Read Ninia Yali YEREMIA 15 Bible Online

YEREMIA 15 - Ninia Yali bible

YEREMIA 15

¹ TUHAN ele an nobam uruk kwit, “Musa nim Samuel nim dia unduhuk lit ap homi su fahet henda enebin ulug heng-nabuk men oho re it enunggul unuk su An den nenda enebihi fug ha alereg. An de it nil kumu esa ale nerim napuk anggere, unggul unuk aure lowagdoho hweag-esakin!

² Iren hat hein og-heauk kwit, nit kema laul uruk halug de haren diroho hweag-esakiyug, ‘TUHAN ele uruk kwit, Ouk fam en waramuhup ulug eneko wereg on de ouk fam en waramag. Ne, weim aegman waramuhup ulug eneko wereg on de weim aegman waramag. Ne siburu obok en waramuhup ulug eneko wereg on de siburu obok en waramag! Ne, sabu hetdoho og-eneplug lahup ulug eneko wereg on de sabu het deg on ulug og-eneplug lowag!’ isi ulug hweag-esakiyug ebag.

³An TUHAN en de unggum indip ohwan angge it enobam aruhu ulug fouk deberihik: It de weim ambiangma waramuhupmu it enebe wareg omano re mene en lit-deheg, suwe en nenggeg, maro on en elehap debeheg, duhup.

⁴ An den de ap homi o kwenangma wereg on mundoho en enamelmeldoho kumu esowag ulug debehuk. Abirangge aire hun Manasye at Hizkia amloho anyo o Yerusalem fam etma ap homi Yehuda on fahet raja wereg lit duruk katsi ale ai fam duhuk,” ebag.

⁵TUHAN ele uruk kwit, “Yaho hit ap homi Yerusalem fam welahep on, san hit enda hesahu? san hit nim enda hesilduk karuhu? san hit deg lahep ale hein og-hesaroho henekit waruhu?

⁶Hiren[10] de An domako nobahalug An lin neahup, ai fam de An nenggik leko hit luluhun hesahuk ai An nolok anyo sebel halug wereg ale re mundoho ko napuk anggere.

⁷Kwenang su fam o kota domog etma fene re An den hit de enggelangge bug on hag hwik hesahuk. Hit henebe An nomaliki deg lahep famen de, hit henebe welahep ale ai aham duruk kahep fug mu re, An den hit henebe mel hit henomaliki mel elehap henobahakuk.

⁸Hit henanggwenang fam etma re homi sohwe en neg hopo uhup, ik elanma iliangge wereg on maben hag famen it alongdoho deg lamuhup. Ap de enebe sauweman An den enowaruhuk, mu re it enesinggasi re nenek duhup. O nukoho anggere An den ap mundoho elehapdoho enowatuk on eke mondorik waruhukmu, iren enakol atlug enenda fit aruhu.

⁹Hwe omaliki ap neg sabiren angge longgo uhup on de sat hopong uruk kwit ape moruhu. At ebe oluk wereg li em anyo re mundoho mum-mam deg ma, at de enalitno nabehesareg nenggali ware nobahakesa bohu. Selei on en de ap homi hat sahali kwe enoluk wereg on etma enowarukwag ulug An den mingming-enebuhuk. An TUHAN en nele mundoho ihi” isi.

¹⁰An nobam lele en ahi! Nunggwelug an nisinga en endag napsi aho? Ap homi o kwenang su fam wereg on enebe domog nim an nim suahal-suahal aheg, ning-ning aheg, duruk kahi. An den de ap en enengge elamna fahet og-nemek ulug heng enebeheg, ne iren an heng nabeheg, duruk kahi fug famen, an de ap abirangge en hururung napuk.

¹¹TUHAN nakni, an den lahe neyabuk duruk kamag ulug wereg on furoho duruk kahi fug halug, ne it selei on Hat holohotman anggin anggolo deg ma inibil atihik fug halug de ap homi en hururung nobaharuk on aire demdoho an nobam amag. (

¹²Ap misig en eke bosie sombo debouk fug alereg, alongdoho re bosie utara fil on en no tembaga nim sapliroho wirig on ai somboruk fug alereg.)

¹³TUHAN en an nobam uruk kwit, “An den de ap selei on mon-enebik waruhukmu, it An nomaliki en o kwenang abirangge fene siag duruk katswa on etma onggo re enangge dungdoho fahat dalug angge etma harik wamag ulug mon-enebik waruhuk.

¹⁴Ne, o kwenang it enapeleg deg ma etma re, An den it ap eneselei on enamingming angge amag ulug debesehuk. Aire An nolok enepihik on de indok ambulbul ulog-alog haukmu hag deg ma re nahuluk fug alereg ma” ulug isi.

¹⁵Airoho isimu an den uruk kwit, “TUHAN, hat de fu deberuk kahen. Ma re an henda wenggel nealug let-nabin. It an mug-neauk kwit sebeloho nobaharuk on etma enenggik ambiangma enowarin. Haren hambuk hauk kwit weregman neg iren an nebe nowaruhup aire fug. Hat hunuk fam de an enalitno napuk ale ai wenggel-hakin.

¹⁶Haren an nobam hele urukmu re, hele uruk on misig-misig holduk kahi. TUHAN Allah di ale su ale dehen ha ale neg deg lahen on, an de hat honggwareg hangge, deg lahimu re Hat hele uruk on etma fam de nendama heale foruk kwit nahayehap nobaharuk.

¹⁷An den ap enahayeg en kabog-dulug enele maheag ale matuk on nim duruk kahi fug. An den Hat holoho duruk kwit de, it fam nolokdoho re namumu atuk kahi.

¹⁸An de nunggwelug ouk hauk kwit neg welahi e? Nunggwelug yebil su fano am fug angge yahi-yahi lauk e? Haren de ik wirig atuk on o hobi en firitog atuk anyo hag, an nendama siaho nobahamin ulug duruk kahen a?” Ulug hweag-itihik.

¹⁹Airoho irihikmen TUHAN en onggo uruk kwit, “Hat lahe sombandoho waharuk halug, an den hat og-habuhukmu re hat hebe An namingming angge on aruhun. Ne, haren wene seiale on uk fug angge demdoho on neg uruk halug de hat nikangge nabi An den on aruhun. Ap homi re hat hakit waharukmu re haren it enakit lauk karuhun fug.

²⁰An den hat de no perunggu on fam ap enalong balegma ulug wutuk angge anyo hagdoho hobahakuk. Iren de hat howatul ulug duruk kamuhup, famen de ap misig oho eke hat halong elehap debehu fug. An den hat hahap wendat-habeheg, halong bal-habeheg, duruk kaikoho hat hinim welaruhuk.

²¹An den de ap enolok siag on ai enalong apman hat fiselaroho hobahakuk. Ulug An TUHAN en nele mundoho ihi” ulug hweag-nitsi.