Read Ninia Yali YEREMIA 13 Bible Online

YEREMIA 13 - Ninia Yali bible

YEREMIA 13

¹TUHAN en an mingming napuk kwit sarung horog angge lenan fam wirig angge hondurik lalug wan-dukwag ulug hweag-nitsi. Ne, wan dulug de ik fam bal-ha fug isi.

²Airoho isimu an den sarung horog angge anyo hundurik lauihikdeg wan-dirik.

³Ai en TUHAN en nikangge an nobam ele uruk kwit,

⁴“Ik Efrat ikma lalug sarung ai helep aeg honggolegma etma heraho feiyug” ulug hweag-nitsi.

⁵Airoho isimu re TUHAN en din ulug mingming napsi ale higitdoho an lauihikdeg sarung horog angge anyo Ik Efrat horogma etma heraho feik lauihik.

⁶Il eke welatlug TUHAN en an mingming napuk kwit sarung anyo Ik Efrat aegman nikangge wag lowag ulug isi.

⁷Ai isimu an lauihikdeg sarung horog angge anyo heraho ferihik mu etano en oko wilibi feik waharihik. Men de sarung anyo re mundoho fubut disireg de mun siag deg latsi.

⁸Airoho deg ma TUHAN en nikangge an nobam ele uruk kwit, diroho isi,

⁹“Ai higitdoho An den ap homi Yehuda on mel Yerusalem wereg on mel fam debehuk. An den de iren enawonog hum atuk on ai mundoho luluhun esahuk.

¹⁰Enunggul unuk mun enolok on au en de enenda haro deg lit An nele holoho duruk fug. Iren de ilah amu on obahet duruk. Ai fam it de sarung horog angge mun siag deg latsi ai hag amuhup.

¹¹Sarung horog angge ap bug deg on fam ketketdoho bug deg hag, An den boruk kwit ap homi Israel on nim Yehuda on nim de An nim airoho het deg lamuhuk berihik. Airoho deg ma iren de An nomaliki nunuk mot-debeheg, along beheg, duruk on debehup berihik. Famen iren de An den uruk ale holoho duruk ale enerim deg latswa” ulug isi ebag.

¹²TUHAN Allah en an nobam ele uruk kwit, “Yeremia, haren de An den nele uruk kahi on su ap homi Israel on fam hweag-esauk kwit ikwag ahap on etma domog fam de anggur ahaik ele sopdoho hwenangguhup ulug hweag-esahun. Haren airoho hweag-esaukmu, iren onggo uruk kwit, ‘Ikwag ahap on fam anggur ahaik hwenangguruk ale re nit nenapeleg deg behen?’ uruk kamuhup.

¹³Airoho uruk halug haren it fam uruk kwit, ap homi o kwenang su on de ap raja-raja Daud ambiangma on mel, imam mel, nabi mel, ap homi Yerusalem wereg on abirangge mel, An den anggur ahaik en ele sopdoho yohware fesehukmu re iren siomo duhup.

¹⁴Airoho duhupmu re An den it-it eke en eke fam kweik deheg, dukwag ulug debesehuk. Ap sobal on et sauwe on et nenda esa fug angge airoho debesehuk. It de An den enelaheg esalug nenda esa fug angge mundoho elehap debesehuk. Ulug An TUHAN nele mundoho ihi” isi.

¹⁵Ap homi Israel on, TUHAN ele mundoho eheik! Winik-wonog uruk eleg, At ele holiek!

¹⁶Aren hup owan mondorik waharuk fug kweleg, ne heneyog dom fam owan dung duk fug kweleg, hiren seleg fahet ebereg welahep on ai Aren ahamdoho heik deberuk eleg kweleg, hit henakni TUHAN Allah ai leho foruk kamuhup fano.

¹⁷Haren holduk ale fahet herim deg lahen halug de an de nele eleg angge oba yatuk karuhuk. Nenda feik lahaik wambuk hat hawonog atuk kahen ale ai fahet oba yag-henepuk karuhuk. TUHAN omaliki omano sabu hetdoho og-eneplug lauk en An nilue durulug wamburuk.

¹⁸TUHAN en an nobam uruk kwit, “Raja mel at ohwe mel takhta fam de mahkota ebe on at unggulmu bug deg angge anyo oko wambeheik anggere hwerieg wereg ma etman wambukwagdoho hweag-esakin.

¹⁹O Yehuda on en kota selatan fil etmano mundoho ap salik wahesa, ne ap saleg on ai fam en foroho eke wilibik la fug alereg. Ap homi Yehuda on abirangge hohouk eneplug hwik-enebik laukmu etmano lahup” isi iyug.

²⁰TUHAN en ap homi Yerusalem wereg on fam uruk kwit, “Fu debeyek! Hit henaselei on de utara fil en waharuk! Ap hiren along balduk kahep on, ne hiren henenda obam hembisig lahep on anyo re kema wereg.

²¹Hiren ap henori on fam hag debeseruk kahep on etmano en hit henalong elehapdoho henobahalug hit henebe it enalong apma henobaharuk mu re nunggwe ehep ha alereg? Hiren de homi omalik endetuk kwit ouk hauk eta hagdoho hehep ha alereg.

²²Hiren uruk kwit, mundoho etma nunggwe fahet nit nenobam aik waharuk ulug hein og-ale uruk kahep ane, ne nunggwelug hit henasum denel esalug enomamne hasimeg hinim nohoruk ulug uruk kahep ane. Fu debeyek, aire hit henesiag de mun hum alereg ma henobam aik waharuk.

²³Ap ahap sing on en ahap il amu on aham duk alereg a, ite no harimau hwesesengge baleg on eleho fouk alereg a? Airoho duk fug alereg! Ai hag de hit henolok fam duruk kahep on etma re fano ale dehep ha fug alereg.

²⁴Hit de An den ahap angge o leimu en hol en fi esauk hag, hit del-fol hesahuk.

²⁵Hiren An henapeleg atlug ilah obahare on omano fam dip debelug duruk kahepma re hit henobam aruhu ale ulug An den fouk deberihik on de etma.

²⁶An namu en de henasum henebe fam en denel esahukmu hit henabulukwe kohouk atlug henenggali hahup.

²⁷An den nil hesauk men de hiren de An nerim boruk kahi ale omano durukmu hesauihik. Hiren de ilah amu on omano duk fene mel, yabuk kwe mel mutlug lauk kwit, ap en enori enohwesi fahet siag hauk en mug-hauk hag, ite no kuda yohombuk on en kuda hwe on fam amolmol duruk em duruk hag, hiren airoho durukmu henesauihik. Ap homi Yerusalem welahep on henebe alemat atuk kamek! Hit de nunggwe salim henolok fam duruk kahep on etma eleg angge welamuhup?” Ulug isi.