Read Ninia Yali YEREMIA 20 Bible Online

YEREMIA 20 - Ninia Yali bible

YEREMIA 20

¹Hun imam unuk Pasyhur aire hun Imer amloho o TUHAN Obam wirigmu omano hwalduk on fahet kepala welatsi. Airoho wereg ma re an den wene unduhuk ferihik on etmano mundoho holsireg,

²aren ap mingming enepuk kwit, an nebe yeik waroho sokole humon eke o TUHAN Obam wirigmu en il emberim fil on unuk Pintu Gerbang Benyamin ai fam boroho unduhuk nobahaukwag ulug hweag-esasi.

³Airoho dusama re o hubet ombolim on fam an nebe waroho boreg ma anyo en aren loloho belabe nobahausa ma an den at fam uruk kwit, “Hat hunuk TUHAN en soal habuhu on de Pasyhur de fug, ite ‘Ap watni’ ulug soal habuhu.

⁴TUHAN ebe en uruk kwit, ‘Hat de honggwareg mel it hori mel ap en henowarukwag ulug henobahakuk. It hori etma re ap selei on en enowatuk mu hil esahun. Ne, ap homi Yehuda on abirangge re raja Babel on en sebel-enusug welamag ulug debehuk; iron en fomane re hele wareg og-eneplug o Babel lahu, ne ando re binggi enowaruhu.

⁵It eneselei on en oho re o kota au fam enenggik weregdoho deg angge etma enenggik abusag hweleheg, ne enangge di angge su angge mel, raja Yehuda on en angge endam et foroho on mel hwelalug lowag ulug An den embesehuk.

⁶Ne, hat Pasyhur hebe nim it hahain elekwe on nim abirangge oho re sen-henebuhupdeg het-heneplug o Babel lahup. Mu re etman hat hebe wararuhunmu sal-habuhup; ai hagdoho re it hori haren hele en werahap hauk ale holswa on etma oho airoho duhup eheik’ ulug hweag-itihik.”

⁷TUHAN nakni, Haren an onggon napuk kahenma an onggoneg on atuk kahi. An maben deg kweleg Hat neg de homamne on deg lahenma, atlug an sebeloho nobahakenma welahi. Ande ap homi enebe domog inil en senggel napuk, huberen hupmu huli enalitno napuk.

⁸Hundig-handig an nele ikohore, “Enolok ale neg! Anggin anggolo ale neg!” Ulug nele omamne fam hum-ngai duruk kahi. TUHAN nakni, an de Haren iyug ulug uruk ale omano hweag-esauk fam, an hundig-hundig bulip nabeheg, enalitno nabeheg, duruk.

⁹Famen an nendaman uruk kwit, “TUHAN aire napelehapdoho embeselug welaikohon, At unuk yiko eke uruk karuhuk fug” ulug uruk kahi, men de Haren hele uruk kahen on aire indok hag nenda anggenma hute duruk. An den airoho durukmu hambuk hamin ulug wal-hauk kahi famen, an den dihi ha fug ale atuk.

¹⁰Ap en di kwe su kwe enele ngulug-ngulug ale uruk kwit, “Nenakol atuk on de di kwe su kwe saha eheik! Niren at au fahet ap enalong wereg on fam hweag-esa lakohon!” Uruk. It an nombali ninim hundig on famen ohore, at nunggwe salim siag duhu ulug inil og-napuk. Iren uruk kwit, “Niren nenenda ahe laharukmu sebel hauk kahe on oma fahet ambiangma at obam oho debehuk famen de niren at enda walug duruk fam, at along elehapdoho foul” ulug uruk.

¹¹Famen de TUHAN nakni, Hat de an nibil welahen on; Hat de mun homamne de lit along on deg lahen. Ap an mug-naplug waharuk kwit sebeloho nobaharuk on de, wat-dahupdeg enemu en duk fug aleroho amuhup. Iren duhuk ale ulug ebereg on omano suhwi aruhu mu, it mundoho enenggali on amuhupdeg mundoho-mundoho welamuhup. It enalitno on amuhupdeg welamuhup on aire, mundoho ebet hauk kwit neg welamuhup.

¹²Famen TUHAN nakni Mun Halong welahen on, Haren de mun katukdoho neg ap homi enabut bal-esauk kahen; iren enenda boruk ale mel wenggelduk ale mel Hat holuk deg. Ai fam de TUHAN nakni, an nawene re Hat henggikmu neg fehimu re, Haren naselei on etma enobam ambiangma debesehun ale nil hahuk en, howag ulug nobahain.

¹³TUHAN en de ap enolok fam duruk on enenggikmen ap anggolo hauk kwit wereg on anyo loloho wilibi feheikma, TUHAN obahet suni iyek, At neg mot-diek.

¹⁴ Nukoho an endag-atihik salim ai hururung deg lamag! An nisinga en endag-napuk li em eta mundoho nalitno on deg lamag.

¹⁵Ne, ap an endag-aha ulug wene walug lasireg, an nakni fam hweag-utuk kwit, “Hat de homalik ap angge endag-aha” ulug hweag-itsi mu, nakni ahayeg hasi on ai oho hururung deg lamag!

¹⁶Ap wene walug lasi on aire kota TUHAN enda esa fug angge luluhun esasi on etma hag deg lamag. At aire ebe fam etma o hubet ouk en nenek duruk on holeheg, ne nukoho andundu deg ma weim fam en enap durukmu holeheg, dukwag.

¹⁷Aire aren an nebe owan nisinga ahummu wereg kweleg, etma nowatsi fug mu anggere, aren nowatlepman de an nisinga ahumu etma neg weregman an nisinga ahum aire ap wareg on sal-enepukmu hag alep on.

¹⁸Nunggwelug an endag napswa? Ande ouk heheg, anggolo heheg, neg duruk kamag ulug a? Ne, an nebe noluk au nenggaliroho neg welatlug lowag ulug endag-atihik a?