Read Ninia Yali YEREMIA 18 Bible Online

YEREMIA 18 - Ninia Yali bible

YEREMIA 18

¹TUHAN ele an nobam uruk kwit,

²“Hat de ap waruk dangge fam lalduk on obam lakin; etman de An den wene hat hweag-hitmin,” ulug hweag-nitsi.

³Airoho isimu re an anyo ap dangge fam waruk lalduk on obam lauk men de, ap anyo ikwag buhun-duruk angge fam laldukmu lauihik.

⁴Airoho lalduk kwit aren waruk hilingguruk on anyo lahe aren nong-hongdoho buhun-debelug halug de, aren de waruk anyo amu on eke at enda boruk aleroho hilingguruk katsi.

⁵Airoho durukmu hauihikmen, TUHAN en an fam ap homi Israel on hweag-esowag ulug hweag-nutuk kwit,

⁶“Yaho hit An nomaliki, ap waruk kwenang dangge fam lalduk on en duruk ai hag, An den airoho re dihi ha fug alereg a? Kwenang dangge ap waruk lalduk on enggikmu wereg ai hag hit oho An nenggikmu airoho welahep.

⁷Ma re An den nukoho misig salim eke An den kerajaan ane ite enunggul unuk eke ane, oko weheg, erap debeseheg, luluhun eseheg, dimin ulug duruk men,

⁸enunggul unuk anyo enesiag fam en enenda aham duruk halug An den dimin ulug nenda feik laharuk ale anyo sebel hihi ha alereg.

⁹Famen ahamdoho re An den unggul unuk eke ane, kerajaan eke ane unduhuk feheg, omamne debeheg, dimin ulug duruk men,

¹⁰famen unggul unuk anyo en An nele holoho duk eleg angge duruk kwit enolok ale neg duruk halug, atam duhuk berihik on anyo ahamdoho amu on duhuk.”

¹¹TUHAN ele an nobam uruk kwit, “Ketia re haren ap homi Yehuda on mel o Yerusalem wereg on mel fam hweag-esauk kwit de, An den it nim weim yabuhuk en melaloho feheg, unggum it og-esahuk on fahet fouk debeheg, duruk kahi eheik iyug. It hweag-esauk kwit de iren siag ale neg duruk kwit wereg on etma mel, it enobabut mel, iren duruk ale mel etma bale foukwag eheik iyug.

¹²Famen iren onggo uruk kwit, ‘Aire indip nunggwe ale fahet no? Nit de nenonggwareg nenenda boruk ale neg duruk kamul! Nit nenemu domog en nenendaman wenggel-halug nenolok fam duruk ale etma neg duruk kamul’ ulug uhup” ulug hweag-nitsi.

¹³TUHAN ele uruk kwit, “Hiren enunggul unuk amu on fam hein og-esauk kamek, airoho etma re eke atsi ale wereg a? Ap homi Israel on en de mun namelmel ale eke duswa!

¹⁴Helep unggul o Libanon fam en lombiag angginggi eleg atsi ale eke wereg fug. Ne, ik il habub on dom fam en wilibik waharuk on firitog atsi ale eke wereg fug.

¹⁵Famen An nomaliki en An enapeleg atswareg iren kembu akit amben fano angge dupa weratuk. Iren de kobokwe atam it lebag kwe famen dungdoho wat-dauk kwit de it kwe dahandoho re kobokwe owan doale foruk fug kwe omano lauk.

¹⁶O kwenang su re iren obale mundoho namelmel deg ma debousa, ne li mundoho etma fam de ap homi en enalitno durukmu deg laruhu. Ap homi kwe etma fene lauk on en de enunggul kwal halug enamelmeldoho kumu hauk kamuhup.

¹⁷Kwenang ahe hol timur fil en fi hauk hag, An nomaliki oho An den it eneselei on enalukwema og-esahuk. Ne, it fam alemat atuk on aik waharuk halug de, An den nambol yig-esahukdeg it let-enebuhuk fug!” isi ebag.

¹⁸Ap en uruk kwit, “Nit de nenebe seberoho Yeremia sebeldul en wene marukohon. Allah en de at fene en neg ele uk fug alereg. Ap imam on wereg neg deg lit wene mamul-nenebeheg, ap enenda wenggeleg on en komo ale hweag-neseheg, duruk kamuhup ulug a; ne nabi en de Allah en uruk ale omano hweag-nesaukam alereg. Anggere niren at ele neg holduk kamuhuk fug angge re, wene katukdoho baldukmu etmano het dulug kul deg at nim wene balukoho lahe.” Uruk katswa.

¹⁹Airoho urukmu an den somban uruk kwit, “TUHAN nakni, an den somban uruk kahi on su hesanggo holin; it ap naselei on en an nobahet uruk ale etma fu nobahain!

²⁰An den fano ale debeseruk kweleg iren enolok fam nobahaukoho duruk aire duk aleroho a? Ai famen iren an kwenang bohwe habuligmu wambukwag ulug habuli foruk. Nakni, An den de it fam haren holok enobam fehen ha no ulug Hat holohotman inibil atihik ale anyo ebet-neakin.

²¹Ai famen ketia re, TUHAN nakni, it enomaliki etma siburu obok en oho, dog ambiangman oho waramag. It etman homi re enahunsi mel enomaliki mel, longgo ukwag; ne ap on de ouk en waraheg, ap sauwe on de weim yapuk men waramag.

²²Ap enolok on esan lohwaloho fetag-fetag it enobam wahai laukem it enakol amagdoho mingming enebin. An bule wambukwag ulug iren kwenang bohwe habuleheg, iren an yohwat amag ulug sabu yep nabeheg, duruk.

²³Famen de TUHAN nakni, iren an noluk elehap dukoho wene melalduk on etma Hat mundoho holuk deg lahen. Ai fam de, Haren it enesiag elehapdoho feseheg, hapelehapdoho feseheg, duk fug. It yeik enowaroho ware feseiyug. Hat holok fam it airoho debeseiyug,” ulug somban irihik.