Read Ninia Yali YEREMIA 2 Bible Online

YEREMIA 2 - Ninia Yali bible

YEREMIA 2

¹TUHAN en an mingming napuk kwit,

²wene su ap homi Yerusalem on mundoho fam unduhuk foukwag ulug hweag-nitsi, “Israel ao, hat hebe ket sauwe deg lit, haren dipdoho duruk katihin ale etano An ebereg lahi; Nit nenahayeg-nenahayeg ale duruk li em, haren henda hundig napuk katihin alere mun hum aleroho. Ili angge lei kwe di angge su angge yaho fug kwe, lauk li em de haren An nombolin waharuk katihin.

³Israel, hat de An nonggwareg nangge on, nenda anggenma on deg ma nenda hundig welahi on. Ap homi en hat hobam ouk ap kwelabe hobaharuk on de An den anggin on enobam feseruk kahi. An TUHAN nele mundoho ihi” isi ulug hweag-esakiyug.

⁴Hit Yakub ambiangma henap henunggul unuk Israel on en de TUHAN en holukwag ulug eheik on su holiek!

⁵TUHAN ele uruk kwit, “It henombawi en de siag de nangginig on An fam wereg ma neausareg iren An enalitno napuk? Iren de kembu di ale su ale duk fug on anyo mutlug lauk fam, ambiangma re it enemu nong-hong uruk.

⁶An de fu nobaharuk fug; An den de koboke kwe hondog-eneplug waharihikmen, ne o Mesir en og-eneplug wilibik waharuk li em, ili angge lei kwe, kwenang unggul ahap neg deg kwe fanggong lahaik-wambuk deg kwe, mun iringgigmu mun namel-mel deg kwe, lei ap homi wereg fug kwe ap en oho lauk fug kwe etmano og-eneplug waharihikmen!

⁷An den de o kwenang hesilig on fam etma it anggen yihig fano angge on etma nauk kamuhup ulug fesik waharihik. Famen de etman iren An nanggwenang anyo emere fousa, An nangge anyo iren me nape angge hag debousa.

⁸It imam en de An enakni TUHAN anyo kema wereg ulug hein og-neauk fug. It wene unggum katukdoho bilingguruk enap en oho re An de mun enapeleg deg, enalong wereg enap en de An nele sahaleg ale neg duruk. Imam en Baal unuk fam uruk, iren kembu di ale su ale duk fug on anyo apne wauk.” Isi ulug hweag-esakin.

⁹TUHAN ele uruk kwit, “Ketia re An nomaliki enawene bilinggimin, ne iren ondohoma on nim katukdoho wene matmin.

¹⁰O Siprus ik aeg kwe barat fil etma wirig amek, ne ap o Kedar kwenang fam timur fil etma mon-enebiek, etma furoho oloariyug, wene aireg on de eke atsimen a, elegman a?

¹¹Ap enunggul unuk misig en eke iren apne wauk on ai ebe demdoho Allah fug famen, iren ilah anyo aham duswa ale eke wereg fug. Famen, An nomaliki en de An iren enambono on anyo re, di ale su ale duk fug on nim aham duswa.

¹²Ai fam de hat bohol etle elek din! Hobam fogdoho howag elek duruk kamin!

¹³An nomaliki en de siag indip biren duswa: Iren de An enahaik eleruk ap homi enolukap enepuk kahi on anyo enambol yig-nutswa; iren de enonggwareg fahet ik sene foreg on ik yenggeluk fug alereg on hiling dausa” isi ebag.

¹⁴“Israel de mingming on fug, mingming on enambiangma endag-atsi on fug neg. Famen nunggwelug at ebe selei on en senggelduk angge atsi?

¹⁵Aselei on de no singa en hagdoho ele koua duruk, kwenang de mundoho unggul ahap neg debelug di ale su ale duk fug ale on debeseswa, enobam kota omano indok en mundoho han nasimu re, embeseswa ma ap wereg fug.

¹⁶Yei, Hat Israel on su, hat horuk de ap Memfis on mel Tahpanhes on mel en balswa.

¹⁷Hat honggwareg en neg dil ale fam en, abirangge etma hobam atuk, aire An den kwe fam hondog haplug lauk kweleg, haren An hakni TUHAN Allah anyo hambol yig-nitihin fam.

¹⁸Haren Mesir lauk kahen ai fam de nunggwe ale atuk? Ik Nil na lauk kahen ale aire? Haren Asyur lauk kahen ai fam de nunggwe ale atuk? Ik Efrat na lauk kahen ale aire?

¹⁹Hat honggwareg holok fam unggum hwelauk kahen, haren hakni Allah herim en domako embeserihin ai fam ouk-bouk hauk kahen. Haren An hambol yig-nutlug nalong boruk kahen fug anggere, asig anggoloroho eta unduk neg hakin. Ande hakni TUHAN Allah en nele mundoho ihi; Ande Allah Mun Leho Wereg lit, Allah di ale su ale dihi ha alereg lahi on anyo” isi ebag.

