Read Ninia Yali IMAMAT 9 Bible Online

IMAMAT 9 - Ninia Yali bible

IMAMAT 9

¹It imam duruk on fahet unduhuk fesebag ale anyo fahet mundoho kabog-debagdeg anyo enenggik misig welatfagdeg likia kwe nukoho ligin salim at Musa en Harun inim at omaliki inim, it Israel on enowesi kain on inim wol-enepfagdeg

²at Musa en Harun hweag-utuk kwit, “Sapi ket yohombuk on misig eke inim domba yohombuk eke inim birenet enahapmale eleg on walug, sapi yohombuk aire henesiag elehapdoho foruk on fahet ne domba yohombuk aire waroho yal-utuk on fahet ulug ebe birenet TUHAN og-emek.

³Ne, it ap homi Israel on en de kambing yohombuk on misig ekere enesiag elehapdoho foukwag ulug ne sapi omalik eke inim, domba omalik eke inim de enebe umur tahun misig deg on, enobam enahapmale eleg on waroho yaleg angge yal-omagdoho ulug hweag-esakin.

⁴Eke iren sapi yohombuk misig eke inim kambing yohombuk misig eke inim iren anggerang owam fahet waroho og-omag. Nukoho su salim de TUHAN it enekit wahasimu ulug de abirangge ai amep wereg eleg angge on ahalue areroho foruk on inim seberoho TUHAN og-omagdoho hweag-esakin,” ulug hweag-etfag.

⁵Hweag-etfag ma at Musa en diroho duluhup ulug hweag-esebag ale anyo higitdoho abirangge walug o Sabo saleg on anyo sokolma kabog-dik watfagdeg it ap homi TUHAN omaliki etmano mundoho wene kabog-dul ulug etma neg kabog-debag.

⁶Kabog-debag ma at Musa en hweag-esauk kwit, “TUHAN en airoho diyug ulug hweag-hesasi aire hiren At ombagbag seleg mundoho wereg lit enam atuk anyo hinil howag ulug hweag-hesasi,” ulug hweag-esebag.

⁷ Airoho mundoho hweag-esebagdeg at Musa en Harun hweag-utuk kwit, “TUHAN en airoho diyug isi higitdoho, wam waroho yaldukmu etmano lamihin deg enesiag elehapdoho foukwag ulug yalduk on inim, waroho yaleg angge yalduk on inim, TUHAN en hat hasiag inim it ap homi enesiag inim elehapdoho henobahaukwag ulug, TUHAN en isi ale higitdoho fik-fouk dik lakin,” ulug hweag-etfag.

⁸Airoho hweag-etfag ma at Harun anyo lebagdeg aren sapi yohombuk at onggwareg asiag elehapdoho foukwag ulug on fouk debebag on anyo mezbah wereg ma etmano lebagdeg warik lebag.

⁹Ware febagdeg at Harun omaliki en wam mep anyo at Harun og-etfag ma aren enggik dum mep anyo fam yuhul hebagdeg mep anyo mezbah andimuk unggut ohwan ilit deg angge etano fene arorebag. Airoho debagdeg mep fomane etmano re mezbah indip kwe hilil-esebag.

¹⁰Airoho debagdeg TUHAN en Musa hweag-etfag higitdoho wam anyo amug inim, amuanggo inim, wam anyo famen mun fano angge etmano mundoho inim de mezbah emberimmu etmano yalfag.

¹¹Famen de wam anyo ahap inim, ino inim neg de o Sabo salegma etmano dag fil en yalfag.

¹²Ai mundoho debelug at Harun en onggwareg fahet yal angge yal-utuk on ulug anyo watfag ma, it omaliki etmano en mep anyo oko at og-etfag ma aren wam amep anyo mezbah ombandu ohwan ilitdoho fene hilil-esebag.

¹³Ai debebag ma iren wam unggul inim, wam anyo famen foma amu on etmano inim at og-etfag ma aren mezbah emberimmu etmano yalfag.

¹⁴Ai en wam anyo en alot hwililig neg de ik wiroho yal angge yalduk on inim mezbah fam etmano yalfag.

¹⁵Anyo mundoho og-utlug aren kambing eke ap homi enesiag fahet waroho og-etfag. Ne, kambing aire at onggwareg asiag fahet waroho og-utuk on anyo inim seberoho og-etfag.

¹⁶Ai en ombolim de wam yal angge yal-utuk on fahet anyo walug de awene melaleg wereg aleroho og-etfag.

¹⁷Ai mundoho debebagdeg yal angge nukoho hundig-hundig fam yal-utuk on fam seberoho ulug de, tepung enenggik misig en yinggiloho wauk hagdoho webagdeg mezbah emberimmu amep eleg angge on ulug yal-etfag.

¹⁸ Ai en de sapi yohombuk on misig eke inim domba yohombuk on misig eke inim webagdeg waroho it ap homi enobahet anggerang owam watfag. Ware folug it Harun omaliki etmano en amep oko Harun og-etfag ma aren mezbah fam ombandu ohwan higitdoho fene etmano hilil-esebag.

¹⁹Kambing inim sapi inim eta famen amug wereg ma re wam biren etano amigmu febagdeg,

²⁰at Harun en wam biren etano mezbah emberimmu etmano yalfag.

²¹Ne, wam anyo en aho inim, amig inim de TUHAN obahet enenggik dum waroho og-utuk aleroho ulug og-etfag. Aire TUHAN en it imam on en hwelauk kamuhup ale ulug Musa hweag-etfag ale higitdoho debag.

²² Etmano at Harun en mundoho waroho og-etfagdeg at Harun enggik it ap homi Israel on enemberim mu lahabe febagdeg aren fanoap debesebagdeg wambik watfag.

²³Ai en at Musa inim Harun inim TUHAN Obam Sabo salegma anyo kwebagdeg wilibik waharuk kwit it ap homi Israel on anyo enobam fanoap debeseruk kweleg, it ap homi Israel on mundoho anyo en TUHAN aseleg ambogbag enam aik waharukmu hebag.

²⁴Airoho hebagman fetagdoho etano At TUHAN en indok belabik watfag ma yal angge waroho yalfag on inim fomane amug wereg angge mezbah emberimmu welatfag on etmano inim mun han naukmu hebag. Airoho naukmu it ap homi Israel on etmano en hebagdeg iren enahayeg humon duruk kwit enelenggen dimi-debelug enorohole belabeg sahaun uruk kwit apne webag.