Read Ninia Yali YEREMIA 1 Bible Online

YEREMIA 1 - Ninia Yali bible

YEREMIA 1

¹Buku su re hun Hilkia ebe imam on o kota Anatot wilayah Benyamin en on fam etma welatfag ahun ai amloho Yeremia en ebag ale baleg wereg.

² Yosia hun Amon amloho anyo Yehuda fam raja wereg kweleg neg tahun nougwal on wereg kweleg TUHAN ele Yeremia fam hweag-etfag.

³ Ai ebagdeg en de TUHAN en ele eke nim eke nim, at Yosia amloho Yoyakim en melal-enepuk wereg li em en anggere at Zedekia hun Yosia amloho anyo en melal-enepuk wereg latfag on anyo tahun nanggolop on wereg huli eta fam hweag-esebag. Tahun ai fam bigalem foab on wereg kweleg de ap homi Yerusalem on sabu hetdoho hwik-enebik laukmu omano og-eneplug lebag.

⁴TUHAN ele an nobam uruk kwit,

⁵“An den hat hisinga ahummu owan wal-am fug kweleg, ne hat owan endag-am fug kweleg, An de hat hebe nabi ap di unggul unuk su unggul unuk enobahet welamag ulug momaloho unduhuk hobaharihik,” ulug hweag-nitsi.

⁶Airoho isimu an den onggo uruk kwit, “TUHAN Mun Leho Welahen on nakni, an de nebe ket sauwe on deg lahimu re an nele uruk ale mun nong-hong deg lahi,” ulug hweag-itihik.

⁷Airoho irihikmen TUHAN en onggo uruk kwit, “Haren an nebe ket sauwe deg lahi uruk eleg. An den ap di akit lakin ulug mon-hapuk halug hat lahun neg, ne An den diroho iyug ulug abirangge hweag-hutuk halug, haren it hweag-esahun neg.

⁸An den hat hinim welaheg, halong bal-husug laheg, deg laruhuk anggere haren it fam hakol duk fug. An TUHAN nele mundoho ihi!” ulug hweag-nitsi.

⁹Airoho hweag-nutlug etano re TUHAN enggik oko an nambilik fam sen-hauk kwit ele diroho isi, “An nele uruk kahi on su holug de hambilik fam in.

¹⁰Yoho su fam An den di enunggul unuk su enunggul unuk mel, kerajaan mel halong welamag ulug halongge hobaharuk kahi. Halongge hobahaki on aire unggul wat-eseheg, luluhun eseheg, enden eseheg, elehap debeheg, wiri feheg, yaho feheg, duruk karuhun on og-hirihi” ulug hweag-nitsi.

¹¹TUHAN en an hein og-neauk kwit, “Yeremia ao, haren nunggwangge hil hehen?” ulug isimu, An den de, “TUHAN nakni, an den de e hendahe hag badam enggik nil hihi” ulug hweag-itihik.

¹²Airoho hweag-itihikmen TUHAN ele uruk kwit, “Demdoho ehen, An den nele ihi on etma abiangge demdoho neg atuk kamag ulug An den hwale[1] foruk kahi,” ulug isi.

¹³Airoho isireg TUHAN en nikangge hein og-neauk kwit, “Nunggwangge eke hil hehen?” ulug isimu, an den onggo uruk kwit, “Utara fil etleman de waruk kwenang on fam ilonggoma yohwareg angge re hulug duruk kwit hebeloho suma fil hililik wam ale durukmu hihi” ulug hweag-itihik.

¹⁴Airoho irihikmen TUHAN ele uruk kwit, “Utara fil en anggin-fanggin fu lehelug waharuk kwit o kwenang su fam ap homi wereg on abirangge enobam aik waruhu.

¹⁵An den de enunggul unuk utara fil wereg on mundoho en o Yerusalem sebelik kwik wamag ulug hweag-esahuk. Mu re o kota au en fak lehet maseroho oho on mel, sokole humon hilinggig on mel, ne o Yehuda fam kota abirangge mel, iren del dahup.

¹⁶An nomaliki en An enambol yig-nutlug siag duruk ai fam An den it unggum og-esahuk. Iren de ilah amu on fahet di angge su angge og-ereheg, ne kembu ahut ilitdeg wiroho apne weheg, duruk.

¹⁷Yeremia ao, hat fik-fouk din! Hat hebe lalug de An den ik lakin ulug hweag-hirihi ale eta abirangge it hweag-esakiyug. Hat it nim ambi atlug hakol eke nim amag ulug An den habihi ha no re hakol duk fug.

¹⁸Holin! Hat de it ap homi o kwenang su fam on en hele sahaluhup. Aire it ap raja Yehuda on mel, pemerintah enobahet yabuk duruk enap mel, imam mel, ap homi we on mel en duhup. Famen de yoho su fam haren it nim wal-wal amuhup en de homamne og-hitmin. Hat hebe re o kota helep lehet wirikdoho oho on hag aheg, bosimanggen unduhuk on hag, aheg, obahat tembaga on en wirig on hag aheg, duhun. An den hat hinim wereg lit halong baloho wereg ma re iren hat halong elehapdoho hobahakup fug. Ulug An TUHAN en nele mundoho ihi,” ulug hweag-nitsi.