Read Ninia Yali YEREMIA 17 Bible Online

YEREMIA 17 - Ninia Yali bible

YEREMIA 17

¹TUHAN ele uruk kwit, “Yaho hit henunggul unuk Yehuda on, hit henesiag de henonggwareg henendama hwesesengge oho ne mezbah omano ambiang unggut deg ma omano lisu ambiang de helep anggen mun wirik on intan bilibuk orohole hag on ai fam hilinggig angge fam baleg wereg.

²Ap homi hit on de mezbah mel, kembu enesinga Dewi Asyera anyo fahet wiroho unduhuk fousa angge, e enggela heik on indip kwe mel, duk-duk unggul kwe mel,

³o kota dag fil en dom fene omano mel, obahet dik lauk. Hiren o kwenang su abirangge fene kembu wutuhup on mel, ne di siag su siag duruhup on mel, ai fam de An den it heneselei on en henangge di on su on mel, henenggik weregdoho welahep on etma mel, ha dalug lowag ulug debehuk.

⁴Hiren de we nangginuk-nangginuk henanggwenang An den og-hesauihik mu omano it og-esauk kamuhup, ne hiren ap heneselei on enobahet o hit henapelegma etman duruk kamag ulug henobahakuk. An nolok hit fam henepihik on aire indok ambulbul ulog duruk hag deg ai fam henebuhuk mu re nahuli fouk fug alereg,” isi.

⁵TUHAN ele uruk kwit, “Ap en An akni TUHAN anyo lin nealug, ap on fam enenda ebereg wereg laheg, ne onggwareg omamne fam dip deg laheg, durukmu re, An den at unggum og-uruhuk.

⁶At aire o leimu mel, kwenang unggul ahap neg deg ma mel, lei birim-birim uruk kwit mayu neg deg ma etman enggelangge wilibigmu fano ale on ha fug angge wereg hag deg laruhu.

⁷Famen ap An nobam enda ebereg wereg on de An den fanoap deberuk kwit neg welaruhuk.

⁸ At aire e ik wirig atuk on elanma wilibigmu, omanggen saharoho ikma kwelabeg hag deg. O hobi laharukmu at akol duruk fug, enggela re mun hesilig lit neg wereg. Ne, o kwenang etma fam di angge su angge bug aik waharuk, famen at de anggen yihiruk kwit neg wereg ma enda fituk fug.

⁹Ap homi enenda re diroho deg ulug kumu ha fug alereg, di angge su angge en de enenda neg de amenggel hum deg, ouk ilonggoma anggindoho wauk hag deg.

¹⁰ An TUHAN en de ap homi enenda kumu esauk kahi, ne enenda boruk on An den wal-hauk kahi. Ap homi enebe domog de enobabut duruk ale domog An den ambiangma debeseruk karuhuk, ne it duruk aleroho An den oho airoho debeseruk karuhuk,” isi.

¹¹Suwe eke en suwe amu on anggen ondohoma sahaun-duruk hag, ap bekitdoho duruk eleg lit enangge hwelauk on de airoho deg. At ebe oluk wereg on anyo ambiangma aik lauk li em, ap ai morue on ulug enam atuk.

¹²Nit nenakni TUHAN obam de takhta mun ebe on hag deg, ne indipmen angge re dom yaron fam wereg.

¹³TUHAN nenakni, Hat de ap homi Israel on en enenda ebereg on welahen; it Hat lin healug lauk on de mundoho enenggali amuhup. It de o kwenangma suman eleg atlug de, ap homi waratlug laukmu etma lahup. Aire Hat hebe re ik enoluk enepuk on eleruk welahen famen iren Hat hobahalug lausa ma, TUHAN nakni.

¹⁴TUHAN nakni, Haren an hiling napuk halug, an fano aruhuk. Ne, an nahap wendat-napuk halug an wendareg on welaruhuk. Hat neg de an den leho hobaharuk kahi on welahen!

¹⁵Ap en an nobam uruk kwit, “TUHAN en nit nenakol kwelabeg ale isi on etma re kema wereg? Ketia duk alere nangginig!” uruk.

