Read Ninia Yali IMAMAT 25 Bible Online

IMAMAT 25 - Ninia Yali bible

IMAMAT 25

¹ Dom Sinai emberimmu en TUHAN en Musa ele hweag-etfagdeg ebe miming-duruk kwit:

²“Ap homi Israel on o An den og-esahukmu etma kwik lahupdeg hiren henobabut diroho TUHAN leho foruk kamuhup ulug wene melaleg diroho-suroho duruk kamuhup ulug su hweag-esa lakin. Hundig-hundig tahun sabit on waharuk halug de di angge su angge yatul en ulug yabuk wituk kamuhup hayog.

³Tahun folfalik en deg li re hiren heneyabukmu a yareheg, anggur yabukmu enggik deg debeheg, henanggwenang fam en anggen kabog deheg duruk kamuhup.

⁴Famen de tahun sabit angge fam neg de TUHAN obahet eneko foruk kamuhup. Airoho folug heneyabukmu a yareheg, anggur anggen baleheg duk fug. Tahun ai fam de kwenang we embesehupmu welaruhu.

⁵Tahun ai fam de kwenang yabuk esap foruk salim deg ma re gandum amu wilipuk on inim, e anggur enggik baluhup fug on en inim ulug ohore hiren baloho kabog-duhup hayog.

⁶Aireg famen de kwenang ai en hit inim, hit henamingming angge inim, hiren ap onggo baleg yabuk wit-henepuk on inim, ap bohon famen hit henesahalimu wereg on inim, fahet anggen yig-henepuk karuhu.

⁷Ai en henowam endetuk kahep on fahet inim, hit henobam wam maro on inim fahet kwenang ai famen anggen yihirukmu nauk kamuhup,” ulug ebag.

⁸Ekenim uruk kwit, “Tahun henenggik sabiren anyo neg wenaharuk men seberoho 49 tahun atuk karuhu.

⁹Airoho wenaharuk men neg bigalem sabit on en tanggal 10 fam nukoho ap homi enesiag elehapdoho foruk salim anyo atuk halug, hit henobam etma abirangge bohweap trompet furukwag ulug hweag-esakiyug.

¹⁰Tahun 50 on ai eneko folug ap homi fam wene unduhuk foruk kwit tahun sure tahun ap homi di angge su angge fiselaroho feseruk salim ulug unduhuk folug, tahun ai fam de kwenang di angge su angge onggo hundutswa halug de it enonggwareg fam oho ne iren ondohoma on fam oho fiselaroho og-eseheg, ap sa en enamingming angge welamag ulug onggo bal dasi halug de onggwareg akni isinga enobam fiselaroho og-eseheg duhup.

¹¹Hit heneyabuk wiroho yaruk fug. Gandum hit heneyabukmu gandum anggen amu hesangge wilipuk on halug inim, hit heneyabukmu en anggur enggik balduk eleg on halug de kabogdoho fahat da fug.

¹²Tahun aire mundoho horeg eneg on deg ma hit de we di angge su angge yabukmu amu wilibig on neg nauk kamuhup.

¹³Tahun ai fam de kwenang onggo balduhup on halug de onggwareg akni ahun fam og-utuk kamuhup.

¹⁴Aireg ma kwenang hit ap homi Israel on fam hun-dauhup halug oho ne aren hit onggo balduhup halug oho, hiren onggo baleheg, hundureheg duruk ale ai foma hwenaroho duk fug.

¹⁵Kwenang ai onggore tahun etano wenako anggen yihirukmu hwelauk ale etano doho wenako folug de tahun fiselaroho foruk salim anyo atuk karuhu.

¹⁶Ne, tahun anyo lahe anggen yihiruk men neg humdoho wereg latsi halug de onggo oho alongdoho foruk kamuhup famen de anggen yihiruk men neg dotdoho welatsi halug de onggore we anggen yihiruk on etano fahet neg deg ma re onggo oho we sebeloho foruk kamuhup.

¹⁷Hiren henori Israel on fam henele seiale laloho hweag-esa fug. Famen de An henakni TUHAN Allah fam neg henakol boruk kamek, ulug hweag-esakiyug.”

¹⁸“Hiren henekol eleg angge mun bok henobam suma welamuhup en TUHAN en awene lisu baleg inim, awene melaleg inim fik-furoho duruk kamek.

¹⁹O etma henanggwenang fam anggen fanoroho yig-henepukmu henengge nauk on higitdoho hwelauk kwit henobam mun fini-fanoroho welamuhup.

