim omaliki inim wene melaleg diroho suroho diyug ulug hweag-esowag ulug Musa hweag-utuk kwit, “Ap Israel on en halug oho it bohon famen oho hit hinim yugdoho wereg on halug oho at ele diroho welaruhuk ulug uruk ale fahet wam waroho An yal-nitmin ulug halug inim, ne we enda fano en waroho yal-nitmin ulug inim duruk kwit halug An den iren feik waharuk angge ai wowag ulug halug de wam ebe yohombuk on ahapmale eleg on halug neg og-nirik waharuk kamuhup.

²⁰ Wam ahapmale wereg on de An TUHAN en wahuk fug anggere waroho og-nirik wamuhup hayog.

²¹Ne, ap misig eke An nobahet at ele diroho duhuk ulug isi ale higitdoho anggerang owam og-nirik waharuk halug inim ne enda fano fam waroho og-nitmin ulug duruk kwit halug inim de An den iren foruk angge ai wowag ulug halug de wam ahapmale eleg on neg og-nirik waharuk kamuhup.

²²TUHAN nobahet feik waharuk kwit halug de il hupnig on inim owag somboleg on inim, ahap yebil on inim, bot muluna wereg on halug ahap fam senggelkel on halug inim, buga wereg on halug inim wam aireg on etma re mezbah fam etma waroho yal-nirik wamuhup fug.

²³Hit henenda henahayeg fam og-nirik waharuk on aire we wam obabut hwaleg eleg on halug fano neg, famen de hit henele uruk kwit diroho duhuk ulug uruhup ale fahet wam aireg on og-nirik waharuk halug de aireg on etma wahuk fug lit deg.

²⁴TUHAN nobahet feik waharuk kwit halug de wam ogwali siagdoho sahaleg on inim, baleg on inim, ilonggoma en filik atsi famen eneg deg eleg on halug inim oko hwik-esausa on inim halug og-nirik wamuhup fug. Aireg on de hit henanggwenang fam eke aruhu hayog.

²⁵Wam endetuk on ap bohon en og-hesausa on halug de wam ai ahapmale wereg on hag deg ma An den wahuk fug anggere nauk angge on ulug An og-nirik wamuhup hayog.

²⁶Wam sapi omalik inim, domba omalik inim, kambing omalik inim ket endetuk on halug de isinga inim nukoho sabiren welatlug neg de wam ai nauk angge fahet ulug og-nirik waharuk on wauk karuhuk.

²⁸Nukoho misig on fam wam sapi isinga inim domba isinga inim omalik et seberoho waroho feik wamuhup hayog.

²⁹Hiren lahe TUHAN dangdoho og-umul ulug og-nirik waharuk kwit halug de hiren og-nirik waharuk angge ai wowag ulug awene melaleg wereg ale higitdoho duruk kamek.

³⁰Ai salim watuk on aire we ai salim neg munmiroho nakiyug. Likia fahet lohon ulug dorangge eke fouk fug,” ulug, ebag.

³¹TUHAN en uruk kwit, “Henakni TUHAN nebe An at deg ma An den Naweme melaleg diroho-suroho uruk kahi on furebelug duruk kamek.

³²Henakni TUHAN nebe An neg. An den neg hit eneko horoho henobaharihik mu hit ap homi Israel on mundoho en de An henakni mun nobabut fano eneg horeg on ulug boruk kwit nunuk siahapdoho fouk fug.

³³Henakni TUHAN de nebe An. An neg hit henakni Allah amag ulug o Mesir en og-heneplug wilibik waharihik ai isi ulug hweag-esakiyug,” ulug hweag-etfag.