Read Ninia Yali IMAMAT 24 Bible Online

IMAMAT 24 - Ninia Yali bible

IMAMAT 24

¹TUHAN en it ap homi Israel on wene melaleg su hweag-esowag ulug Musa hweag-ituk kwit, “An Nobam Sabo salegma etmano esahe kweale forukmu ambogbag duruk kwit neg welamag ulug zaitun ahalue mun il wirik on inim mun fano on inim An Nobam Saboma fahet walug manu.

³Walug waharukmu at Harun en lampu etmano fanoroho hwaloho At TUHAN ebe enam aik waharukmu ulug sum kain boreg on dag fil o Ambe Mun Amu Enegma Allah en diroho henebuhuk ulug wene sali waroho og-hesauihik on anyo yohwareg wereg ma etma hubet inim hupmu inim hwaloho foruk karuhu. Wene melaleg aire hundig-hundig airoho neg duruk kamuhup.

⁴At Harun en lampu etma An Nobam Sabo salegma hundig ambogbag duruk kwit neg welamag ulug lampu eyog emas mun fano on fam hwaloho foruk karuhu,” ulug ebag.

⁵ Ekenim uruk kwit, “Tepung mun fano on 12 kilo en walug, kilo misig famen de roti duk on nesanggo en wiriyug.

⁶Wiri folug e meja emas fam dopnoroho wirig angge An Nobam Sabo ilonggoma wereg angge ai emberimmu roti weraho anyo erareg biren fam folug, erareg misig fam de roti ebe folfalik en heheg feiyug.

⁷Airoho folug de roti ai TUHAN fahet wereg ulug eneg deg lamag ulug kemenyan orohole mun finik fano on roti etmano fene hundomog feiyug.

⁸Nukoho sabit salim de roti eke An Nobam Sabo salegma etma ket werako on feik kuruk kamuhup. Wene melaleg aire it ap homi Israel on en hundig-hundig duruk kamuhup.

⁹ Roti etma re Nobam feik waharuk on it imam on enobahet famen TUHAN og-irik waharuk on mun eneg horeg on deg ma re roti aire at Harun ahain elekwe on fahet, iren obale mun horeg enegma etmano en nauk kamuhup,” ulug ebag.

¹⁰It ap homi Israel on enobam sabo salegma etmanore ap misig eke akni re o Mesir on ne isinga re it Israel on unuk Selomit hun Dibri amloho it inunggul unuk Dan on famen welatfag. Nukoho misig fam de ap anyo inim it ap homi Israel on inim yeik yapuk kwit Allah hururung debag. Airoho hururung debag ma it ap homi Israel on en walug Musa akit feik watfagdeg,

¹²TUHAN en at fam nangginig on debeiyek hweag-nesamisi ulug nangno-hauk kwit welatfag.

¹³Airoho wereg ma TUHAN en Musa hweag-utuk kwit,

¹⁴“Ap ai walug o sabo salegman dag fil wilibik lalug de it ap homi aren Allah hururung durukmu enesanggo holehesa on halug de ap ai demdoho siag deheik enoluk amag ulug de enemu hundomog en enenggik ap ai unggulmu folug, ap Israel on mundoho en helep fam hwikdoho ware fohupmu waramag.

¹⁵Airoho debelug ap homi Israel on mundoho fam wene unduhuk foruk kwit, Ap eke en Allah hururung duruk halug de ambiangma re,

¹⁶unggum obam folug ware foruk kamuhup. Ap sa en oho TUHAN hururung duruk halug de it ap homi Israel on mundoho en helep fam hwikdoho ware forukmu waratuk karuhu. Wene melaleg lisu baleg on aire it ap homi Israel fahet inim ne it bohon famen Israel on enesahalimu wereg halug inim en duruk kwit neg welamuhup.

¹⁷ Ap eke en ap watuk halug de at unggum obam folug waruhup neg.

¹⁸Aheime wereg on inim halug de aheime wereg on inim wut-wut atuk karuhu ulug awene indip meleleg wereg ma ap en ap eke amu on en enowam watuk halug aren obalma og-utuk karuhu.

¹⁹Ap misig eke en are inim suahal uruk kwit anggin obam fesi halug de at ai fam oho airoho debehup.

²⁰ Aren lahe owag sombo debesi halug de aroho owag sombole fohup, ne aren are il foma sihili fesi halug de aroho il foma fil sihili fohup. Aren lahe ap watuk men aeg langgoroho watsi halug de aroho aeg langgoroho waruhup. Aren lahe ap amu on fam nunggwe ale debesesimu enebe fam ouk on eke atsi halug de at ai obam oho aren disi ale etaroho neg debehup.

²¹Ap eke wam watuk halug de wam neg obalma foruk karuhu famen de ap watuk halug de aroho unggum obam folug waruhup.

²² Henakni TUHAN nebe An at deg ma wene melaleg aire ap homi mundoho fahet inim it ap homi bohon famen hinim yugdoho wereg on inim enobahet, isi ulug hweag-esakiyug,” ulug hweag-etfag.

²³Hweag-etfag ma at Musa en wene etmano it ap homi Israel on fam mundoho hweag-esebagdeg, ap Allah hururung debag on anyo walug o sabo salegman dag fil wilibik lebagdeg helep fam hwikdoho watfag ma waratfag. Airoho debag ai fam TUHAN en Musa hweag-etfag ale anyo higitdoho neg debag ai.