Read Ninia Yali IMAMAT 7 Bible Online

IMAMAT 7 - Ninia Yali bible

IMAMAT 7

¹“Duruk onggo fahet bekit apdoho ulug obalma feik waharuk kwit duruk kamuhup on fahet wene melaleg de su. Ne, iren obalma feik waharuk angge aire mun eneg horeg welaruhu.

²Wam duruk onggo fahet aire wam baldukmu obalma etmano en bale folug amep neg de mezbah anyo ombandu fil etma hilil esauk kamuhup.

³It imam etmano en de mezbah anyo emberimmu mun ahalue sei angge mundoho, Ahaema sei wereg on inim, ilonggomangge fam asei hwililip deg on inim, anggerang asei et angge nim, asing angge fam en mun fano fil on inim,

⁵Mundoho aire abirangge nauk on en TUHAN fahet og-utlug yalduk kamuhup. Yaldukmu iren yalduk angge aire duruk onggo atuk karuhu.

⁶It ap neg it imam etmano enahain elekwe en wam ai nauk kamuhup fano famen de, wam aire mun horeg on deg ma iren obale enegma etmano en nauk kamuhup.

⁷Wam ap homi enesiag elehapdoho foukwag ulug on inim duruk onggo ambiangma inim awene re we misig alereg laruhu. Ne, wam waroho yalduk on anyo en ino re at imam walug fohu ahun anyo deg laruhu.

⁸Ne, wam etmano ahap ohore it imam fahet neg.

⁹Amep wereg eleg angge on yaldukmu yalik waharuk on inim, kuali fam osoho on inim, ke heheg weraho angge inim de it imam en walug feik waharukmu og-utuk karuhu on ai angge.

¹⁰Famen de amep wereg eleg angge on walug feik waharuk on famen osoho eleg on inim, ahalue fam meneneg on famen oho we kelog deg angge en famen oho abirangge aire it hun Harun ambiangma on imam etmano atlug iren it-it bul kwe higitdoho neg yohwan-dauk kamuhup,” ulug hweag-esebag.

¹¹TUHAN obahet wam anggerang owam waroho feik waharuk kwit duruk kamuhup ale awene melaleg de su:

¹²“Waroho feik waharuk angge ai lahe dangdoho fahet ulug feik waharuk kwit halug de wam walug waharuk on ai inim de roti fituk angge fam wirig eleg on inim walug waharuk kamuhup. Roti aire tepung en neg wilim angge zaitun ahalue et sebereg angge oho fano, ne roti we ahalue fam aro deg angge mun kelog angge oho, kue tepung on zaitun ahalue fam seberoho wirig angge oho fano.

¹³Ai en foma re roti fituk angge fam wirig on et walug og-irik waharuk kamuhup.

¹⁴Roti amu-amu omano en foma re At TUHAN obahet feik waharuk kamuhup. Aire it imam omano en wam anggerang owam fahet amep oko waroho yaldukmu etmano hililik lauk on etmano enangge atuk on fahet.

¹⁵Wam ino re dorangge sono fahet ulug lohon fouk eleg angge wam ai watuk salim ai neg mundoho abirangge nauk kamuhup.

¹⁶Ne, ap eke en lahe an den diroho duruk karuhuk ulug ele foruk ale fahet oho ne we enda fano en feik lamin ulug oho anggerang owam fahet waroho feik waharuk halug de foma abirangge nukoho ai salim neg nahup fug we foma sono fahet ulug folug nahup halug fano.

¹⁷Nukoho henahaneg angge huli wam osoho omano wereg neg halug de ino ai abirangge indok yaluhup fano.

¹⁸Famen de wam ino anyo nukoho henahanam welaruhu angge famen nahup halug de iren waroho yaluhup angge anyo wahu fug deg at obam inim fanoap debehu fug we onggwareg en ousa apdoho fahat dahu. Ne, at nahu ahun aire siag neg duhumu, at duhu onggo ambiangma hahu neg.

¹⁹Wam ino lahe di angge su angge emereg on fam bal-hahu halug de na fug angge abirangge indok yaluhup fano. Wam anggwerang owam fahet ulug waruhup on etman ino halug de ap enebe emereg eleg on en neg nahup.

