Read Ninia Yali IMAMAT 26 Bible Online

IMAMAT 26 - Ninia Yali bible

IMAMAT 26

¹ TUHAN en uruk kwit, “Henakni TUHAN Allah re An neg deg lahimu re, hiren kembu wireheg, e on fam inim helep on fam inim ahut hilinggoho unduhuk folug apne weheg duk fug.

²Henakni TUHAN An neg deg lahimu re hiren nukoho sabit on inim, nukoho amu on airoho duruk kamuhuk ulug melale folug duruk on amu on inim, etmano leho foruk kwit, An napne wauk kamuhupmu ulug eneko ferihik mu etmano inim alongap deberuk kamek.

³ Ne, hiren lahe An den Nawene melaleg hweag-hesauk kahi on furoho deheg, An den diroho diyug suroho diyug hweag-hesauk kahi on ai dipdoho deheg duruk kwit welamuhup halug,

⁴An den li higitdoho osit belap-henesa waharukmu henanggwenang famen en anggen yig-henesauk kwit henahan anggen inim yig-henepuk karuhu.

⁵Henanggwenang famen anggen sigdoho yig-henepukmu hiren anggur anggen balduk li horog atuk karuhu famen de gandum anggen balduk neg kamuhup. Ne, hiren gandum a yatuk li horog atuk karuhu famen de anggur anggen balduk neg kamuhup. Airoho duruk kwit hit henobam henanggwenang fam etma nauk on humdoho wereg ma henobam fanoroho welamuhup.

⁶An den olomene olok on hag on hit henanggwenang famen elehapdoho feheg duhukmu, hit henobam weim yapuk ale on eke welaruhu fug. An den hit henobam henamelmel elegdoho henobahakukmu hit amu angge fam eke henakol eleg angge nohoruk kamuhup.

⁷Hiren ap henaselei on enalong elehapdoho fesouk alereg laruhu.

⁸Ne, hit henebe foaben famen de ap heneselei on 100 en inim enalong elehapdoho fesouk alereg laruhu. Ne, hiron ap henebe 100 en famen de it henaselei on enebe 10.000 en on enalong elehapdoho fesouk alereg laruhu.

⁹An den henomaliki henombasi humdoho og-heseheg, henebe fanoap henobahakeg duhuk. An den airoho henobahakuk ulug wene waroho abug hweag-hesauihik on aire dik-demdoho henobahakuk en.

¹⁰Hit henanggwenang famen anggen mun hum-hamdoho yig-henepukmu tahun misig hoporoho nauk kamuhup. Ne, hiren anggen bal-dauk kamuhup on etmano keron foul ulug atam on wilibi foruk kwit keron fahet obale koloroho foruk kamuhup.

¹¹An nebe hit henesahalimu Nobam Sabo salegma hinim wereg lit hit nerim ulug fotog hesahuk fug.

¹² An den hit fahat henusug lit An hit henakni aruhukmu hit An Noggwareg nomaliki on amuhup.

¹³Hit ap enamingming angge welamuhup fug ulug omamne fam hit sebel henusug latsi on anyo omamne elehapdoho folug fiselaroho henobaharihik deg o Mesir en og-heneplug wilibik waharihik on, henakni TUHAN Allah anyo nebe An neg,” ulug hweag-esebag.

¹⁴ TUHAN en uruk kwit, “Hit en An nele holuk eleg angge Nawene melaleg inim higitdoho duruk eleg halug inim,

¹⁵ne hit inim An ninim wene abug sali wat-duhuk on anyo dahan deberuk halug inim, ne hiren nawene melaleg inim diroho diyug suroho diyug ulug hweag-hesauihik on anyo furoho duruk eleg halug inim,

¹⁶An den anggin on hit henobam amag ulug debeheg, ouk inim ilik-ilik angge inim mun fano hiling-am fug on henobam feheg duhukmu hit hinil sihilig on atlug ouk baloho la fug angge hauk kwit neg welamuhup. Hit heneyabuk wiri fahat-dalug a yaruhup famen de it heneselei on hit sebeloho henobahalug henengge anggen yihig hiren yag-dauk angge etmano munmiroho nauk kamuhup. Hit de An den unggum henobam fohuk.