²⁰TUHAN ele uruk kwit, “O endam angge haren An nobahet duruk kahen fug; haren nele holoho deheg, napne weheg, duruk kahen fug. Duk funu deg kwe mel, e enggela heik on indip kwe mel haren de kembu dewa hesilni anyo apne wauk kahen.

²¹Hat de An den anggur a yatuk hag, anggen ebe on en eneko yag-hapihik on. Famen ketia hat de ahamdoho osuk angge amu hesangge on hag ahen.

²²Haren hebe kume wat-dauk kwit, hebene sabun humdoho watuk kahen, ai deg kweleg haren kwasikdoho dirihin on hebene dag isi on de An den enamegma fu hauk kahi.

²³Hambong si-se angge hele uruk kwit an de emereg lahi fug, ne Baal mutlug lauk kahi fug ulug uruk kahen! Fanggong kwe etma hobabut duruk kahen ale fu hakin, holok on deg lahen ale etma wenggel-halug fag-din! Hat de no unta hwe on anggulu firi folug duruk hag deg lahen, airoho deg lit de lag-wag urukmu hwaluk fug alereg hag,

²⁴airoho deg lit lei ap eleg on fam omano kwik lauk. At ai anggulu firi folug durukmu re sene folug welam fug alereg. Yohombuk on en anggulu nauk li em de anggulu unuhuk folug wereg ma re at enda on en de heraruk fug alereg.

²⁵Israel ao, hat de dewa etma mug-eneplug buroho la fug, ne hele hwiroho it wol-enebuk fug, airoho duruk men de hat heyog howareheg, ik ahe en hanggolop iring aheg, duk alereg. Haren uruk kwit, ‘Eleg an de sombandoho wahi ha fug alereg ande kembu dewa fam nenda hundig duruk kwit it mug eneplug lauk karuhuk’ uruk kahen” ulug isi ebag.

²⁶TUHAN ele uruk kwit, “Ap heraharuk on eke ap angge waukmu senetil lauk em enggali hauk hag, hit Israel on mel, raja-raja mel, ap yabuk lehoma duruk on mel, imam mel, nabi mel de airoho henenggali hahup!

²⁷Hiren de e kong baleg misig fahet, nayon eheg, ne helep misig fahet nisinga eheg, duruk kahep anggere henenggali hahup. Hiren de An nakit waharuk kahep fug, ite An lin nealug lauk kahep. Famen de anggolo ale henobam aik waharuk halug de An den henahap wendat-henebukwag ulug An wol-napuk kahep.

²⁸Hiren henanggembu wit-dauhup on etmano re kema wereg? Hit anggolo atukem halug de, iren duk alereg halug henahap wendat-henebukwag ulug it wol-enebiek de! Yaho Yehuda henap, hit henanggembu dewa re henobam kota deg ale etaroho wereg!

²⁹An fahet de hiren nunggwe ale on henerim boruk kwit hiren An nele sahaloho duruk kahep?

³⁰An den bet-henepuk on omano wauk eleg kweleg unggum henobam fouk alere we alemaroho hag. No singa aeg haroho ap fam sahali uruk hag, hiren airoho nabi omano enowatuhup.

³¹Yaho hit Israel henap, An nele uruk kahi on su holiek. Hiren An de ili angge lei hag ite kwenang heik koruag deg on hag deg ma eke neauhup a? Ai famen hiren nunggwelug nit de kolo nenap uruk kwit An nakit sombandoho waharuk ale henerim deg lahep?

³²Hwele duhum on en alili angge eke apeleg am alereg a, ite hwele ahun hwelaroho duruk on en sum ahun hwelauk kwit wan-duruk on apeleg am alereg a? Eleg. Famen de hiren de o endam An henepeleg atuhupli wenahauk fug aleroho deg.

³³Hit de hiren henenda hundig on etma enenda waul ulug kwe hera duruk ale fahet mun enggat deg lahep. Uang hwelakoho hambena mun ilmu siagdoho duruk on en ohore hit fam en mamul da alereg!

³⁴Hit henesum wan-duruk kahep on etma re ap heraharuk on senetuk men de fug ite ap kunggu on mel siag duruk eleg on mel enamep en aro deg. Airoho deg famen,

³⁵hiren uruk kwit, nit de siag duruk kahe fug, ne TUHAN en nit olok nenepuk eleg, uruk kahep. Famen de hit siag duruk kwit en fag-duruk kahep fug mu re An TUHAN en hit unggum og-hesahuk.

³⁶Hiren mun folo-folo kembu dewa enunggul unuk amu on en etmano fam let-nenebukwag ulug heng-ik lauk kahep! Hit de Asyur en henenda siaho henobahasi hag, Mesir en oho airoho henobahaku.

³⁷Hit de henenggali nim-nim henahumu siagdoho o Mesir embeselug wilibik wamuhup. An TUHAN en de ap hiren henenda hembisig lahep on eta mundoho embeserihik; anggere it fam hit ambiangma hwelahup angge eke wereg fug” isi ebag.