Read Ninia Yali YEREMIA 10 Bible Online

YEREMIA 10 - Ninia Yali bible

YEREMIA 10

¹Ap homi Israel on de TUHAN en hit fahet wene eheik on su henesanggo holiek,

²Aren uruk kwit, “Hit de ap enunggul unuk amu on en eneitogdoho duruk ale etma muko deheg, bohol fam eneg angge wereg ma it enunggul unuk amu-amu on en enakol duruk angge etma fahet hinil halug henowag elek deheg, durukam fug.

³It enunggul unuk etman eneitogdoho melaleg wereg ma duruk-wauk kwit wereg on etma ambiangma atuk ale eke wereg fug. Iren e ohweimu en murik lalug, ap e on fam ahut ilit duruk ale oluk on fam de kembu ahut ilitdoho hilinggukwag ulug mingming duruk.

⁴Ap anyo en ilit deberukmu ebene alili angge emas, perak on mel borebelug, daloruk no ulug bosiemanggen ware foruk.

⁵Kembu ahut ilitdeg etma re ap kuluk yabukmu ap ilit angge ilitdoho forukmu wereg hag deg. It ai en enele eheg, kwe laheg, duruk fug mu, ap en hambohoruk. Anggere hiren it fam henakol duk fug, ne iren enolok ale henebeheg, ne fano ale henebuk ale oho re duk fug alereg ma henebuk fug ale welaheg, duhup,” ulug ebag.

⁶TUHAN Hat mun ebe on Hat hag on amu on eke wereg fug, Hat hunuk de mun leho wereg ma omamne humon welahen.

⁷ Hat hebe di enunggul unuk su enunggul unuk fahet raja welahen on, ap sa hag angge Hat hobam demdoho bouk fug angge welam alereg? Di ap su ap enesahalimu en enggat on wereg famen oho, ne it enowesi raja-raja wereg famen oho, TUHAN nenakni, Hat nim de ap ilit duk on eke wereg fug, we nenakni Hat neg de demdoho halong bolug leho hobaharuk kam ale deg.

⁸It etma enanggembu dewa re we e on en deg ma fano ale mamul-enebuk fug alereg ma re it etma re mun sohou morue on en deg.

⁹Kembu aire no emas mel perak mel o Spanyol nim kota Ufas nim en walug wahausa angge fam sapliroho wirig, abirangge etma re ap hwesesengge wauk enap mel, emas fam buhun duruk ale enoluk enap mel en debousa on. Asum de il ungu heik deg on mel ne ungu healeg on mel fam, ap sum wutuk ale enoluk on en hwal halug wiri fousa angge wandeg.

¹⁰Famen Hat de TUHAN, Allah demdoho on, Allah ap homi enoluk og-esauk kahen on raja heitog eme welahen. Haren lahe holok durukmu re, kwenang elek duruk, ne Hat bererag durukmu re di ap su ap hambuk ha fug alereg. (

¹¹Yaho hit TUHAN omaliki, hiren it hweag-esauk kwit, kembu dewa bohol kwenang nim wal-duswa fug on etma re mundoho eleg amuhup. It de o kwenang fam suman mundoho eleg amuhup, ulug hweag-esakiyug.)

¹²TUHAN en kwenang omamne fam wal-debag, enda wenggeleg fam kwenang hilinggi febag, ne enda boruk fam bohol diahan debebag.

¹³Aren ele fam amin ulug uruk kweleg, ik huli-huli wareg[6] on anyo fam en ik ele ulung debag. Kwenang ambiang-ambiang etman Aren hena mondorik watfag, ne osit anggeleg elekwe oweal baloho lauk, ne hol de Aren obale waroho forohoma etman mondorik waharuk.

¹⁴Airoho debag ale etma halug de, ap homi en wenggel-dauk kwit, an de morue deg lahi ne wenggelduk on wereg fug ulug fu dobahat da alereg. Ap emas lalduk ale enoluk on de, iren ahut ilit duruk on anyo re oluk wereg fug we seiale deg ma enorohole wamburuk.

¹⁵Kembu etma re mun siag deg ma re, bulip deheg, enalitno deheg, duruk ale aire higit.

¹⁶Yakub akni Allah aire kembu etma hag deg fug; At de di angge su angge wal-debag on. Unuk de TUHAN di ale su ale duk alereg on ai; Aren de Israel on omaliki amag ulug momal-enepfag.

¹⁷Ap homi Yerusalem on en ap en huk henebehesa anggere mundoho fik-fouk diek!

¹⁸Ketia au fam de ap homi Yehuda on abirangge TUHAN en sabu hetdoho hwik-enebik lahu; hit abirangge re mundoho luluhun hesahup ulug TUHAN en eheik alere ai.

¹⁹Ap homi Yerusalem on en hwiruruk kwit, “Nit de yebil mun anggen deg lahema, fano ahe fug ha alereg. Endam niren boruk kwit ouk aure hahuk neg, boruhuk famen ha fug alereg kweleg uruhuk.

²⁰Niren on kemah mundoho siag atsi, ne sabu re mundoho kong disi. Mu re ap eke en kemah wireheg, sabu ilileheg, duk fug alereg, nit nenomaliki re mundoho lausa ma anggere” uruk.

²¹Airoho urukmu an den onggo uruk kwit, “Ap nit melal-nenepuk on etma re mun morue deg. TUHAN duhuk ale hweag-nesowag ulug iren heng uruk fug ai fam de ambiangma nong-hong urukmu nit di kwe su kwe del-fol deg lahe au.

²²Holiek! Unggul unuk misig eke utara fil en ap enowag elek deg ale duruk. Autsi sehen seneg enap en de o Yehuda kota kwe oma mun birim debelug ap mun obale neg debehup. Mu re olomene etma herag atuk kamuhup” ulug irihik.

²³TUHAN nakni, ap misig en eke an nebe diroho atmin ulug hwale fahat deheg, ite an noluk diroho welaruhuk ulug hwale feheg, duk fug ale aire an noluk deg.

²⁴TUHAN nenakni, Haren nit komo-nenepihin aire fano famen de yeik waroho ouk nenebuk on fam de komo-nenebuk fug. Nit abirangge mundoho warahe ha alereg ma re, Hat holok en duruk kwit halug de, unggum og-nesa fug.

²⁵Hat hahumu holok aire di ap su ap Hat fahet fag-duruk fug enap, ne iren Hat hobahet duruk eleg enap ai fam hilili fesein. It ai en de Hat homaliki omano mundoho elehap debeseheg, ne nit nenobam luluhun debeseheg, duswa anggere.