Read Ninia Yali IMAMAT 5 Bible Online

IMAMAT 5 - Ninia Yali bible

IMAMAT 5

¹Eke uruk kwit, “Wam enesiag apelehapdoho foukwag ulug og-irik waharuk kwit de: Ap eke o wene katukdoho kong-durukmu en ebenamegdoho at hasi ale inim holsi ale inim fag-din ulug hweag-utuk men aren hasi on mel holsi on mel anyo fag-duruk eleg on ai onggo onggwareg en at ambiangma hwilil lauk kwit halug.

²Ap eke en wenggeleg elegman amu angge bak ane, wam ane hag angge wareg filik fam bal-ha fug ulug wereg angge fam bal-haukmu ap anyo ebe alema re fahat dalug at duruk ale anyo siag dihi ulug wenggel-atuk mu halug.

³Ap eke en wenggeleg elegman ap homi famen bal-ha fug ulug emereg wereg famen ba-hauk fam siag dulug, at duruk ale anyo wenggel-atuk mu halug.

⁴Ap eke en indip fubi debouk eleg angge diroho duhuk ulug ele hombuk bale folug en, balduk ale anyo fahet siag dirihik ulug wenggel-atuk mu halug.

⁵Di wene su wene ai abirangge fahet de, ap siag duruk on anyo en asiag fag-duruk karuhu.

⁶Ne, at asiag duruk on anyo elehap dukwag ulug onggore, aren wam domba ane kambing hwe on ane misig eke walug waharukmu, it ap imam etmano en ap anyo asiag apelehapdoho foukwag ulug wam anyo waroho TUHAN og-utuk kamuhup.

⁷Famen de ap siag duruk on anyo en asiag elehap dimin ulug onggo domba inim kambing inim ai duk fug alereg halug de aren suwe muluk misig wutdoho ane ite suwe yalma hag on ebe kauk on ane walug watlug misig de asiag apelehapdoho foukwag ulug ne misig ekere waroho yaldukmu yalukwag ulug walug waharuk karuhu.

⁸Suwe etmano walug it imam enekit waharukmu, imam en de suwe etmano ap anyo asiag apelehapdoho foukwag ulug on dam waroho foruk karuhu. Suwe ebe anggolop kong-debouk fug angge kwani esauk karuhu.

⁹Kwaniroho ware folug suwe anyo amep okore mezbah ombandu fil kwetete esauk karuhu famen de foma re ap anyo asiag apelehap dukwag ulug mezbah anyo eyog indip kwe kwesal esauk karuhu.

¹⁰Ai mundoho debelug de wene melaleg diroho diyug airoho diyug ulug wereg hagdoho suwe bireneg on anyo imam en waroho yal-utuk mu etmano ap anyo asiag fahet yal-utuk mu, ap anyo asiag TUHAN en elehapdoho foruk karuhu.

¹¹Ne, ap siag duruk on ai en lahe suwe muluk inim suwe yalma inim etano at asiag elehapdoho foukwag ulug wep duruk ale anggin atuk halug aren tepung satu kilogram walug waharuk karuhu. Famen de feik waharuk angge ai amep wereg eleg angge on yalukwag ulug feik waharuk fug mu, aire asiag elehap dukwag ulug deg ma re tepung aire zaitun ahalue belabeg eleg angge kemenyan inim emberimkwe damulig eleg angge feik waharuk kamuhup.

¹²Tepung anyo walug watlug imam enekit walug waharukmu, imam omano en tepung etano en enenggik misig en yinggiloho wauk hag walug sure abirangge TUHAN obahet yalehe boukwag ulug eneg aleroho walug tepung wauk on etano nauk angge yal-utuk on ulug mezbah emberimmu yalduk kamuhup. Ap homi enesiag elehapdoho foukwag ulug on de airoho duruk kamuhup.

¹³Airoho ap anyo asiag fahet TUHAN en apelehapdoho foukwag ulug imam en waroho yalduk kamuhup. Famen tepung foma dindik atuk on omanore gandum amep eleg angge on ulug yalduk kwit duruk hagdoho it imam on enobahet foruk kamuhup,” ulug hweag-etfag.

¹⁴TUHAN en de wene melaleg eke su Musa obam febag,

¹⁵“Ne, ap misig eke en lahe wenggeleg elegman TUHAN obahet bale fouk fug angge hindik-hundig foruk karuhuk ulug en fohu fug halug de ap ai aren feik waruhu fug on ai bekit apdoho foukwag ulug obalma walug yal-irik waruhu fano. Yal-irik waharuk kwit de yal-utuk angge aire domba en oho kambing en oho yohombuk on misig ahapmale eleg on o TUHAN Obam Sabo salegman onggo deg aleroho higit debelug halug feik waharuk kamuhup.

¹⁶Ap anyo en atam feik wahasi fug on anyo fahet onggo obalma foruk kwit de 20 persen eke inim dopnoroho fohu. Folug aren it imam omano og-esahumu iren ap anyo asiag elehapdoho foukwag ulug wam anyo waroho yaluhupmu, TUHAN en ap anyo asiag elehapdoho fohu.

¹⁷Ap misig eke wene diroho diyug-airoho diyug ulug ebag on anyo fetagdoho sahale foruk halug de aren duruk onggo hauk karuhu neg.

¹⁸Ne, duruk onggo ai bekit apdoho ulug obalma feik waharuk kwit de wam domba en oho kambing en oho yohombuk on famen ahapmale eleg on onggo TUHAN Obam Sabo salegman deg alereg on halug. Ne, it imam omano en de wam anyo waroho ap anyo asiag fahet yaldukmu, at asiag TUHAN en elehapdoho foruk karuhu.

¹⁹Aren TUHAN il hanim siag duruk on anyo fahet obalma re airoho duruk karuhu,” ulug hweag-etfag.