Read Ninia Yali IMAMAT 4 Bible Online

IMAMAT 4 - Ninia Yali bible

IMAMAT 4

¹At TUHAN en Musa mingming-duruk kwit, “It inunggul unuk Israel on ap sa en eke wenggeleg elegman TUHAN en diroho diyug suroho diyug isi on anyo sahale folug siag duruk halug wene melaleg diroho duruk karuhu ulug, hele unduhuk feik lag.

³Ap siag duruk on ai lahe Imam Agung enowe anyo siag durukmu it ap homi Israel on inim at ombolim siag duruk halug, TUHAN en asiag apelehapdoho foukwag ulug aren wam sapi yohombuk ket sauwe on ahapmale eleg on misig waroho TUHAN obahet foruk karuhu.

⁴Sapi anyo walug watlug TUHAN obam sabo salegma o sokolma etmano feik waharukmu, Imam Agung anyo en enggik unggulmu sebele folug o Sabo olohotma etano en watuk karuhu.

⁵Ware folug amep foma fil de o Sabo anyo ilonggoma walug kuruk karuhu.

⁶Walug kulug de at enggik dum mep anyo fam yuhul halug mep anyo sum bogsum Ambe Enegma hwiliroho boreg on anyo orohole fil enggik sabirenam kwetete esauk karuhu.

⁷Mep anyo en foma fil de o Sabo ilonggoma en amben fano angge dupa yalik kurukmu obale mezbah anyo andimuk nganog deg on fene aro debelug, foma abirangge de mezbah waroho yalduk angge o Sabo olohotma wereg on anyo eyog indipmu etma hilil-esauk karuhu.

⁸It imam en sapi yohombuk on asei abirangge wauk karuhu anggere: Sei ilonggomangge hwililip deg on inim, anggerang asei et angge nim, asing angge en mun fano angge on nim wauk karuhu.

¹⁰Abirangge aire anggerang owam waroho yalduk anyo hagdoho mezbah waroho yalduk angge on fam etmano yalduk kamuhup.

¹¹Famen de sapi anyo ino inim, ahap inim, unggul owag inim, eyog inim, ilonggomangge abirangge al et angge inim,

¹²mundoho aire amu eneko foruk kamuhup on neg embeselug de abirangge etma o Sabo wirig dag fil walug wilibik lalug, ul hililik laukmu ai fahet obale eneg wereg ma etano e yalduk on wiroho e emberimmu yalduk kamuhup.

¹³Ne, it siag duruk on ai lahe ap homi Israel enap mundoho siag dulug, TUHAN Awene melaleg wereg on etmano misig eke wenggeleg eleg angge en dahan debelug duruk,

¹⁴halug de, siag duruk on enam atuk em etano ap homi en de folo-folo sapi yohombuk ket sauwe on eke walug de TUHAN Obam Sabo olohotma etano waharuk kamuhup. Wam aire ap asiag anyo elehap dukwag ulug waroho og-utuk on ulug foruk kamuhup.

¹⁵Feik waharukmu re it enowesi kaindeg inunggul unuk ai enobahet unduhuk wereg on omano en wam anyo unggulmu enenggik sebele folug, etano en neg watuk kamuhup.

¹⁶Ware folug ap Imam Agung anyo en wam anyo amep fomane walug o Sabo ilonggoma kuruk karuhu.

¹⁷Kwik lalug etmano en de mep anyo fam enggik dum yuhul halug sum bogsum Ambe Enegma hwiliroho boreg angge anyo alukwe fil etma enggik sabirenam kwetete esauk karuhu.

¹⁸Amep foma fil de o Sabo ilonggoma en amben fano angge dupa yaldukmu obale wirig on mezbah anyo andimuk nganog deg on anyo fene aro deberuk karuhu. Ne, alongdoho re waroho feik waharukmu yalduk angge mezbah anyo o Sabo sokole kwik laukmu wereg angge anyo eyog indipmu hilil esauk kamuhup.

¹⁹Wam anyo asei abirangge re walug mezbah anyo emberimmu yalduk kamuhup.

