Read Ninia Yali YEREMIA 21 Bible Online

YEREMIA 21 - Ninia Yali bible

YEREMIA 21

¹Raja Yehuda on Zedekia anyo en ap Imam Pasyhur hun Malkia amloho anyo ha, Imam Zefanya hun Maaseya amloho anyo ha an nakit lowag ulug mon-enebik wahasi. It waharuk kwit wene diroho hweag-umuk isimu walug wahausa,

² “Nebukadnezar raja Babel on anyo ha autsi sehen seneg enap ha re niren kota su fam laborik wahesa anggere, TUHAN en nit fahet keroho duluhup imisi en heng din. TUHAN en nit fahet along on eke deheg, at Nebukadnezar autsi nim muko suhul eseheg, dimisi ane ulug heng din” ulug mondorik wahasi.

³Airoho isimu re TUHAN en an nobam ele hweag-nutuk kwit, ap wene walug wahesa on etman de,

⁴TUHAN ap homi Israel on enakni Allah anyo en diroho eheik ulug Zedekia hweag-irik lowag, “Zedekia, An den de ap hat fil on en sehen seneg enap en raja Babel nim weim yapuk on etma enalong elehap debehuk. Tentara haren on en enasehen etma re o kota bik-bulmu etma balu lahabe fohuk.

⁵An nebe en nanini fam, nolok leyareg lit hit nim dog yabuhuk.

⁶Ap homi o kota su fam wereg on de An den binggi enowaruhuk; ap et wam di angge su angge et de ouk mun amben siag on fam en waramuhup.

⁷Hat nim, hautsi pegawai nim, ap dog ambiangman mel, siburu onok en mel, ouk amben siag on fam en mel, lil amuhup on nim, de Raja Nebukadnezar en sen-henebeheg, ne it heneselei on henebe henowaruhup on en sen-henebeheg, duhup. Nebukadnezar en de enda hesalug henobahauk fug angge hit mundoho binggi henowaruhu. Ulug An TUHAN en nele mundoho ihi” eheik ulug hweag-umuk isi.

⁸Airoho isireg TUHAN en At omaliki on fam wene diroho hweag-esowag ulug an hweag-nitsi, “Holiek! An TUHAN en de hiren momalukwag ulug hweag-hesauk kahi: Henoluk welamuhup on ai fam lauk kamluhup a, waratuk on ai fam lauk kamluhup a.

⁹Ap enebe domog o kota fam welamuhup on de dog en mel, siburu obok en mel, ouk amben siag on en mel, waramuhup. Famen de it wilibik lalug Babel enap o kota su bin kwik waharuk on enenggikmu aik lahup on de enowaruhup fug mu lil amuhup.

¹⁰An den kota su mundoho luluhun duhuk ulug mundoho irihik mu re nenda hahuk fug. Kota su re raja Babel on enggikmu fohukmu, aren mun obale damukdoho han yaluhu. Ulug An TUHAN en nele mundoho ihi” isi.

¹¹TUHAN en de wene su at raja Yehuda on hun Daud ambiangma on anyo ahain elekwe fam hweag-esowag ulug hweag-nitsi, “An TUHAN en nele uruk kahi on su holiek. Hiren nukoho hundig-hundig katukdoho duruk ale ai on welamag ulug duruk kamek. Ap anggin-fanggin enobam feserukmu wereg on etma it anggin feseruk on enenggikmen lole feseruk kamek. Airoho duhup fug halug de An nolok de indok ambulbul ulog durukmu nahuluk fug hagdoho henobam fohuk” isi.

¹³Ai en TUHAN en Yerusalem fam hweag-esauk kwit, “Hat Yerusalem su, hat hebe welahen ale re donggo hat haluluk kwe etma sebeleg kweleg hat neg lehoma welahen. Hat de lei donggo doaleg on fam en duk leho on hag deg lahen, famen An den hat nim wal-wal amuhuk. Haren uruk kwit ap misig en oho kota ai bin kwik waheg, ite helep lehet enalong bal-angge wirigmu etma housaloho kwik waheg, duk fug alereg uruk kahen,

¹⁴famen haren hobabut duruk kahen ale ai fam An den unggum og-huruhuk. Hat hebe welahenma istana ai mel, di angge su angge aluluk kwe wereg on mel mundoho han yaluhuk. Ulug An TUHAN en nele mundoho ihi” isi.