¹⁷An den hit unggum henobam fohukmu, ap heneselei on en hit henalong elehapdoho folug it henerim enepuk kahep on en hit sebel henusug lamuhup. Hit mundoho henekol neg atlug ap mug heneplug waharuk on eleg kweleg henakol wilip atuk kamuhup.

¹⁸An den unggum henobam fohuk on hahupdeg en hit An nobam dip-nobaharuk eleg halug ohore An den unggum nenggik sabiren neg wenako sabirenam eke inim dopnoroho fohuk.

¹⁹Hiren winik-wonog uruk kahep famen de An den sebeloho henobahakuk. Osit lohon wambik waharuk elegma henanggwenang mundoho kelog duhureg helep bosiemanggen hag aruhu.

²⁰Hiren anggin fanggindoho duhup famen de henanggwenang famen anggen wilipuk karuhu fug ne henanggwenang famen anggen yihiruk karuhu fug mu we alemaroho hag neg duruk kamuhup.

²¹Ne, hiren An ninim henaselei doho duruk kwit An nele furoho duruk eleg neg halug de hit fahet unggum de nenggik sabiren neg wenako sabirenam eke inim dopno ukwag ulug aham duhuk.

²²An den maro olok on hit henesahali kwe mondorik waruhukmu maro etma en henomaliki senggeloho bil eseheg, henowam senggel enebeheg, henebe elehap henebeheg, durukmu hit henebe dorangge neg atuk kwit hit henobam en kobokwe kwe mundoho ap elegdoho neg atuk karuhu.

²³Airoho anggin mundoho etma hahupdeg en famen hit An nobam owan hol-nabuk eleg angge An heneweimdoho neg duruk halug de,

²⁴An den hit henobam yeik henowaruhuk deg unggum de atam anggin hahup on etano anggin we dotdeg hag famen de An den nenggik wenako sabirenam eke inim henobam fohuk.

²⁵Hiren An ninim wene katukdoho maho folug abug wene uruhuk on anyo sahale folug duruk halug de, An den hit henobam kota hit henesahalimu etma weim lahabuhuk. Ne, hiren o kota fam etma kabog-dulug kema herag amul ulug obale heraruhup famen de An den ouk mundoho fano hiling-am fug on mondorik waruhukmu hiren nanggindul en ulug henerim fam it heneselei on enenggikmu henenda fano fam atuk kamuhup.

²⁶Hit henengge nauk on mun eleg aruhu mu, it homi enebe numen de roti it fam wereg on obale misigmu neg weraruk ale atuk karuhu. Hit nauk kamuhup ulug deg aleroho on fam nauk kamuhup famen de, hit mundoho nalug en nikangge obok henepuk karuhu.

²⁷Airoho anggin mundoho etma hahupdeg en famen An nele sahalduk neg duruk kwit furoho duruk eleg halug de,

²⁸An den nolok fam hit yeik henowaruhuk. Ne, anggin on henobam fohuk on aire atam hahup eta we dorangge hag famen de fobik on nenggik sabiron neg wenako sabiren eke inim henobam fohuk.

²⁹Hit henesiburu obok aruhu mu henonggwareg henomalik nauk kamuhup.

³⁰An den nahum kwe me naperoho, hiren duk-duk kwe mot-dik lauk kahep on etma inim, dupa amben fano angge yalduk kahep angge obale wirig on ai inim welelenggendoho fohuk deg, hit henebe wareg de kembu hiren on welelenggen duhu on etmano emberim kwe hwik hesahuk.

³¹Hit henobam kota mundohore An den mundoho meiyaloho fohukmu o meiyaleg kabog laharuk karuhu, hiren mot-dik lauk kahep kwe etma re An den erap-ferapdoho fohuk, ne henowam waroho yalik waharuk kahep on de An den wahuk fug.