²⁰Aireg famen de hit foma en uruk kwit, tahun sabiren hoporoho yabuk wiroho a yaruk eleg angge, anggen inim baluk eleg angge wereg li etare nunggwangge nauk kamuhuk uhup lit deg.

²¹Aireg ma tahun folfalik on fam de At TUHAN en henanggwenang fam ele soroho fanoap debehumu anggen yihig de tahun henahan na on welaruhu.

²²Ne, hiren tahun ligin on fam a yatuk li ohore anggen yihig tahun folfalik on fam en etmano hit nauk kamag ulug wereg laruhu. Airoho hit fahet fouk deg wereg kweleg neg tahun hiren anggen baluhup on a fam aik waruhu,” ulug ebag.

²³Ekenim uruk kwit, “Kwenang etma onggwareg on de at Allah neg ne hit de ap bohon hagdoho we kwenang emberim fam neg wiroho nauk kamag ulug hweag-hesasi, ne hit henenggere fug deg ma henanggwenang mundoho-mundoho ulug onggo bal-dahup hayog.

²⁴Ne, kwenang hwili misig eke onggo baldul boruk halug de kwenang ai onggo baloho ulug ap kwenang onggwareg on atam ap su en on ulug fag-duhup fano.

²⁵Ne, ap homi Israel on eke mundoho enggik eleg on atlug halug keroho dimin ulug kwenang aren on anyo onggo balduk halug de it ori erekwi at horog kwe on en kwenang ai onggo baluhup fano.

²⁶Famen de fobik en ap eke en onggo baluk elegman at onggwareg ahun anyo auang wereg atlug kwenang anyo onggo bal-dauk halug de,

²⁷aren ap anggwenang onggwareg ahun fam onggo hundutsi on anyo fam tahun kwenang anyo fotog hauk on eke owan waharuk eleg kweleg kwenang ai misig famen anggen yihig balduk on mundoho onggo og-utuk karuhu. Airoho duruk fam de kwenang anyo at onggwareg on anyo enggikmu atuk karuhu.

²⁸Famen de kwenang anyo onggwareg onggo baloho hwelauk ale anggin atuk halug de ap onggo bal-dauk ahun anyo enggikmu akni ahun atlug weregman tahun fiselaroho foruk on fobik on anyo waharuk karuhu. Ai fam neg de kwenang anyo at onggwareg ahun angge atuk karuhu.

²⁹Ap misig eke en o kota ilonggoma elehet hukdoho kwelabeg on onggo hun-damin ulug duruk halug de at obam aire aren onggo hunduruhu on tahun ai famen wenako neg de aren onggo bal-dahu fano.

³⁰Famen de o anyo tahun misig anyo fam onggo hundutuk eleg halug de aren an nangge ulug eke uhu hayog, aren deg lit de mundoho eleg atsi mu. Ne, o aire at hun-dasi ahun ai ohwe omaliki inim enengge aruhu. Ne, tahun kwenang fiselaroho foruk salim ohore fotog hahu fug.

³¹O kota en dag fil on elehet maseroho oho eleg on ohore awene melaleg kwenang fahet deg hagdoho higitdoho neg deg. Aireg ma at onggwareg ahun atam on anyo en tahun fotog-esauk li anyo fam onggwareg ahun anyo fam o anyo onggo baldukmu og-utuk kamuhup.

³²Aireg famen de it inunggul unuk Lewi enap halug de it enengge o kota kwe wereg on etmano we li fibu deg eleg angge hun-dauk kamuhup fano.

³³Ap it Lewi on eke en at obam o kota misig fam eke onggo bal-dalug en onggwareg onggo hunduruk fug ale atuk halug de o aire tahun enonggwareg og-esauk on anyo fam onggwareg og-umuhup. Indip o it ap Lewi enap fahet o kota ap homi Israel on enesahali kwe on aire it enengge mundoho on deg ma.

³⁴Famen de enggela lei it ap homi Lewi on enobam kota aluluk kwe etma re it enengge mundoho on fahet deg ma onggo hunduruhup hayog,” ulug ebag.

³⁵ Ekenim uruk kwit, “Ap hit hininggul unuk on hit henesahalimu wereg on eke enggik eleg on atlug onggwareg oluk wereg on fahet let da fug alereg halug, at ebe oluk welamag ulug ap homi bohon fam inim henapeleg on fam inim debeseruk kahep hagdoho at let-diyug.

