Read Ninia Yali IMAMAT 23 Bible Online

IMAMAT 23 - Ninia Yali bible

IMAMAT 23

¹TUHAN en wene melaleg humdoho Musa og-utuk kwit

²wene kabog-dul en ulug unduhuk folug kabog-duruk on anyo fam kabog-duruk kamuhup ale ulug melaloho og-etfag.

³ Nukoho folfalik en wirihig ai yabuk duruk ale fahet wereg ma yabuk duruk kamuhup famen, nukoho sabit angge aire nukoho Sabat, nukoho kel watuk on ai TUHAN fahet on eneko wereg. Ma re nukoho ai salim hit mundoho wene kabog-dul en ulug dulug seberoho kabog-duruk kamuhup, yabuk duruk kamuhup hayog.

⁴Nukoho leho hari raya TUHAN en momale febagdeg nukoho momaleg on fam enele unduhuk foukwag ulug hweag-esebag on de su.

⁵ Nukoho Paskah esetuk salim TUHAN along bolug leho foruk duruk kamuhup on aire, bigalem misig, tanggal lima belas fam mo obuk ik lauk kweleg etano indip duruk kamuhup.

⁶ Likia tanggal lima belas salim de Nukoho Roti fituk angge ragi eleg angge nauk on anyo fahet ebetuk kamuhup. Ne, nukoho sabiren hunduko aire hiren roti fituk angge fam weraho on nahup hayog.

⁷Nukoho sabiren eta fam de hiren nauk angge on TUHAN obahet on folug og-utuk kamuhup. Nukoho keram on fam inim ne sabiron fam inim de wene kabog-dul en ulug duruk kwit wene kabog-duruk kamuhup, ne hiren yabuk anggin on duruk kamuhup hayog.

⁹Ne, hit o kwenang TUHAN en og-hesahumu etma mundoho aik lahup deg, ne hiren gandum anggen yihig keram on baluhup deg de imam enekit walug wamuhup.

¹¹Nukoho Sabat anyo en ombolim fam de TUHAN en hit henobam enahayeg henebukwag ulug de, imam en gandum anyo unuk wareg unug-halug og-utuk karuhu.

¹²Hiren nukoho gandum ai og-utuk salim aire waroho yal-utuk on fahet de, domba yohombuk misig umur satu tahun deg on ne ahapmale mel eleg on og-utuk kamuhup.

¹³Hiren nauk angge on obahet og-utuk kwit de, tepung dua kilogram zaitun ahalue nim meneneg angge og-utuk kamuhup. Og-utuk kamuhup angge ai amben en de TUHAN endama ahayehap deberuk kamuhup. Eta inim seberoho re anggur ahaik de satu liter en nim og-utuk kamuhup.

¹⁴Hiren foruk angge ai TUHAN og-irik wam fug angge duruk kwit de, gandum ai oluk angge ulug oho, iringgoho oho, werako roti atuk on oho hit dam na fug. Wene melaleg aire hit inim hit henambiangma on en inim li mundoho-mundoho etma fam dipdoho neg duruk kamuhup.

¹⁵ Nukoho Sabat anyo mundoho debelug indip duruk li, ne hiren gandum anggen baleg keram on anyo oko TUHAN og-utuk li en de hiren Minggu sabiren hoporoho wenaharuk kamuhup.

¹⁶Hiren nukoho Sabat anyo sabit angge dulug nukoho 50 on fam de, hiren TUHAN obahet foruk on amep wereg eleg angge on og-irik waharuk kamuhup.

¹⁷Hit henahain elekwe domog en TUHAN unuk waroho obam unug-halug og-utuk on ulug de, roti biren heg foruk kamuhup. Roti eta amu domog de tepung dua kilogram al on fam fituk angge folug wiroho re, sure kwenang fam en anggen keram on baleg ulug TUHAN og-utuk kamuhup.

¹⁸Roti eta nim seberoho re hit ap homi Israel on en de domba umur satu tahun deg on sabiren inim sapi yohombuk ket sauwe on misig nim, kambing biren nim og-utuk kamuhup. Wam eta ebe domog de enahapmale eleg on neg, ebe TUHAN obahet waroho og-utuk on ulug og-utuk kamuhup. Ai inim de amep wereg eleg angge on og-utuk on ulug inim anggur ahaik og-utuk on ulug inim foruk kamuhup. Foruk kamuhup angge ai amben en de TUHAN endama ahayehap deberuk kamuhup.

¹⁹Eke henesiag elehapdoho henobaharuk on fahet de kambing yohombuk on misig eke fohup ne anggerang owam fahet de domba yohombuk biren angge umur satu tahun deg on waroho fohup.

²⁰Roti mel domba biren mel etare imam en TUHAN obahet unuk waroho unug-halug og-utuk on ulug og-iruhu. Ne, etare it imam enengge on atuk karuhu. Folug og-utuk kamuhup angge on etma re ebe eneg horeg on welaruhu.

²¹Nukoho ai salim de hit henebe seberoho wene kabog-dul en ulug kabog-duruk kamuhup, ne hiren yabuk anggin duruk kamuhup hayog. Wene melaleg aire hit henambiangma on en li mundoho-mundoho etma fam etma ebe di kwe su kwe welamuhup kwe etman dipdoho neg duruk kamuhup.