³²Hit henobam bumbuk An den mundoho elehapdoho fohukmu it heneselei on inil hahup on en airoho deg laruhu on ai fahet youk lahup.

³³Heneyabuk wirig we hesangge lin-esauk kamuhup, ne henobam wirig de we meiyaleg kabog neg laharuk karuhu. An den hit henobam indipmu etma weim lahabuhukmu hit henekol en linggik-longgo uruk kamuhup.

³⁴Eta li em hit ap heneselei on enobam hwik henebik lahupmu etmano wereg kweleg henanggwenang hit henebe wereg lit kel wat-dowag ulug embeseruhup fug on etmanore kel watuk karuhu.

³⁵

³⁶It henori ap heneselei on en hwik enebik lahupmu welamuhup on etma re An den enekol mun humon debesehukmu, e enggela hol en fi hauk mu lelog duruk on fahet de enekol en wilip atuk kamuhup. It ap homi heneselei on henaluluk wereg fug famen ohore it henaselei on en weim fam mug heneplug waharuk en hag hit henakol en wat-dil lauk kwit longgo uruk kamuhup.

³⁷Hiren heneselei on inim hinim weim yabuk fug ale atuk en henekol en lauk kwit ap en mug heneplug waharuk en hag dungdoho wat-deheg, eke emberimmu en eke emberimmu wat-deheg dil lauk kamuhup.

³⁸Hit ap heneselei on en henowaruhupmu ap enobam hwik henebik lahupmu it heneselei on enobam etma en waramuhup.

³⁹Hiron en it enebe dorangge enoluk lil amuhup deg it heneselei on enobam welamuhup on de hit henombasi enesiag fahet inim hit henonggwareg henesiag fahet inim ouk-bouk hauk kamuhup.

⁴⁰Famen de it henombasi en inim hiren inim An nele sahaloho folug owag lahalduk katswa on etma hiren inim ne hiren ondohoma on en inim henesiag fag-duruk halug,

⁴¹Ai fam An den nomamne fam muko it ap homi heneselei on enanggwenangma hwik-henebik lauihik. Ambiangman lahe hiren ondohoma on en enesiag deheg nele sahaleheg duswa on An nobahet enenda sebe ulug duhup halug de,

⁴² An den wene abug wene waroho it Abraham inim Ishak inim Yakub inim hweag-esauihik on anyo ebet hahukdeg, An den kwenang etma ap homi inunggul unuk An nomaliki on etma og-esahuk irihik on anyo kerapdoho fohuk.

⁴³Aireg famen de kwenang ai An nomaliki demdoho kel wat-da lowag ulug atam de ap homi wereg on etma famen kolo debehup deg. Ne, it An nomaliki on aire An nawene melaleg inim diroho diyug suroho diyug inim hweag-hesauk kahi on anyo dipdoho duruk elegma An den it enobam unggum anggin on foruk kahi on ai atam hahupdeg,

⁴⁴famen de An sure hit Henakni TUHAN Allah deg lahimu re, it ap homi eneselei on enobam wereg kweleg ohore it enebe fotog-esalug lahuk fug, ne it enebe inim elehapdoho fesehuk fug. Ne, An den it elehapdoho fesehuk halug de An den diroho henebuhuk ulug abug wene waroho hweag-esauihik on anyo bale fehi ha alereg.

⁴⁵An it enakni TUHAN, Allah amag ulug An den ap homi di inunggul unuk su inunggul unuk wereg on fam An nomamne deg lahi ale anyo enameg howag ulug, nomaliki o Mesir en og-eneplug wilibik waharihik mu re An den it enombasi fam wene abug wat-esauihik on anyo kerapdoho fohuk,” ulug ebag

⁴⁶Airoho Dom Sinai famen TUHAN en awene melaleg inim diroho-suroho duruk kamuhup ale ulug inim Musa hweag-etfag on de airoho.