Read Ninia Yali YEREMIA 14 Bible Online

YEREMIA 14 - Ninia Yali bible

YEREMIA 14

¹TUHAN en hobi humon laharuk on fahet an nobam diroho hweag-nitsi,

²“Yehuda re obam kota omano waram ale duruk en enda hesilduk kwit wereg. Ap homi o ai on de kwenangma yinggig lit ngururuk, Yerusalem let-nenebukwag ulug nenek yoba duruk.

³Ap dung on enamingming angge re ik di kwe su kwe herarik lowag ulug mingming-enepuk; airoho urukmu ik sene habulig kwe iren hera dik lauk, famen ik mundoho eleg atsi. Ai fam de ikwag iren walug lauk on omano owag neg wereg ma nikangge walug waharuk. It de enenda nong-hong uruk kwit enenda siag atlug enenggali en enerohole saloho waharuk.

⁴Osit de wambik waharuk elegma kwenang wirik-kelog deg, ap yabuk wit-dauk on de enenda siag atlug enerohole sal-dauk.

⁵Enggelangge mundoho eleg en de, rusa isinga angge lauk. Omalik ket endag-atuk on anyo re o leimu omano embeselug lauk.

⁶Dom anggolopma re keledai il bolog on unduhuk lit neg wereg, enggelangge eleg en de il halo-halo uruk; at de no serigala en duruk hagdoho nobong-hobong angge duruk.

⁷An nomaliki en hwi-napuk kwit, ‘TUHAN, nit nenesiag duruk on en de nenonggwareg fam hekip nesauk famen de Haren sali wat-nesauihin ale higitdoho let-nenebin. Hat de niren hum aleroho lin heahuk; Mu re nit Hat hobam siag duruhuk ai demdoho duhuk.

⁸Hat de Israel nenap en nenenda ebereg lahe on, nit alemat am ale duruk men nenahap wendat-nenepuk kahen on de we hat hamu neg. Famen de Hat de nit nenanggwenang fam oma nunggwelug ap bohon hagdoho deg lahen, hat de ap o ekema-ekema lauk on en hup misig noholug lauk hag etma nunggwelug deg lahen?

⁹Nunggwelug Hat de ap enenda nong-hong uruk on hag duruk kahen; ite ap enalongdoho duruk on en famen let-enebuk fug alereg hagdoho duruk kahen? Ai famen, TUHAN Hat de dik-demdoho nit nenesahalimu welahen, nenakni! Nit Hat homaliki oma re lin nesa fug, nenakni’ ulug uruk” ebag.

¹⁰It enunggul unuk ai fahet TUHAN en uruk kwit, “An de ap An fam en buroho longgo uruk on, ne enonggwareg en enebe hwale fahat-dauk fug on etma nerim deg lahi. An den it enesiag napeleg aruhuk fug, ne iren siag duruk ai fam de An den unggum og-esahuk,” ebag.

¹¹TUHAN ele an nobam uruk kwit, “An den ap etma let-enebukwag ulug heng nabuk fug.

¹²Iren enambilik hweang wereg famen ohore, iren let-nenebin ulug An heng napuk men de An den fu debeseruk karuhuk fug; ne iren An nobahet nenda nahayeg howag ulug yaleheg, gandum anggen yaleheg, duhup famen ohore An den it enobam nahayeg esahuk fug. Ahamdoho re An den it enebe dog ambiangman nim, siburu obok en nim, ouk en nim mundoho elehap debesehuk” ulug hweag-nitsi.

¹³Airoho isimu An den uruk kwit, “TUHAN nakni, Hat hebe leho welahen on, Haren sali watuk kwit o kwenang su fam hundig-hundig enenda seroho neg welamuhup ulug irihin ai fam, it nabi en ap homi hweag-esauk kwit ouk mel weim abug mel welaruhu fug ulug hweag-esauk katswa ale Hat holuk deg,” ulug hweag-itihik.

¹⁴Famen TUHAN en onggo uruk kwit, “Nabi etma re An nunuk fam enele seiale wene walug waharuk katswa; An den it yonggo mon-enebik waharihik fug, ne An den it mingming enebeheg, nele it nim mareheg, dirihik fug. Iren ena hauk hag fam hauhuk ulug dindilduk on etma re An fam en de fug; iren de fobik aruhu ale fahet uruk kwit de fano am fug ale enele en felal-halug uruk.

¹⁵Iren An nunuk fam uruk kwit de o kwenang su fam siburu obok mel weim mel aik waruhu fug uruk katswa famen An den airoho irihik fug. An TUHAN en de hat Yeremia fam hweag-hutuk kwit, ap nabi An den mon-enebik waharihik fug on etma fam debesehuk ale hweag-hutuk kahi. An den de siburu obok en nim dog ambiangman nim enowaruhuk.

¹⁶Ap homi it nabi etman wene aruhu ale ulug hweag-esaukmu wausa enap oho re it enowaruhuk etma hag duhuk. It enebe wareg de o Yerusalem koboke kwe etma hwik-esahukmu ap sal-enebuk fug angge etma welamuhup. Aire it enebe nim it enohwesi nim enomaliki nim fam amuhup alere airoho hahup. It enolok ai fam de unduk neg howag ulug An den debesehuk” ulug isi.

¹⁷TUHAN en de an nenda hesilduk katihik ale anyo At omaliki fam hweag-esauk kwit an den diroho ukwag ulug isi, “An nunggul unuk on omano yebil eberoho wareg ma, ne it enebe ouk-bouk haukmu re, Ande bale fouk fug angge oba neg yatuk kaik, nukoho, hupanggo mel nilue durulug wamburuk kamag.

¹⁸An o leimu lauk men de ap weim fam en waratswa on wereg ma esauk kahi. O kota ilonggoma re ouk anggoloroho hauk kwit ap homi siburu obok en waram ale duruk. Nabi mel imam mel de iren duruk kamag ulug wereg ale omano duruk kwit en de ebe duruk ale omano fu debouk fug angge en duruk”[9] iyug ulug hweag-nitsi.

¹⁹TUHAN nenakni, Haren de demdoho Yehuda re domako embeserihina? ne ap homi Sion wereg on Haren herim enepuk kahen a? Nunggwelug Haren ouk henggik omamne fam nenowatuk kahenma nit fano atuk kahe fug? Niren hauk kahema re we enolok fam debeseruk on omano neg wereg kweleg, enenda seroho wereg on anyo hera deheg, ne ouk fano amuhuk ulug nenenda ebereg welaheg, duruk kahe ale etma re we alemaroho neg deg lahe.

²⁰TUHAN nenakni, we Hat hobam neg, niren siag duruhuk. Niren de nit nenonggwareg nenesiag fahet nim, it nenombawi enesiag fahet nim fag-duruk kahe.

²¹Haren nit halitno nesa fug, Haren sali wat-nesauihin on anyo wenggel-hakiyug; Haren nit nim sali-wat-wat atuhuk on anyo re eleho fouk fug. Yerusalem Hat hwerieg welahenma takhta ebe on anyo re haren halitno debouk fug.

²²Ap enunggul unuk amu on en kembu dewa en de osit kwenangma belabik wam fug deg, Ne, bohol en oho re at onggwareg omamne fam osit belabik wam fug alereg. We Hat hamu neg de nit nenenda ebereg welahe on, Haren durukmu neg de abirangge etma atuk.