Read Ninia Yali IMAMAT 8 Bible Online

IMAMAT 8 - Ninia Yali bible

IMAMAT 8

¹TUHAN en Musa hweag-ituk kwit, “Harun inim at omaliki inim wol-esalug de sum it ap imam duruk on en wan-duruk on inim, ahalue ap unduhuk feseruk kwit hilili feseruk on inim, enesiag apelehapdoho foukwag ulug wam watuk on fahet wam sapi yohombuk ket sauwe on eke inim, domba biren inim, roti fituk angge ragi eleg angge fam wirig on si yihig misig fam yohwareg angge inim, walug wamagdoho hweag-esamihin.

³Ne, it ap homi Israel on oho An Nobam Sabo saleg on sokolma etmano kabog-dik wamagdoho hweag-esamihin,” ulug hweag-etfag.

⁴Airoho hweag-etfag ma Musa en at TUHAN en diroho diyug-airoho diyug ulug hweag-etfag ale anyo higitdoho debag. It ap homi Israel enap anyo hweag-esebag ma etmano mundoho kabog-dik watfag ma,

⁵at Musa en it hweag-esauk kwit, “Ketia an den dimin on su re TUHAN en diroho diyug airoho diyug ulug melale-nobahasi on dimin,” ulug hweag-esebag.

⁶Airoho hweag-esebagdeg aren it Harun inim at omaliki inim enalukwe fil inaik watlug enebe fam ho dowag ulug hweag-esebag.

⁷Hweag-esebagdeg at Musa en sum imam on en lahapuk on anyo at Harun obam wan-deberuk kwit, ebe sum inim, ombahaluk hagdoho wan-duruk on inim, asum humon jubah ebe famen bekitsong wan-duruk on inim wan-debebag. Ai en eke efod [1] sum il amu-amu on fam yihig angge sum kain il sako on fam seleben deg angge fam bug deberuk katfag angge anyo fam obahare kwe bug debebag.

⁸Ai bug debebagdeg at Harun obam amig mapnu angge bug debebagdeg amig mapnu ai fam de Urim nim Tumim [2] nim eta kwelabe febag.

⁹Ai kwelabe febagdeg ai en at Harun unggulmu sum kurangge it ap imam on en wan-duruk katfag angge unuk serban ai bug debebagdeg serban ai fam de at Harun mundoho ebe TUHAN angge aha ulug emas on borebeheg debag. Mundoho aire TUHAN en diroho diyug-airoho diyug ulug melale febag ale anyo higitdoho debag ai.

¹⁰Airoho mun bug debebagdeg at Musa en ahalue ap unduhuk feseruk kwit hililduk katfag angge anyo oko TUHAN Obam Sabo salegma etmano inim o sabo ai ilonggo elekwe duruk angge etmano fam inim aroril lebag. Airoho debag ai fam de di angge su angge etma mundoho re TUHAN obahet eneg welamag ulug debebag.

¹¹Ahalue anyo en dorangge lohon de mezbah anyo fene inim ai yalduk kwit duruk angge fene inim, mezbah ai wirig on indip kwe inim enggik sabirenam kwetete esebag. Airoho debag ai fam de di angge su angge etman mundoho re TUHAN obahet eneg horeg wereg lamag ulug debebag.

¹²Ai mundoho debebagdeg at Musa en ahalue ap homi unduhuk feseruk kwit hililduk katfag angge anyo oko Harun unggulmu hilili folug unduhuk febag.

¹³Airoho mundoho debagdeg aren it Harun omaliki omano enalukwe fil inaik wamag ulug hweag-esebagdeg, TUHAN en airoho diyug ulug hweag-etfag ale higitdoho sum enebe sum bug debeseheg, enombahaluk hag angge bug debeseheg, ai en enunggulmu sum kuron serban anyo bug debeseheg debag.

¹⁴Mundoho ai debebagdeg at Musa en it enesiag elehapdoho foukwag ulug wam sapi yohombuk on misig ket sauwe om eke webagdeg it Harun inim at omaliki inim wam anyo unggulmu enenggik sebele foukwag ulug hweag-esebag.

¹⁵Airoho debebagdeg at Musa en wam anyo waroho amep foma webagdeg, mep anyo mezbah andimuk nganog deg ma unggut foma-foma omano mezbah aire Allah obahet neg eneg welamag ulug enggik dumen oko arorebag. Ne, mep fomane omano re mezbah anyo indipmu etmano hilil-esebag. Obale waroho yalduk angge fahet aire mun horeg welamag ulug airoho duruk katfag.

¹⁶Wam sapi ket watfag on anyo en de at Musa en amug abirangge ilonggomangge fam hwililip deg on inim, anggerang amug et inim, asing angge fam en mun fanoma on inim abirangge aire mezbah emberimmu yalfag.

¹⁷Famen de sapi anyo ino inim, ahap inim, ilonggomangge abirangge nim, alot nim, wam sapi ai abirangge fam en de we foma amumu eneko febag on etmano neg folug de abirangge TUHAN en wene melaleg hweag-esebag higitdoho o TUHAN Obam Sabo salegma etmano en dag fil yalfag.

