Read Ninia Yali YEREMIA 19 Bible Online

YEREMIA 19 - Ninia Yali bible

YEREMIA 19

¹TUHAN en an fam ikwag eke onggo balik lalug de ap it enunggul unuk ai melal-enepuk on wenako foma nim, it imam on foma nim, ap log-log enap nim,

² seberoho lakohon ulug hondog-eneplug de o Hinom Fanggongma sokole unuk Pintu Gerbang Beling ulug soaleg on ai fene en lakiyug. Lalug etman de TUHAN en an nobam diroho iyug ulug wene fesi on unduhuk feiyug isi.

³An den wene unduhuk foruk kwit de diroho iyug isi, “Yaho hit raja Yehuda fam welahep on mel, ne ap homi Yerusalem fam welahep on mel suma! Hit de An henakni TUHAN Allah Israel on henakni Mun Nalong welahi on anyo en nele uruk kahi ale ai holiek. An den anggin-fanggin anggolo on o kwenang su fam mondorik waruhukmu re ap homi en hol halug de youk lahupdeg duruk kamuhup.

⁴Aire it enunggul unuk au en An lin nealug duruk ai fam duhuk. Iren de obale su fam dewa iren mun enapeleg on omano fahet wam waroho it enonggwareg fahet nim, enombawi fahet nim, ap raja Yehuda fam melal-enepuk wereg on fahet nim foruk kwit mun emere foruk. Eke iren de kwenang su fam ap siag duruk fug enap enemep en hopo debousa.

⁵ Iren de Baal fahet mezbah wutswareg enomaliki re Baal endama ahayeg howag ulug waroho og-utuk mu fahet wutswa. Aire An den mel airoho duruk kamuk ulug oho irihik fug, ne airoho duruk ale on etma An nendama oho lohon wereg fug on duswa.

⁶Ai fam de li aik waruhu on fam de obale suma o Tofet eheg, ite o Hinom fanggongma eheg, duhup fug, ite Fanggon Ap unggul eleg atsi mu uruk kamuhup.

⁷Obale su fam en de ap Yehuda on en mel, ap homi Yerusalem wereg on en mel duhuk ale ulug wene melaleg wereg on etma suhwiap debehuk. It enebere weim yapuk men enalong elehap debesoukwag ulug embeseheg, dog en enowarukwag ulug embeseheg, duhuk. It enebe wareg de An den embesehukmu suwe en mel olomene en mel nahup.

⁸An den kota su fam de anggin-anggolo fulu-bolan on mondorik waruhukmu re ap homi kwe etma fam lauk on enebe domog en de youk lalug enamelmel hauk kamuhup.

⁹Ap selei on en de o kota au laborulug de ap kota ilonggoma wereg on enowarik kul en ulug duruk kamuhup. Ap laboroho saleg on aire mun nik alereg ma re ap o kota ilonggoma wereg on omano en de are eke en are eke nauk men, ne it enonggwareg enomaliki nauk men, duruk kamuhup” ulug hweag-nitsi.

¹⁰Airoho isireg TUHAN en an nobam de ikwag anyo ap an ninim lauhuk on etmano inil hanim erap dukwag ulug hweag-nitsi.

¹¹An den ap omano fam uruk kwit, TUHAN Mun Along wereg on en de diroho eheik, “It enunggul unuk su on mel, o kota su mel de ikwag ai hag erapdoho welelenggen esahukmu re nikangge buhun-duk fug alereg laruhu.

¹²Kota su mel ap homi wereg on mel de An den o Tofet hag debehuk.

¹³O Yerusalem fam wirig on abirangge mel, ne ap raja Yehuda fam melal-enepuk on enobam abirangge mel, de o Tofet hagdoho mun emereg on aruhu; aire ap homi en de it enobam o dummu[11] etma kembu dewa bohol obahet ulug amben fano angge dupa yaleheg, dewa amu on fahet anggur og-ereheg, duruk ai fam aruhu,” isi ulug hweag-esakiyug, ebag.

¹⁴Airoho isimu re an o Tofet TUHAN en wene walug hweag-esa lakin isimu etmano embeselug lauihik. An nebe o TUHAN obam ambe lilimol wirig on anyo fam inaik lauihikdeg, ap homi mundoho etmano fam hweag-esauk kwit,

¹⁵TUHAN ap homi Israel on enakni Mun Along wereg on anyo en diroho eheik, “Hit de henenda haroreg lit holduk ale mel henerim deg lahepma, An den de anggin-fanggin mundoho wenggeloho ferihik on etma o kota su fam nim de o desa-desa maseroho wereg on fam inim mondorik waruhuk,” isi ulug hweag-esauihik.