²² Hiren anggen balduk kwit halug de yabuk elan kwe wilibig on etma baluk fug, ne balduk men indipmu baloho loloho wamburuk on etma nikangge andog dik la fug. TUHAN aire hit henakni Allah deg ma re, etma ap homi enenggik eleg on nim ap bohon fahet nim embeseiyug.

²³Tanggal satu bigalem sabit on fam de nukoho eneg on kel wat-dauk salim ulug ebetuk kamuhup. Nukoho ai fahet de bohweap trompet ele furoho indip duruk kamuhup, ne hiren de wene kabog-dul en ulug dulug wene kabog-duruk kamuhup.

²⁵Nauk angge on TUHAN obahet ulug og-utlug hiren nukoho ai salim yabuk anggin on duruk kamuhup fug.

²⁶ Tanggal sepuluh bulan tujuh nukoho aire tahun hundig-hundig etmano fam ap homi Israel on enesiag elehap duruk salim ulug duruk kamuhup salim. Nukoho ai salim de hit henebe siburu henambilik hweang wereg lit wene kabog-dul en ulug fouk deheg, ne nauk on omano folug TUHAN og-ereheg, duruk kamuhup.

²⁸Nukoho ai salim de hit henesiag elehapdoho foruk salim deg ma yabuk duk fug. Hit henebe henakni TUHAN Allah il hanim etma henesiag apelehapdoho henobahaku anggere.

²⁹Ap homi eke en nukoho ai salim di angge su angge eke nauk halug de ap ai Allah omaliki on wereg de bohup fug.

³⁰Ap eke en nukoho ai salim yabuk humon duhu halug de TUHAN amu en unggum waratuk on og-uruhu.

³¹Wene melaleg aire hit henambiangma on en o di kwe su kwe wereg lit etma duruk-wauk kwit welamuhup.

³²Mo obuk uruk li indip duruk li em bigalem ai tanggal sembilan wereg kweleg indip dulug de tanggal sepuluh mo obuk ik lauk karuhu huli etma re, hiren nukoho Sabat anyo, nukoho kel wat-dauk salim ulug wereg on anyo fahet ebetuk kamuhup. Nukoho ai hunduko re hit siburu henambilik hweang welamuhup.

³³Soni O Sabo aire bigalem sabit angge tanggal lima belas wereg kweleg indip duruk kamuhup, ne ai fahet duruk men neg de nukoho sabiren hunduko welamuhup.

³⁵Nukoho sabirenam eta fam nukoho misig hundomog etma nauk angge TUHAN fahet feheg neg duruk kamuhup. Ne, nukoho sehelet misig angge mel, nukoho ligin angge mel etare abirangge seberoho wene kabog-dul en ulug deheg, nauk angge on TUHAN obahet og-ereheg, duruk kamuhup. Nukoho ai salim yabuk anggin on duk fug.

³⁷Aire nukoho wene unduhukmu duruk on fam duruk kamuhup en ulug TUHAN en de haren hele unduhuk feik lag ulug ebag on. Nukoho eta hiren wene kabog-dul en ulug deheg, nauk angge on og-ereheg, waroho yal-angge yal-ereheg, amep wereg eleg angge on og-ereheg, endetuk angge on waroho og-ereheg, anggur ahaik on og-ereheg, dulug nukoho ai salim duruk on ulug etano duruk kwit de hiren TUHAN along bolug leho foruk kamuhup.

³⁸Hiren airoho duruk kwit ebetuk kamuhup on etare nukoho Sabat we salim on fahet duruk kahep on etmano fam dopnoroho fahet, ai halug de hiren og-utuk kamuhup on etma oho re nin salim og-utuk kahep on etmano mangno angge fahet, hiren henele unduhuk folug obalma onggo foruk kwit ai oho ite hiren henenda fano en og-utuk on eta oho airoho neg.

³⁹ Anggen mundoho balug tanggal lima belas bigalem sabit on fam de, hiren wene kabog-duruk kwit ebetuk men neg nukoho sabiren welamuhup. Nukoho keram on fam inim nukoho ligin on fam inim de nukoho eneg on deg ma kel wat-dauk kamuhuhup.

⁴⁰Nukoho keram on ai fam de hit heneyabukwe etman e anggen mun fano on dahanuhup. Ne, eke e palma enggela mel, e enggela heikdoho belabeg on enggik mel, baluhupdeg hiren henahayegdoho henakni TUHAN Allah along bolug leho foruk kwit mot-duruk kamuhup.

⁴¹Nukoho ai ebetuk ale re nukoho sabiren hunduko duruk kamuhup. Wene melaleg aire hat hambiangma on en di li em su li em duruk wauk kwit welamuhup.

⁴²Nukoho sabiren fam de hit henunggul unuk Israel on abirangge re o sabo enggelangge fam wiroho welamuhup,

⁴³Aire it henomaliki si en hauk kwit ap homi Israel on At TUHAN en o Mesir en og-eneplug wilibik waharuk li re, TUHAN en ap homi Israel on o sabo buhun-buhun angge fene welamek ulug hweag-esasi ulug enoluk amag ulug duhup.

⁴⁴Airoho ap homi Israel on en TUHAN along bolug leho foruk kwit duruk kamuhup ale ulug wene melaleg ap homi Israel on en duruk kamuhup ulug Musa en hweag-esebag.