Read Ninia Yali YEREMIA 22 Bible Online

YEREMIA 22 - Ninia Yali bible

YEREMIA 22

¹TUHAN en de an nebe ap raja Yehuda on hun Daud ambiangma on wereg ma lalug wene su at raja nim autsi pegawai nim ap homi Yerusalem wereg on nim hweag-esowag ulug mingming napuk kwit, TUHAN en it fahet ele isi on de diroho isi,

³“Hiren katukdoho deheg, bekitdoho deheg, duruk kamek. Ap homi anggin-fanggin enobam feserukmu wereg on etma it anggin enobam feseruk on enenggikmen loloho wilibi feyek. Hiren ap bohon fam inim, omalik wetien on fam inim, homi sohwe on fam inim sebeloho feseheg, henolok fam debeseheg, duk fug. Ap homi o suman siag duruk eleg kweleg binggi enowaruk fug.

⁴Hiren lahe dik-demdoho An den wene melaleg duruk kamuhup halug de, raja hun Daud hag on de o istana su sokole fene etma kwik wamuhup. It enebe nim, enautsi pegawai nim, ap homi holduk on nim no kuda mel, kereta mel fam lahalug kwik wamuhup.

⁵ Famen hiren An nawene melaleg hweag-hesauihik on holoho duk eleg angge welamuhup halug, de ap raja wereg ma o bumbuk aire luluhun esahuk. Ulug An TUHAN en nele mundoho ihi.

⁶An den hauk kwit de ap raja Yehuda on wereg ma aire kwenang o Gilead mel ne dom o Libanon fam mel il buhundeg ma etmano hag deg ma hauk kahi, famen obale eta An den iliangge lei ap homi wereg elegma hag debehuk.

⁷An den de ap en luluhun deboukwag ulug mon-enebik waruhukmu, iren yaha haroho waharuk kwit de o e hulug lahabeg on e lak o Libanon fam en mininggoho wirig angge buhun etma moluluk dukwag ulug hweag-esahukmu re iren indokma yale fesehup.

⁸Airoho debehupmen de ap bohon kwe ai lauk kwit, eke en eke fam hein og-og atuk kwit de nunggwelug An TUHAN en kota mun ebe on au fam airoho disi.

⁹Ulug airoho urukmu ap en hweag-esauk kwit de, ‘It Israel on en An henakni Allah ninim sali watswa on anyo dahan debelug, iren ilah amu on obahet deheg, apne weheg, duruk katswa ma disi’ uruk kamuhup eheik ulug hweag-esakin” isi.

¹⁰Ap homi Yehuda on, hiren de Raja Yosia waratsi on fahet fong watuk eleg. Ite at amloho Yoahas anyo neg de ap en walug lausa ma nikangge waruhu fug angge, ne kwenang at ebe endag-atsi mu re il en eke hahu fug anggere obahet oba yatuk kamek.

¹¹ At Yoahas hun Yosia amloho, akni obalma ap homi Yehuda on fahet raja inatsi on anyo fahet TUHAN en diroho isi, “At de o suman mundoho lasi anggere nikangge waruhu fug.

¹²At ebere sabu hetdoho feseik lahupmu etman wararuhu mu re o kwenang su il en eke hahu fug” isi.

¹³Ap obam wutuk kwit katukdoho duk fug angge wireheg, ne hihiloho logap duruk kwit bekitdoho duk fug angge deheg, duruk on aire alemat atuk kamag. Ap yabuk dukwag ulug hweag-esalug en onggo og-esauk fug on aire alemat atuk kamag.

¹⁴Ne, ap eke en uruk kwit, “An den o istana humon eke wiri folug ambolma etlema ambe ilonggo ele healoho witmin” ulug aren istana anyo e lak o Libanon fam en obahat, jendela mel wiri folug ahalue mep on ware foruk.

¹⁵Raja Yoyakim, hesanggo holin! Haren hobam bumbuk ai e lak ebe on o Libanon fam en neg wutuk kahen ai fam de, ap raja amu on maben hag deg kweleg hat neg de kain on welahen a? Hat hakni welatsi ale wenggel-hakin: At de oluk ebemiroho wereg lit aren di ale su ale duruk on omano re bekitdoho neg deheg, enameg neg deheg, ne ap kunggu on enawene katukdoho bal-enebeheg, duruk katsi fam ambiangma fano ale neg hauk katsi. Ap TUHAN enoluk enap en de airoho duruk angge.