¹⁸Airoho debagdeg at Musa en domba yohombuk on enesiag fahet waroho yalduk on ulug anyo webag ma it Harun inim at omaliki inim enenggik wam anyo unggulmu sebele febag.

¹⁹Airoho debag ma at Musa en domba anyo waroho amep de mezbah anyo ombandu ohwan etano ilitdoho fene hilil esebag.

²⁰Hilil esebagdeg wam anyo senggeloho re ilonggomangge inim eyog inim de ik fam horebag. Ne,unggul inim, amug inim, domba yohombuk on anyo ino humdoho inim de TUHAN en wene diroho diyug ulug hweag-esebag higitdoho it enesiag fahet waroho yalfag. Nauk angge waroho yalfag angge on ai amben en de TUHAN endama ahayeg hebag.

²²Ai mundoho debebagdeg at Musa en domba misig eke it imam unduhuk feseruk kwit watfagdeg anyo webagdeg at Harun inim at omaliki inim wam anyo unggulmu enenggik sebelukwag ulug hweag-esebag.

²³Airoho sebele febag ma at Musa en ware febagdeg wam anyo amep dorangge lohon oko at Harun esanggo bekit fil on fam inim, enggik foap bekit fil on fam inim eyog foap bekit fil on fam inim arorebag.

²⁴Ai en at Musa en it Harun omaliki omano inaik manik ulug hweag-esebagdeg wam amep anyo dorangge lohon oko it enesanggo bekit fil on fam inim enenggik foap bekit fil on fam inim eneyog foap bekit fil on fam inim aro enepfag. Ne, wam mep foma etmano re mezbah ombandu ohwan higitdoho fene hilil esebag.

²⁵At Musa en domba anyo amug inim, ahaemboagma sei wereg on anyo inim, amug anggerang fam hwililip deg on etmano inim, asing angge famen mun fanoma on inim, anggerang asei et inim eyog bekit fil on inim,

²⁶Si yihig hag angge fam roti fituk angge ragi eleg angge TUHAN obahet ulug wiroho febag on etmano en at Musa en roti ahalue fam wilimdoho wirig on misig, mabendoho wirig on misig eke inim, webagdeg roti etmano wam domba amug inim eyog bekit fil on inim emberimmu febag.

²⁷Airoho debelug abirangge anyo at Harun inim at omaliki inim enenggikmu febag ma iren enenggik dum waroho TUHAN obahet febag.

²⁸Airoho mundoho febagdeg deg at Musa en nauk angge anyo it enenggikmu en oko webagdeg mezbah emberimmu, ap homi enesiag fahet waroho yalduk on ulug inim it imam unduhuk feseruk kwit yalduk on fahet ulug inim yalfag. Nauk angge ai airoho yalfag ma amben en de TUHAN endama ahayeg hebag.

²⁹At Musa en it unduhuk feseruk li ai at onggwareg fahet TUHAN waroho yal-om hag de wam domba anyo abig-fig owag webagdeg aren enggik duma waroho folug TUHAN obahet og-etfag. Abirangge aire at TUHAN en Musa fam diroho diyug ulug melale febag ale higitdoho debag.

³⁰Anyo mundoho debagdeg, it Harun omaliki inim enesum inim anyo TUHAN obahet eneg welamag ulug de, at Musa en it unduhuk fesoukoho lit kabog-debagdeg ahalue foma anyo inim mep foma mezbah emberimmu welatfag on anyo inim, webagdeg at Harun ebe fam inim at omaliki enebene inim it enesum fene inim belap-enepil lebag.

³¹Airoho debesebagdeg at Musa en Harun inim at omaliki inim hweag-esauk kwit, “TUHAN en uruk kwit de hit unduhuk henobaharuk li nowag ulug de roti si yihig hag angge fam kwelabeg wereg angge ai nahup isi, anggere hiren nauk angge ai TUHAN Obam Sabo salegma sokole kwik waharukmu olohotma etan eseriek.

³²Ne, roti dindik atmisi on inim ino angge dindik atmisi on inim de mun felelengdoho indok yaluhup.

³³Nukoho henenggik sabiren aire TUHAN Obam Sabo salegma anyo embeselug la fug angge weregman hit unduhuk henobaharuk kwit duhup on ai eleg aruhu.

³⁴TUHAN en hweag-nesauk kwit de niren yoho dehe ale aire fobik oho airoho duruk kamuhup isi. Ne, hiren airoho duruk ai fam de henesiag elehapdoho embesehu.

³⁵An TUHAN en hweag-nutuk kwit de, hit nukoho henenggik sabirenam etare hup hundig nukoho hundig de hit o Sabo saleg on sokolma eta At TUHAN en hweag-hesauk on dukwag ulug wereg lamuhup. Ne, hiren airoho duhup fug halug de hit mundoho waramuhup, ulug hweag-nitsi,” ulug hweag-esebag.

³⁶Airoho hweag-esebag ma at Harun inim at omaliki inim en airoho duruk kamuhup ulug TUHAN en Musa fene hweag-etfag ale anyo higitdoho debag.