Read Ninia Yali IMAMAT 6 Bible Online

IMAMAT 6 - Ninia Yali bible

IMAMAT 6

¹ TUHAN en wene melaleg eke su Musa obam febag.

²“Ap misig eke en ori enengge obam hobale fohup famen enonggwareg nikangge og-esahu fug halug inim, ite ele en hwena-hwena herag dahu halug inim, ne are angge longgo uhumu aren hweahaku famen hombuk baloho awea wahu halug inim de aren TUHAN il hanim siag duhumu, aren asiag fahet waroho feik waharuk karuhu.

⁴Feik waharuk kwit de ap siag duhu on anyo en de ori enengge hwenaroho lal heheg hwelahu on etmano abirangge obalma onggo fohu. Ne, at siag durukmu hweahalug halug de at onggwareg ahun anyo fam onggo og-utuk kwit, aren dua puluh persen eke inim dopnoroho og-uruhu.

⁶At duruk on fahet obalma angge fahet ulug waroho foruk kwit halug de, domba oho kambing oho yohombuk on famen ahapmale eleg on onggo TUHAN Obam Sabo salegman deg alereg on halug.

⁷It imam omano en de ap anyo asiag fahet waroho yaldukmu TUHAN en ap anyo asiag elehapdoho foruk karuhu,” ulug hweag-etfag.

⁸Eke TUHAN en Musa hweag-ituk kwit, “Hun Harun inim at omaliki inim en wam ebe abirangge waroho yalduk kwit halug it imam omano en mezbah emberimmu folug, indok hunduko kwelabe folug de hup hundig etmano embeserukmu wereg laruhu ale fahet wene melaleg su hweag-esakin.

¹⁰Ne, waroho yale foruk angge anyo mundoho ul atuk mu at imam anyo en sum eyog sum baleg on wan-dalug ebe sum jubah sum mun fano on kain lenan fam seleben deg on inim wan-dalug de ul wam amug bereleg angge anyo ologdoho yalduk angge emberimmu anyo en de aluluk hopdoho mezbah wirig on anyo indipmu etma foruk karuhu.

¹¹Airoho debelug at anyo asum ahamdoho amu on wan-dalug ul anyo hamboko walug de o sabo wirigmu en dag fil obale eneg wereg ma etma feik wilipuk karuhu.

¹²Indok mezbah emberimmu aire nahul atuk karuhu hayog ambulbuldoho nauk kwit neg welamag. Ne, hubetdoho hundig-hundig de it imam etmano en e mezbah anyo emberimmu omano yale folug enesiag fahet waroho yalduk angge anyo yale folug, wam anggerang owam en sei etmano inim yalduk karuhu,” ulug hweag-esowag ulug hweag-etfag.

¹⁴TUHAN obahet amep wereg eleg angge on walug watlug yalduk kamuhup ale awene melaleg de su: “Ne, amep eleg angge on aire it Harun ambiangma on etmano en walug mezbah anyo alukwema waharuk kamuhup.

¹⁵Walug watlug amep wereg eleg angge on anyo abirangge TUHAN obahet fehe ulug eneg aleroho de it Harun ambiangma on etmano en tepung enenggik misig en yinggiloho wauk hag walug ahalue inim kemenyan inim walug, mezbah anyo fam yaldukmu, amep eleg angge on yal-utuk mu amben en de TUHAN endama ahayeg hauk karuhu.

¹⁶Ne, tepung foma abirangge aire roti fituk angge ragi eleg angge wiri folug it imam omano en o TUHAN Obam Sabo salegma en sokole kwik laukmu obale enegma etman nauk kamuhup. Amep wereg eleg angge on nauk angge aire enesiag elehap dukwag ulug waroho foruk on inim duruk onggo obalma foruk on inim deg hagdoho deg ma re mun horeg on welaruhu. Ne, aire at TUHAN en it imam nauk kamuhup ulug og-esasi on de ai.

¹⁸Amep wereg eleg angge on nauk kamuhup on ulug foruk on aire horeg ale fahet mun omamne deg ma ap eke en nauk angge ai bal-hauk halug de enonggwareg en yoma dauk kamuhup. Nauk on aire TUHAN obahet foruk on famen de it Harun ambiangma on en nauk kamuhup ulug wereg ma, mundoho-mundoho etma wereg lit it ap Harun ambiangma on neg roti etma hwelalug nauk kamuhup,” ulug hweag-etfag.

¹⁹TUHAN en Musa wene melaleg su obam foruk kwit,

²⁰“It Harun ambiangma on yabuk imam on duruk kamuhup ulug ahalue hililoho unduhuk feseruk kwit waroho yalduk kamuhup ale fahet ulug hweag-hitmin. Nukoho at unduhuk foruk salim aire aren tepung gandum on fam sahaleg on satu kilogram TUHAN obahet foruk karuhu. Ne, foma re hubet fahet folug foma hupmu feik waharuk karuhu.

²¹Obahet amep wereg eleg angge on feik waharuk angge ai amben fano halug TUHAN endama ahayeg howag ulug de, tepung anyo minyak inim menene folug keroho weratuk mu werakore kut-kut debelug amep wereg eleg angge on werako feseik waharuk kamuhup.

²²Hindik-hundig eneitogdoho it Harun ambiangma on ap imam enowe Imam Agung welamag ulug unduhuk fesehup on anyo en TUHAN obahet ulug feik waharuk angge aire abirangge og-utuk kamuhup.

²³Amep wereg eleg angge on werako yalik waharuk kamuhup on aire dorangge ulug lohon it na fug angge abirangge it imam en yalduk kamuhup,” ulug ebag.

²⁴TUHAN en Musa miming-duruk kwit, “It Harun inim at omaliki inim en wam ap homi enesiag elehapdoho foukwag ulug waroho yalduk kwit de diroho duruk kamuhup ulug hweag-esa lakin. Wam ap homi enesiag elehapdoho foukwag ulug aire wam ap homi enesiag fahet ulug watuk mu obalma etmano en watuk kamuhup. Airoho watuk mu iren waroho foruk angge aire mun eneg horeg laruhu.

²⁶Ne, at imam en waroho feik waruhu on aire obale eneg wereg ma o Sabo saleg on anyo en hwenie sokole kwik waharukmu etma en nauk karuhu.

²⁷Wam aire ahoreg mun along deg ma re ap eke asum ebe sum fam wam anyo amep kwetete doho lahu halug de sum ai obale enegma en horuruk kamuhup. Ne, ap ane we nunggwangge ulug oho wam ai bal-hauk halug onggwareg en yohwat dauk karuhu.

²⁸Waruk kwenang fam laleg on wam ai esetuk on oho re erapdoho embeseruk kamuhup. Ne, waruk esetuk on ai lahe helep bosie on fam wirig on halug de ahap seleng esalug ik fam horuruk kamuhup.

²⁹It imam enahain elekwe on halug de waroho feik waharuk on mun hi-horeg on ai nauk kamuhup.

³⁰Wam enesiag elehapdoho ulug duruk salim fahet waroho feik waharuk on ai it na fug angge abirangge yale folug de amep foma re Kanggog Niginama anyo walug kuruk on fahet foruk kamuhup.”