¹⁷Famen, hat Yoyakim de hamureg lahen. Hat de honggwareg dung atmin on ulug neg hera duruk kahen. Haren de ap siag duruk eleg kweleg binggi enowareheg, ap homi holok fam al hondoroho feseheg, duruk kahen.

¹⁸ Ai fam de raja Yehuda on hun Yoyakim, hun Yosia amloho ai fahet TUHAN en diroho eheik, “At ebe wararuhu mu re ap en obahet oba yaruhup fug; ne ap eke en uruk kwit, ‘Yehei an nare ahi’ eheg, ite it eke en oba yako enele uruk kwit, ‘Hun log anyo elaheg nendan aho’ eheg, duhup fug.

¹⁹Yoyakim de ap en no keledai wareg filik hwik-esauk kwit duruk hagdoho, at ebe lisulug de o Yerusalem sokole humon fene en hwik-esa wilibuhup,” isi.

²⁰TUHAN ele uruk kwit, “Yaho hit ap homi Yerusalem welahep on de hit hinim seberulug weim yapuk kahep on omano mundoho enalong elehap debesehesa anggere, o Libanon kwe lalug ngai-wai angge deheg, ne o Moab dom kwe etma nenek-yoba deheg, dik lakiek.

²¹Hit henebe fanoroho wereg li em An den nele mundoho hweag-hesauihik famen hit holduk ale henerim deg latuhup. Aire hit de o endam et angge ketia huli re An nele holoho duk fug angge duruk mu henobabut aireg ma hesauk kahi.

²²Ai fam de hit melal-henepuk on etma re hol en fi esaukmu hag eleg amuhup. Ne, ap hit ininim seberuruk kahep on de sabu hetdoho og-eneplug lahup, ne hit henobam kota re hit henolok ale duruk kahep etma fam enalitno debeheg, horogap debeheg, duruk kamuhup.

²³Hit de e lak o Libanon on owag en maseroho kwelap-henusugmu henenda yuagdoho welahep, famen fobik de hit de ouk on henobam aik waharuk li em de hit homi en enomalik enderukoho ouk en nenek duruk hag, duhup,” eheik isi.

²⁴ TUHAN ele Raja Yoyakhin hun Yoyakim ap homi Yehuda on fahet raja welatfag on amloho anyo fam uruk kwit, “An Allah nonggwareg noluk welahi on nunukdoho anggere, hat hebe fahet An den de helep sehene nenggik seheletma eneg angge dag deberuk on hag deg lahen, famen an den hat hebe heneko,

²⁵ap haren hakol enepuk kahen on ne iren iren hat howaruhup on fam og-esahuk. Hat de An den hun Nebukadnezar raja Babel fahet wereg ahun ai mel, at autsi mel fam og-esahuk.

²⁶Hat nim hat hisinga nim de An den muko wilibi henebahakuk deg o kwenang mumu hit endag-atuhup fug mu etma hwik-henesahukmu, etman hit waramuhup.

²⁷Hiren de o kwenang suma fahet henenda fu en duruk kamuhup famen de hit sombandoho wamuhup fug” isi.

²⁸Airoho isimu an Yeremia en nele uruk kwit, “Yaho, hun Yoyakhin aire ikwag erap deg on hwik-esauk on hag atsi mu enenda duhup fug a? Indip de ai fam at nim omaliki nim o kwenang it enapelegma muko hwik-esa lahu a?”

²⁹Yehei, an nobam su TUHAN en uruk ale su holin,

³⁰“Ap aire omaliki re longgo uhupmu deheg, ne aren duruk ale re ambiangma eke fano am fug angge deheg, duruk karuhu on ulug atsi on. Aren ondoho on ambiangma en de o Yehuda fam suma Raja Daud ambiangma on ulug raja wereg lit melal-enepuk kamuhup fug. Ulug An TUHAN en nele mundoho ihi” isi.