Read Ninia Yali IMAMAT 3 Bible Online

IMAMAT 3 - Ninia Yali bible

IMAMAT 3

¹Eke nim uruk kwit, “Ap misig eke en Allah inim sebe-dul ulug sapi misig eke waroho anggerang owam fahet waroho feik waharuk halug, sapi aire hwe on halug oho yohombuk on halug oho fano, famen de ahapmale eleg on halug neg.

²Feik watlug ap walug waharuk on anyo enggik wam anyo unggulmu sebele forukmu TUHAN Obam Sabo wirigmu sokolma etano en watuk kamuhup. Ne, it imam at Harun ambiangma on etmano en de sapi amep anyo oko mezbah ombandu ohwan ilitdoho fene hilil-esauk kamuhup.

³Wam At TUHAN inim seberul ulug anggerang owam waroho feik waharuk kamuhup on ai en it imam en TUHAN obahet on ulug foruk kamuhup anggere su: Ilonggomangge sei hwililip deg on inim, anggerang biren angge nim, asing angge mun fano angge on nim neg.

⁵Abirangge aire nin amu on yalduk on ulug etmano nim de mezbah emberimmu yaluhup. Nauk angge on yaluhup angge en de TUHAN endama ahayeg debehup.

⁶Ne, ap eke en anggerang owam waroho feik wamuhup angge ai lahe domba en oho kambing en oho hwe on halug ne yohombuk on halug fano neg, famen de we ahapmale eleg on halug neg.

⁷Ap eke en domba waroho og-itmin boruk halug de aren o TUHAN Obam Sabo wirigmu etmano walug feik waharuk karuhu fano.

⁸Eta walug watlug de ap anyo en enggik domba anyo unggulmu sebele folug o Sabo sokolma etano en waruhup. Ware folug at imam en de amep oko mezbah anyo ombandu ohwan higitdoho fene hilil-esahu.

⁹Wam At TUHAN inim seberul ulug anggerang owam waroho feik waharuk kamuhup on ai en, it imam en domba ai fam TUHAN obahet ulug foruk kamuhup anggere su: Sei ilonggomangge hwililipdeg on nim, anggerang asei et angge nim, asingangge mun fano angge on nim neg foruk kamuhup.

¹¹Forukmu it Allah imam eta li em yabuk duruk on anyo en de abirangge etma nauk on aire TUHAN obahet foruk angge on ulug mezbah emberimmu yalduk kamuhup.

¹²Walug feik waharuk on ai lahe kambing misig halug de ap feik waharuk on anyo en walug TUHAN Obam Sabo wirigmu etmano feik lauk karuhu.

¹³Walug watlug etano en de ap anyo kambing anyo unggulmu enggik sebeleg kweleg de O Sabo sokolma etano en kambing anyo waruhup. Ware fohupmu it imam en de amep anyo oko re mezbah ombandu ohwan ilitdoho fene hilil esahu.

¹⁴TUHAN fahet nauk angge on ulug og-utuk kwit de, it imam en de kambing anyo fam en og-umuhup anggere su: Asei ilonggomangge hwililip deg on nim, anggerang asei et angge nim, asing angge mun fano angge on nim neg.

¹⁶Forukmu it imam eta li em yabuk duruk on en de abirangge etma mezbah emberimmu yale foruk kamuhup. Nauk angge on ulug yalduk kamuhup angge ai en de TUHAN endama ahayeg deberuk kamuhup. Wam ai fam en asei etma abirangge re TUHAN fahet neg.

¹⁷Ap homi Israel on en de amep mel asei mel nahup hayog. Wene melaleg sure mundoho-mundoho wereg ma, it Israel on en de di kwe su kwe wereg lit etma holoho neg duruk kamuhup on,” ulug hweag-etfag.