³⁶ Hiren at obam fobik hwelahuk en ulug og-esauk kwit eke inim dopnoroho ulug heng duk fug. Famen hiren henenda Allah fam neg henakol boruk kwit ap ai hit henesahalimu oluk welamag ulug embeseiyek. Ne, nauk angge at fam onggo hundutlug halug ohore ekenim nit nenalongap daul ulug nauk angge at fam onggo hundutuk on anyo heng duk fug.

³⁷

³⁸Wene melaleg An TUHAN Allah o Kanaan og-hesahukmu henakni Allah An neg aruhuk ulug o Mesir en og-heneplug wilibik waharihik on anyo en hweag-hesauihik on de ai,” ulug ebag.

³⁹ Ekenim uruk kwit, “Ap homi hit hinunggul unuk on hit henesahalimu wereg on en enggik eleg on atlug hit henobam ebe onggo balduk halug de ap ai aren yabuk it enamingming angge en duruk on dukwag ulug hweag-umuhup fug.

⁴⁰We at hit hinim ap yabuk onggo baleg wituk ondoho hininim wereg lit hit henobahet yabuk wituk men tahun enonggwareg og-esauk on anyo atuk karuhu.

⁴¹Ai salim neg de at omaliki inim o haren anyo embeselug at ahain elekwe on enekit at ombasi enanggwenang fam etmano lauk karuhu.

⁴²It ap homi Israel on halug de An den o Mesir en og-eneplug wilibik waharihik mu it de An namingming angge. Ai halug de iren enebe enamingming angge apdoho ulug onggo hun-dahup hayog.

⁴³Hit henenda Allah fam neg henakol boruk kwit it ap homi Israel on en hit henobam onggo bal-nenebukwag boruk halug de hiren henobabut hape fam debesouk fug.

⁴⁴Ne, hit lahe henamingming angge henenda halug de ap homi hit horog kwe wereg on etma onggo hun-dahup fano.

⁴⁵Ite hiren ap bohon hit henesahalikwe wereg on etma enomaliki onggo hun-dahup halug fano. It ap homi bohon enomaliki hit henanggwenang famen endag-atsi on halug de hit henengge atuk karuhu.

⁴⁶Ne, hiren it henomaliki fam it enamingming angge enoluk wereg li ai enamingming angge at welamag ulug enabinggi angge og-esauk anyo hagdoho enobam fohup halug fano. Famen de hit-hit ap homi Israel on halug de hiren henobabut hape fam debesouk fug.

⁴⁷Ap bohon hit henesahalimu wereg on eke at enggik wereg atuk mu ap hit Israel on eke enggik eleg atlug aren at enggik wereg on anyo fam oho ne it at ai ahain elekwe on fam oho onggo hun-nabukwag ulug duruk halug,

⁴⁸ap Israel on ai aren fobik onggwareg en fiselaroho da alereg laruhu. Hit henori on eke ap angge en halug inim,

⁴⁹owe en halug inim, are inim ambine endag-atswa on en halug inim, ne it ori at horogma on eke inim halug oho onggo baloho fiselaroho foruk kamuhup. Ite at onggwareg en lahe onggo baloho fisela da alereg halug, fisela dauk karuhu.

⁵⁰At enamingming angge anyo en ap at hundutuswa on ulug inim enele maho folug, iren at an enamingming angge welatmin ulug onggo hun-dasi li en tahun enonggwareg og-esauk on fobik on anyo fam aik waharuk karuhu aleroho wenaho folug, onggo aire it ap homi yabuk duruk on og-esauk ale higitdoho wenaharuk kamuhup.

⁵¹At enamingming angge anyo en tahun at enamingming angge wereg fug li we onggo fahet neg duruk kwit hwelauk etano higitdoho at ebe onggo balswa on fahet obalma og-esauk karuhu.

⁵²

⁵³Airoho duhu ai fam de at de ap tahun misig fam yabuk durukmu onggo og-esauk on hagdoho aruhu mu it enowesi en enobabut hape fam debesehup fug.

⁵⁴Ne, aren lahe indip misig on eke fam onggo ebe fiselaroho foruk on fahet hun-da fug ale atuk halug de at ai ebe inim omaliki inim, tahun fobik on fiselaroho foruk on fam de fiselaroho fohup.

⁵⁵At TUHAN en neg it Mesir en og-eneplug wilibik wahasimu, ne it enakni TUHAN Allah re At amu neg deg ma, it ap homi Israel on halug de An namingming angge deg ma enamingming angge weregman neg it enoluk welamuhup ai re fug, ulug isi ulug hweag-esakiyug,” ulug hweag-etfag.