¹⁶Famen de TUHAN nakni, An den Hat fam uruk kwit ap homi etma folo-folo alemare fesin ulug hweag-hutuk ale eke wereg fug anyo. It fam anggin anggolo on aik waharuk ale etma fahet an mundoho nerim deg lahi. Nakni Hat de holuk deg, an den nele uruk kahi ale eya fahet TUHAN Hat de mun holuk deg.

¹⁷Hat hebere An nendama nakol hapuk angge hagdoho am fug. Hat hebere an anggin on nobam atuk mu hakit waharukmu fahet welahen.

¹⁸It ap an mug-neauk on mel, an sebeloho nobaharuk on mel, etma Haren enenggali ware feselug it enakolap kwelabe fesehun lamag. Famen de, TUHAN nakni, Haren an nobam oho airoho nobahauk fug. Haren anggin on ai it enobam feseik waruhunmu it enebe mundoho eleg amag.

¹⁹TUHAN ele an nobam uruk kwit, “Yeremia ao, hat de sokole unuk Pintu Gerbang Rakyat ai it ap raja Yehuda enap en o kota fam wilip-am kuk durukmu etma lakin. Ai en sokole o Yerusalem fam etman amu fene omano oho lakiyug.

²⁰Lalug de ap raja-raja mel, ap homi Yehuda on abirangge mel, ap homi o Yerusalem fam wereg on mel etman sokole etma fene lauk on fam hweag-esauk kwit TUHAN en eheik ale ulug hweag-esakiyug.

²¹ Haren uruk kwit diroho iyug, ‘Hit waratuk ale henerim deg lit halug de hiren sumanggen nukoho Sabat fam hamboholug kwik waharukam fug, ite hiren sokole o Yerusalem en hilinggig on etma fene kwik wamuhup fug.

²² Nukoho Sabat ai fam de hiren yabuk deheg, hit henobam olman sumanggen walug wilibik laheg, duhup fug. An den hit henombawi fam melale-feserihik hag, nukoho ai An nobahet eneko feiyug.

²³Airoho irihik famen hit henombawi en An nele holeheg, fu debeheg, duruk katfag fug. It enebe re enenda haro deg lit, nele holoho duk fug angge welaheg, enele fag esauk ale oho enerim deg laheg, duruk katfag.

²⁴An den diyug ulug hweag-hesauk ale etma holoho duruk kamek. Hiren nukoho sabat ai fam sumanggen walug sokole o kota au fene en walug wilibuk fug. Hiren nukoho ai An nobahet eneko feyek. Hiren nukoho ai fam nunggwe yabuk ulug oho duk fug.

²⁵Hiren dik-demdoho fam An den melale-henobahaki ale ai duruk kamuhup halug de ap yabuk lehoma duruk on mel, raja hun Daud en melal-enepuk katfag hag melal-enepuk on mel de sokole ai fene en o Yerusalem kwik wamuhup. It de ap Yehuda on mel, ap homi o Yerusalem wereg on mel, kuda en kereta biasa lauk angge fam lahalug kwik waharukmu re, kota Yerusalem de mundoho anggiluk neg aruhu.

²⁶Ap homi re o kota Yehuda fam etman mel, desa-desa o Yerusalem horog kwe etman mel waharuk kamuhup; it foma wilayah Benyamin en on fam en de duk helang indip kwe en mel, o dom-dom kwe omano en mel, Yehuda selatan fil omano en mel, wamuhup. It waharuk kwit de wam waroho yalduk on ulug mel, yalduk fug on mel, gandum fohup angge mel, amben fano angge kemenyan mel, An dang-napuk kwit ulug fohup angge mel, An nobam wirigmu walug wamuhup.

²⁷Abirangge etma re hiren An nele holoho deheg, nukoho sabat ai An nobahet eneko feheg, duhup halug aruhu. Nukoho ai fam sumanggen amu angge oho re o Yerusalem sokole hilinggig on ai fene re harulug lahup hayog. Hiren lahe An den airoho diyug ulug hweag-hesauk ale dahandoho duruk halug de, o Yerusalem fam sokole hilinggig on mel, sokole humon mel, ap raja ebe wereg ma etma mel, An den indok fam mundoho han yaluhukmu re indok aire nahuluk fug alereg laruhu’ eheik ulug hweag-esakiyug” ebag.