²⁰Ai yalduk kwit duruk ale aire ap homi enesiag elehapdoho foukwag ulug sapi yohombuk on waroho yalduk kwit duruk anyo hagdoho duruk kamuhup. Airoho it ap homi en siag durukmu re at Imam Agung anyo en de airoho wam waroho yalduk karuhu. Ai fam de ap homi enesiag anyo TUHAN en elehapdoho feseruk karuhu.

²¹Ai en sapi yohombuk on anyo re walug wilibik lalug, at Imam Agung anyo onggwareg fahet asiag elehapdoho foukwag ulug sapi yohombuk on waroho yalukoho lit duruk hagdoho walug wilibik lalug o sabo anyo dag fil en yalik lauk kamuhup. Ap homi enesiag elehapdoho fesoukwag ulug de airoho duruk kamuhup.

²²Ne, siag duruk on ai lahe it ap homi enowe along wereg ahun en wenggeleg eleg angge TUHAN en wene diroho diyug-suroho diyug ulug wereg on omano misig eke dahandoho duruk halug,

²³Airoho dihi ulug wenggel-atuk li etano folo-folo at asiag elehapdoho foukwag ulug wam kambing yohombuk on misig ahapmale eleg on watuk karuhu.

²⁴Aren de wam anyo unggulmu enggik sebele folug wam waroho yaldul ulug baldukmu, mezbah wereg on anyo en il emberim fil wereg ma etano en watuk kamuhup.

²⁵Ware folug imam en enggik dum wam amep anyo fam yuhul halug, mezbah unggut kwe andimuk nganog deg on fene etmano aro deberuk karuhu, ne alinlan de mezbah anyo indip kwe hilil esauk karuhu.

²⁶Ai en de wam anggerang owam waroho yalduk kwit duruk hagdoho wam anyo sei abirangge mezbah emberimmu etmano yalduk kamuhup. Airoho imam en ap enowe along wereg on anyo asiag fahet waroho yaldukmu TUHAN en ap anyo asiag elehapdoho foruk karuhu.

²⁷ Ne, siag duruk on ai lahe it ap homi we hesangge on misig eke en TUHAN en wene diroho diyug suroho diyug ulug wereg on anyo wenggeleg elegman misig eke dahandoho dil lauk kwit halug,

²⁸airoho dihi ulug wenggel-atuk li etano folo-folo aren kambing hwe on ahapmale eleg on eke watuk karuhu.

²⁹Aren de wam anyo unggulmu enggik sebele folug wam waroho yaldul ulug baldukmu, mezbah wereg on anyo en il emberim fil etman watuk kamuhup.

³⁰Ware folug imam en enggik dum wam mep anyo fam yuhul halug, mezbah unggut kwe andimuk nganog deg on fene etmano aro debeheg, ne alinlan de mezbah anyo indip kwe hilil esauk karuhu.

³¹Aseire wam anggerang owam waroho yalduk kwit duruk hagdoho abirangge walug imam en TUHAN endama ahayeg howag ulug mezbah emberimmu yalduk karuhu. Ap homi it hesangge on fahet de imam en airoho waroho yaldukmu, ap anyo asiag TUHAN en elehapdoho foruk karuhu.

³²Ap eke en lahe at asiag elehapdoho foukwag ulug domba misig waroho feik waharuk halug, domba aire ebe hwe on ahapmale eleg on neg.

³³Aren de enggik wam anyo unggulmu sebele folug wam waroho yaldul ulug baldukmu mezbah weregman il emberim fil etman watuk kamuhup.

³⁴Ware folug imam en wam amep anyo fam enggik yuhul halug, mezbah unggut kwe andimuk nganog deg on fene etmano aro debelug, alinlan de mezbah anyo indip kwe hilil esauk kamuhup.

³⁵Airoho debelug wam anyo asei re wam TUHAN en fanoap nenebukwag ulug waroho yalduk kwit duruk hagdoho asei omano abirangge wauk kamuhup. Asei omano re nauk angge on TUHAN fahet yalduk on omano nim seberoho mezbah emberimmu yalduk kamuhup. Airoho neg it imam en ap anyo asiag fahet waroho og-utuk kamuhup, ai fam ap ai TUHAN en asiag elehapoho foruk karuhu,” ulug hweag-etfag.