Read Ninia Yali YEREMIA 12 Bible Online

YEREMIA 12 - Ninia Yali bible

YEREMIA 12

¹TUHAN nakni, an den nawene walug Hat hakit wahi ha man de we Hat hamu neg de demdoho on welahen ha alereg. Famen de an den Hat hobam katukdoho duruk ale ai fahet hein og-heauk kahi: “Nunggwelug ap enolok ale duruk on dung on atuk? Nunggwelug ap bekitdoho duruk eleg on en duruk ale ambiangma fano neg atuk?

²Haren it de olohoream debeselug enggelangge wilipuk on hagdoho deberukmu, omanggen belabeheg, log aheg, dulug anggen yihiruk. Iren de Hat hobahet enele fam mun fano ale neg uruk, famen enendama re Hat fu hobaharuk fug liren duruk.

³Famen de, TUHAN nakni, Haren an de fu nobaharuk kahen. An den duruk kahi ale re Hat hil neauk kahen ne An nendaman Hat hobahet boruk kahi ale re Hat holuk deg. Ap enolok ale duruk on etma re lit-eneplug wilibik lag, it enebe re domba warukoho walug lauk hag og-eneplug lakin. Airoho lalug it kahal enusug weregman neg it enowaruhup.

⁴Ke huli o kwenang su fam iringgig lit neg welaruhu, ne yabuk kwe omano enggelangge re mundoho bug deg lit neg welaruhu? Suwe mel oluk-oluk angge amu on mel nit nenunggul unuk on enolok fam waratswa. Iren uruk kwit it fam atuk ale etma an den[8] hahu fug uswa” ai fahet hein og-heauk kahi ulug hweag-itihik.

⁵Airoho irihik mu TUHAN en uruk kwit, “Yeremia ao, haren ap nim wal-wal atuk men oho re hebe lilipna ahen ha alereg, ma re haren kuda nim wal-wal ahep hale deg a? Kwenang hambuk deg ma fahet de hat hakol en duruk kahen, ne Ik Yordan elanma ohwei obahare on etma fam wereg lit de keroho dehen ha alereg?

⁶Hat de it hori-herekwei on en fam en oho enal belesim wat-heausa; iren de hat hebe howatul ulug oho duruk. Anggere iren enele buhun atlug uruk men oho re it enele uruk on fahet demdoho bouk fug.”

⁷TUHAN ele uruk kwit, “O kwenang An nangge atsi on anyo re embeserihik, ne An nomaliki nenda hundig enepuk kahi on etmano oho re it eneselei on enenggikmu og-esauihik, ne An nebe welahimu fahet de hwale fohuk fug.

⁸An nomaliki An den momal-enepihik on de An nele sahale folug duruk; no singa en ohwei fam en kouwa duruk hag iren An nobam airoho duruk. Ai fam An den it nerim enepuk kahi.

⁹It de suwe findi en su eke foma-foman mug hauk hag duruk. Enggelama enoluk wereg on etman it senggel enebik wamag ulug wol-enebiek.

¹⁰Ap bohon di ale su ale duruk enap en An den anggur yabuk unggul wat-esauk, ne An neyabuk wirig iren sobit-sabat esauk. An nanggwenang mun orole ebe deg ma omano, iren ahamdoho lei birim deg ma deberuk.

¹¹Yu, iren de An nobam nanggwenang lei birimdoho nahumu siag ale deberuk. Abirangge re heila deg ma ap en eke fu deberuk fug.

¹²Lei foma fil domma etman ap en herahaukoho waharuk. An den de weim ambiangman o kwenang abirangge siag amag ulug mondorik waharukmu re ap misig ulug oho eke enenda seroho wereg fug.

¹³An nomaliki en de gandum a folduk famen de alog angge on anggen balduk. Iren anggolo ngogdoho duruk famen, iren duruk on ai ambiangma eke fano atuk fug. An den mundoho nolok enepuk kahimu re iren anggen yihig fanoroho balduk fug ai” isi.

¹⁴TUHAN ele uruk kwit, “It negara Israel nim horogdoho wereg on o kwenang An den nomaliki Israel on og-esauihikmen siaho fousa on anyo fahet wene diroho su. Kwenang fam en wilibig angge sanog duruk hag, ap enolok on etma it enanggwenang fam en An den wilibi fesehuk, ne Yehuda re it enenggik fam yinggiloho forohoman An den fisela esahuk.

¹⁵Famen de mundoho fisela esahukdeg de An den nikangge it nenda hundig enebuhuk; it enunggul unuk domog de An den og-eneplug enonggwareg enanggwenang fam feseik lahuk.

¹⁶Iren lahe enenda abirangge fam wene An nomaliki en An mot-napuk kwit duruk on anyo walug iren hombuk balduk kwit, ‘TUHAN oluk wereg on anyo unuk fam’ ulug hombuk balug, atam iren An nomaliki fam mamul-enepuk kwit Baal fam airoho hombuk baliek ulug hweag-esauk katswa hag, An nobam airoho duruk halug de, it ai oho An nomaliki on nim sebereg ma it oho dungdoho welamuhup.

¹⁷Famen it enunggul unuk An nele higitdoho duruk eleg halug, An den kwenangma yaho angge sanogdoho elehap duruk hag sanog esahuk. Ulug An TUHAN en nele mundoho ihi” isi.