Read Ninia Yali YEREMIA 16 Bible Online

YEREMIA 16 - Ninia Yali bible

YEREMIA 16

¹TUHAN en ele nikangge an nobam uruk kwit, diroho isi,

²“Hat de hohwe hwelalug o suman homaliki enderuk fug.

³Omalik o suman endag-aruhu on mel enakni, enesinga mel fahet keroho aruhu ulug An den hweag-huruhuk.

⁴It de ouk ap watuk on enobam aik waruhu mu waramuhup, ne it de weim ambiangman ane, siburu obok en ane waramuhup. Ap misig ulug oho enobahet oba yareheg, enebe wareg sale feseheg, duhup fug. It enebe wareg de kwenang singon yabukmu wereg hag dak deg ma suwe mel olomene mel en nauk kamuhup.

⁵Yeremia ao, hat de o ap homi fong watuk obam de la fug. Ne, haren ap sa fahet ulug oho fong waroho welam fug. An den de nomaliki enenda seroho welamag ulug fanoap debeseheg, ne it fam enelaheg esalug nenda hundig enebeheg, duhuk fug.

⁶Ap dung on et kunggu on et o kwenang su fam en waramuhupmu re it eke sal-enebuhup fug. Ap homi en eke enebe wat-deheg, enunggul ahap neg deheg, duruk kwit it fahet airoho eke duhup fug.

⁷Ne, ap en it fahet fongma wereg lit fahet ulug soni esereheg, duhup fug. Ne, ap homi enenda sebe ulug wereg on nim oho, ite enaknisi, enesingasi waratuk mu wereg on nim ulug oho fong waruhup fug.

⁸Ap soni esetlug duruk on enobam kwik la fug. Ne, it ininim siburu nenggeg, ik nenggeg, duk fug.

⁹ Hat de An TUHAN di ale su ale dihi ha alereg on, ap homi Israel on enakni Allah anyo en hat hobam uruk ale etma holduk kamin. Homi lombo enepukmu en enele enahayeg fam duruk kwit anggiluk ale duruk on etma An den mundoho bale fohuk. Airoho duhuk ale aire ap hat welaruhun li welamuhup on etman inil hahup.

¹⁰Haren airoho isi ulug hweag-esaukmu, iren hat hein og-heauk kwit, nunggwelug unggum omamne ale etma og-nesahu uruk kamuhup. Ne, iren hein og-hapuk kwit, iren An enakni TUHAN Allah anyo nil hanim siag deheg, kwasikdoho deheg, duruhuk on aire nangginig on uruk kamuhup.

¹¹Airoho uruk halug, haren de TUHAN en diroho isi ulug hweag-esakiyug, ‘Hit henombawi en de an lin nealug de kembu ilah amu on fam obahet deheg, apne weheg, duruk katfag. Iren de An den uruk on etmano halolo debeselug de, An den diroho airoho diyug uruk ale omano holoho duruk katfag fug.

¹²Famen hiren de mun henolok alongdoho duruk kahep. Hit de henenda haro deg lit, hit henendaman boruk ale kwasik on neg duruk kahep. Hit de An nele holoho duruk kahep fug.

¹³Ai fam de An den de hit o kwenang su fam en muko wilibi henobahakukdeg, o kwenang it henombawi en oho ne hiren oho henapelegma, nikmu etma hwik-henebik lahuk. Mu re etman de hiren nukoho, hupanggo nim ilah amu on fam obahet duruk kamuhup, ne An den de hit fam henelaheg hesahuk fug’ eheik iyug” ulug isi.

¹⁴TUHAN ele uruk kwit, “Li fobik waruhu on fam de, ap homi hombuk balduk kwit, An Allah noluk mundoho welahi on, ap homi Israel on o Mesir en og-eneplug wilibik waharihik on anyo nunuk yiko balduk kamuhup fug,

¹⁵ite An Allah noluk mundoho welahi on, nomaliki Israel on o kwenang misig eke utara fil etma wereg on fam en og-eneplug wilibik waruhuk on, ne kwenang foma amu on fene it ai del-fol esauihik kwe omano mel en og-eneplug wilibik waruhuk on ai nunuk fam hombuk balduk kamuhup. An den de it hondog eneplug kwenang it enonggwareg en on, enombawi og-esauihik mu etmano feseik waruhuk” ulug isi.

¹⁶TUHAN ele uruk kwit, “An den de ap humdoho ikan wauk enap en ap homi suma sen-enebik wamag ulug yonggo fesehuk. Ai en de An den ap suwe, bak watuk on en de it oma dom fene mel, duk fene mel, helep owik fene mel etman enowarik wamag ulug wol-enebuhuk.

¹⁷Iren di ale su ale duruk on etma An nil esauk kahi. An fam heraho ale eke wereg fug; it enesiag duruk on oho An den mundoho nil hauihik.

¹⁸It enesiag mel kwasikdoho duruk on mel etman de An nanggwenang anyo kembu aheime wereg fug angge fam en emere fousa ma re An den aldap birenam fam unggum og-esahuk,” isi.

¹⁹TUHAN nakni, Haren neg an nalong baloho fahat nusug lit an nomamne og-nutuk kahen; An anggin on nobam atuk mu Haren neg let-napuk kahen. Di ap su ap o kwenang ambiangma etman Hat hakit wamuhupdeg uruk kwit, “Nit nenombawi re kembu ilah we hesangge on fahatdalug latswa.

²⁰Ap en onggwareg fahet ilah eke wal-da alereg a? Duk fug alereg! Aren wal-debouk on aire demdoho Allah fug.” Uruk kamuhup.

²¹TUHAN ele uruk kwit, “Ai fam de, An den di enunggul unuk su enunggul unuk omano en An nalong wereg lit nomamne welahi ale halug, iren li mundoho-mundoho fam An TUHAN welahi ale anyo enoluk amag ulug debesehuk,” ebag.