²⁰Ne, ap eke en lahe at ebe emereg wereg lit en nahu halug de at aire ebe Allah omaliki on wereg de bohup fug.

²¹Ne, ap misig eke en wam waroho yalduk on anyo ap famen oho wam, suwe, bak di angge su angge famen oho emereg ma bal-hahu men nahu halug de ap ai oho Allah omaliki on wereg de bohup fug,” ulug hweag-esebag.

²²TUHAN en Musa fam wene melaleg eke su obam foruk kwit,

²³“It ap homi Israel on halug de domba amug oho, sapi amug oho, kambing amug oho eke nahup fug.

²⁴Wam amu waratuk on amug oho olomene hag angge en senggelduk on amug oho amu on fahet de duhup fano famen de henebe nahup hayog.

²⁵Ap en wam waroho yaldul ulug feik waharuk on omano amug nahup halug de ap ai At Allah omaliki on wereg de bohup fug.

²⁶ Hit ap homi Israel on o amu kwe wereg lit ohore wam, bak, di angge su angge amep inim suwe amep inim de nahup hayog.

²⁷Ap sa en hwe sa en wene melaleg ai sahalduk halug de at ai Allah omaliki on wereg de bohup hayog,” ulug hweag-etfag.

²⁸TUHAN en Musa wene melaleg eke su obam foruk kwit,

²⁹“Ap homi Israel on en duruk kamuhup ale re ap misig eke en wam memeroho waroho femin ulug walug waharuk halug de foma eneko At TUHAN obahet foruk ulug fouk deberuk kamuhup.

³⁰Nauk angge waroho feik waharuk on aire at onggwareg en neg walug waharuk karuhu. Feik watlug amug inim wam ai abig-fig inim aire aren wam TUHAN obahet enggik dum wareg owam ulug foruk karuhu.

³¹Airoho forukmu it imam omano en amug anyo neg de mezbah emberimmu etmano yalduk karuhu famen de abig-fig anyo neg de it imam on etmano enengge atuk karuhu.

³²Aho bekit fil on de amu eneko memeroho foruk on ulug fouk debelug,

³³At imam ai salim wam anggerang owam amep inim amug inim oko yaldukmu yaluhu on ai eneko og-utuk kamuhup.

³⁴Wam abig-fig inim aho inim etare eneko TUHAN fahet enenggik dum ware folug it ap homi inunggul unuk Israel on en og-utuk kamuhup on etmano it imam etmano og-esauk kamuhup on de ai. Aire it ap homi Israel on en hundig-hundig it imam on fahet duruk kamuhup alere airoho.

³⁵At Harun inim omaliki inim imam welamag ulug eneko unduhuk feseruk salim aire nauk angge TUHAN obahet ulug feik waharuk on ai it og-esauk kamuhup.

³⁶Nukoho ai salim de it ap homi Israel enap abirangge en walug feik waharuk angge aire it imam enobahet foruk kamuhup, ne wene melaleg sure it ap homi Israel on mundoho en li mundoho-mundoho etma fam fu debelug higitdoho duruk kamuhup,” ulug TUHAN ele melale fesebag.

³⁷Ap homi enesiag fahet wam waroho yalik waharuk kamuhup ale ulug inim, amep wereg eleg angge on feik waharuk kamuhup ale ulug inim, ap homi enesiag apelehapdoho foukwag ulug waroho yalik waharuk kamuhup ale ulug inim, ap homi enengge alemare folug obalma fahet ulug waroho feik waharuk kamuhup ale ulug inim, it ap homi yabuk duruk kamag ulug eneko unduhuk feseruk kwit wam waroho yalik waharuk kamuhup ale ulug inim, anggerang owam waroho yalduk kamuhup ale ulug inim airoho wene melaloho hweag-esebag.

³⁸At TUHAN en it ap homi Israel on fam wam waroho yalukwag ulug o Sinai leimu en hweag-esebagdeg at Musa Dom Sinai fam en wene melaleg ai airoho obam febag.