Read Ninia Yali YEREMIA 11 Bible Online

YEREMIA 11 - Ninia Yali bible

YEREMIA 11

¹TUHAN ele an nobam uruk kwit,

²“An den nomaliki nim sali wat-esauk kwit indip di on di on duhup ulug sali watihik on ai fu debein. Haren ap homi Yehuda on mel Yerusalem on mel fam hweag-esauk kwit,

³An TUHAN, ap homi Israel on enakni en de ap homi An den sali watuk kwit indip di on ha di on ha duruk kamuk irihik on holoho duruk eleg on homan debeseruk kahi.

⁴Sali aire An den it enombawi o Mesir fahet iren indok ambulbulmu hag boruk katfag ma ai en og-eneplug wilibik waharuk kwit sali watihik. An den it fam uruk kwit An nele holoho deheg, An den diroho airoho diyug ulug hweag-esauihik on deheg, duruk kamuk irihik. Ketia an den nikale ap homi Yehuda on mel o Yerusalem wereg on mel fam uruk kwit, hiren An nele holoho duruk kamuhup halug, hit de An nomaliki amuhupmu An de hit henakni Allah aruhuk irihik.

⁵Iren wene eta higitdoho duruk halug de An den sali it enombawi fam wat-esauk kwit kwenang ketia it wereg ma, kwenang mundoho hesiligmu di angge su angge sig belaboho wereg ma etma it og-esahuk irihik aleroho og-esahuk,” ebag. Ai ebagma an den onggo uruk kwit, “TUHAN nakni, aire fano ehen” ulug hweag-itihik.

⁶Airoho irihikmen TUHAN en an nobam uruk kwit, “O kota Yehuda on fene mel o Yerusalem koboke kwe mel etma lalug An den wene imin on su ap homi etma hweag-esa lakin. Iren de An den uruk kahi on ai fu debelug an nim sali watuk kwit diroho duhup ulug wene indip wereg on eta holoho neg dukwag ulug hweag-esakiyug.

⁷An den it enombawi o Mesir en og-eneplug wilibik waharuk li em, An den nele anyeroho iren An nele holoho duruk kamag ulug hweag-esauihik. Ne, wene ai fahet ketia huli en nim An den nomaliki enolukap deberuk kwit,

⁸iren An nim sali watuhuk on ai holoho duruk kamag ulug hweag-esauk kahi, famen, iren holduk fug lit nele holoho mel duruk fug. Iren de enenda haro deg lit endam duruk katfag hagdoho enolok deg. Ai fam de wene sali wareg on ai fam unggum enobam aruhu ale ulug baleg wereg anyo re An den it enobam feserihik ai” isi ebag.

⁹Ai en TUHAN ele an nobam eke uruk kwit, “Ap homi Yehuda on mel o Yerusalem wereg on mel en de An nele sahale folug duruk kamuhup ulug wene misig seberoho matswa.

¹⁰Iren de siag it enombawi en An nele holoho duk fug angge duruk katfag on, iren kembu ilah amu on etmano apne wauk kwit, An den diroho airoho diyug ulug hweag-esauihik on duruk katfag hag duruk fug. It Israel on et Yehuda on et de An den it enombawi mel sali wat-wat atuhuk on anyo dahandoho neg duruk.

¹¹Ai fam de, An TUHAN en it enoluge foruk kwit, anggin on An den it enobam feik waruhukmu re it de ohwal amuhup fug. Iren lahe An nobam let-enebukwag ulug heng napuk halug An den enele holduk karuhuk fug.

¹²Airoho uruk en it Yehuda on mel ap homi Yerusalem on mel en kembu ilah amu on, iren di angge su angge waroho og-utuk on etma fam let-nenebin ulug heng-ik lauk kamuhup. Men de anggin anggolo on enobam aik waharuk li em de ilah etman higitdoho enahap wendat-enebuk fug alereg laruhu.

¹³Ap homi Yehuda on en kembu ilah re humdoho deg ma it enobam kota humdoho deg eta hag enanggembu oho airoho deg. Ap homi Yerusalem wereg on en mezbah re kobokwe o Yerusalem fam wereg ale eta hagdoho wutlug iren Dewa Baal fam wam waroho og-utuk.

¹⁴Ai fam de, Yeremia ao. Haren it enoba het somban eheg, An nobam let-enebin ulug heng nabeheg, duk fug! It anggolo deg li em An nobam let-nenebin ulug heng napuk halug, An den enele holduk karuhuk fug,” isi.

¹⁵TUHAN en uruk kwit, “An nomaliki An den nenda hundig enepuk kahi on en mundoho enolok ale duswa. Ma re it de An nobam wirigmu aire welam fug alereg. Iren boruk kwit de sali-sali angge wareheg, wam waroho feheg, duruk eta fam de anggin on enobam aik waruhu on ai kwe bale foul boruk kwit duruk a? Ai fam iren enahayeg ha alereg a?

¹⁶An den it fahet uruk kwit, it de e zaitun enggela heik deg on, anggen mun fano on neg yihig on irihik. Famen ketia An den nele sipuk delelang duruk kwit e ai enggela mel, enggik amlo mel mundoho han yaluhuk.

¹⁷An den neg Yehuda nim Israel nim unduhuk ferihik. An TUHAN di ale su ale dihi ha ale on anyo en dirihik. Famen ketia re An den it fam anggin fesehuk ulug melaloho ferihik. Aire it enonggwareg enobabe elekwe, iren de enolok ale duruk kwit, wam waroho Baal fam og-utuk katswa ma An nolok atihikdeg duhuk” isi ebag.

¹⁸TUHAN en de ap an naselei on en duhuk ale ulug wene maho fousa ale anyo an hweag-nitsi.

¹⁹An de domba ebe watuk mu walug laukmu enda meneni esa fug angge lauk anyo hag deg lahi. Iren duhuk ale ulug wene baloho foruk on aire an nobahet ulug uruk men de an nepelegdoho welatihik. Iren uruk kwit, “Niren e au anggen yihiruk li em murukohon. Niren eleho foulmu re at unuk ap en enapeleg amuhup anggere” uruk katswa.

²⁰Airoho uruk katswa ma An den TUHAN fam somban uruk kwit, “TUHAN nakni Hat di ale su ale mundoho dehen ha on, Hat de wene ayowiroho kong-duruk ale fahet katukdoho duruk kahen on welahen; Haren neg ap homi boruk on mel wenggelduk on mel abut bal-esauk kahen. An nawene su re Hat henggikmu neg foruk kahi nakni. We Haren neg ap etma fam ambiangma debeserukmu an nil heahuk lamag, nakni,” ulug somban irihik.

²¹Ap homi o Anatot[7] on en de an waramag ulug enenda boruk kwit iren diroho uruk katswa, “Haren TUHAN en uruk ale nit fam hweag-nesauk kwit neg welaruhun halug niren hebe binggi howaruhuk” uruk katswa.

²²Ai fam de TUHAN di ale su ale duk alereg on anyo en uruk kwit, “An den it unggum og-esahuk! Iron ap sauwe re dog elman waramuhup, ne it enomaliki doron de siburu obok en waramuhup.

²³An den de ap homi Anatot on fam anggin anggolo on feseik waruhuk li mundoho eneko ferihik mu re, it unggum enobam atuk li ai higit aik waharuk li em de, ap misig ulug oho eke lil amuhup fug” ulug hweag-nitsi.