Read Ninia Yali YEREMIA 23 Bible Online

YEREMIA 23 - Ninia Yali bible

YEREMIA 23

¹TUHAN Allah Israel on en anyo ele uruk kwit, “Hit ap melal-enepuk on en An nomaliki nale feseheg, del-fol eseheg, duruk kahep on etma alemat atuk kamek! Hiren de An nomaliki etma hwal-enepuk kam on de hiren airoho duruk kahep fug; it enemu-enemu bupa ukwag ulug embeseruk kahep. Ketia re hiren honolok fam duruk kahep ale ai fahet An den unggum og-hesahuk.

³Famen it An nomaliki en ando it enoluk welamuhup on de An den it hwik-enebuhukmu etman kabogdoho fesehuk. It de An den og-eneplug it enanggwenang enonggwareg on fam waruhukmu iren ondoho on de humdoho saha uhup.

⁴An den ap melal-enepuk on it hwal-enepuk kamag ulug unduhuk fesehuk. An nomaliki re enakol en deheg, enowag elek deheg, duhup fug; ne iron fam en dem misig oho eke longgo uhu fug. Ulug An TUHAN en nele mundoho ihi” isi.

⁵ TUHAN ele uruk kwit, “Li andigim aik waruhu salim An den ap raja misig eke mun katukdoho neg duruk on hun Daud ambiangma on unduhuk fohuk. Mu re raja ai en de enda wenggeleg fam melal-enebeheg, o kwenang abirangge fam etma katukdoho on neg deheg, demdoho on deheg, duruk karuhu.

⁶Ne, aren melal-enepuk halug de ap homi Yehuda on de enahap wendareg welamuhup, ne ap homi Israel on de enambong seroho welamuhup. Raja ai fahet de, ‘TUHAN nit nenahap wendatuk on’ uruk kamuhup.

⁷Li aik waruhu on fam de ap homi An Allah noluk neg welahi on o Mesir en ap homi Israel on og-eneplug wilibik waharihik on anyo nunuk fam hombuk balduk kamuhup fug,

⁸ite An Allah noluk neg welahi on kwenang utara fil en nomaliki Israel on del-fol-esauihik kwe omano en og-eneplug wilibik waruhuk on nunuk fam hombuk balduk kamuhup. Mu re it enebe re enanggwenang on fam wereg lamuhup” isi.

⁹An den it nabi fahet wene uruk kahi on de su: An de nowag elek duruk kwit nendama mundoho siag aha. TUHAN ebe nim At ele mun amu eneg on uruk ale nim en an de ap anggur ahaik humdoho nalug siomo duruk on hag ahi.

¹⁰Nit nenanggwenang fam oma re ap homi TUHAN fam dipdoho duruk eleg on neg humdoho deg. It de enolok ale neg duruk wereg lit enalong welamag ulug unduhuk wereg on etmano fam hesangge-besangge neg duruk. TUHAN en hururung deg fam de enggelangge leimu omano mundoho bug-liog eheikma, o kwenang suno abirangge fong watuk.

¹¹TUHAN ele uruk kwit, “Nabi mel imam mel de An nele holoho duruk ale enerim deg. An nobam olman famen oho re iren siag ale durukmu hweag-enepihik.

¹²Ai fam de it enanggoboke re beik deg lit mum deg ma re it dungdoho wat-dauk. An den it unggum og-esahuk li mundoho aik waharuk halug de An den it enebe nal atuk on debeseik waruhuk. Ulug An TUHAN en nele mundoho ihi.

¹³Ap nabi o Samaria wereg enap en enesiag duruk on etma An nil hauihik. Iren de Baal unuk fam uruk kwit An nomaliki ap homi Israel on wene siag on hweag-esauk.

¹⁴ Famen de o Yerusalem fam neg de it nabi en mundoho enolok siag on durukmu esauihik. Iren de seiale eheg, babi deheg, ap siag on dukwag ulug onggo bal-enebeheg, durukmu re ap misig ulug oho enenda aham duk fug alereg ma hauihik. Mu re An den it mundoho fahet de ap homi Sodom nim Gomora nim enolok welatfag hagdoho boruk kahi” isi.

¹⁵TUHAN Mun Along wereg on ele uruk kwit, “Ap nabi o Yerusalem wereg on etma fam An den nauk on asig angge nim, kwenang al ap watuk angge hag nim, it nowag ulug og-esahuk. Aire iren dil ale fam ap homi o kwenang abirangge omano en An nalong bolug leho nobaharuk fug ai fam duhuk” isi.

¹⁶Ap homi o Yerusalem wereg on fam TUHAN Mun Along wereg on en ele uruk kwit, “Hiren de it nabi enele fam diroho airoho ulug hweag-hesauk on etma hol-enebuk fug. Iren uruk on etma re An den iyek uruk ale re fug, it enendaman wenggel-halug uruk.

¹⁷Ap homi An nele holduk eleg on fam iren uruk kwit de, ‘Hat hahap wendareg’ eheg, ne ap homi enenda omamne deg on fam iren de, ‘Hat de hebe alemat aruhun fug’ eheg uruk” isi.

¹⁸An den uruk kwit, “Ap nabi etma dem misig en oho re TUHAN endama yohwareg ale etma enoluk deg fug. Iren eke TUHAN en duhuk ale ulug wenggelduk on holeheg, ne At ele uruk on fu debelug weheg, duruk fug.

¹⁹TUHAN olok aire hol sielu en hagdoho ap enoluk on fam enowarik waharuk kwit elehap enepuk.

²⁰TUHAN en duhuk ale ulug wenggeleg wereg on etmano mundoho am fug mu re At olok laharuk on anyo sebel aik wambuk fug alereg. Fobik en neg it TUHAN omaliki en wene etma senggegdoho fu debehup,” irihik.

²¹TUHAN ele uruk kwit, “Ap nabi etma re An den mon-enepihik mu hag, enasukun kaindoho duruk. An den diroho iyug ulug mel it fam uruk kahi fugmen de iren An nunuk fam wene hweag-esauk.

²²Iren lahe An nendama yohwareg wereg ale etma enoluk deg laman de, iren An nomaliki fam wene An den uruk kahi on hweag-esauk kalep. Ma re An nomaliki enobabut siag deheg, enolok welaheg, deg on etma aham delep.

²³An de Allah di kwe su kwe mundoho welahi on, misigmu neg welahi fug.

²⁴An de di kwe su kwe, boholma nim kwenangma nim welahimu neg deg ma re, ap misig en eke An nolohotman herag am fug alereg.

²⁵It nabi etman uruk on etma abirangge An noluk deg. An nunuk fam seiale uruk kwit, wene TUHAN en na fam hweag-neseheik on uruk.

²⁶Nabi etman An nomaliki kwe amu on fam laloho feseruk kwit neg weregman de ke huli welamuhup no?

²⁷Iren boruk kwit de ena hauk on dindil duk eta fam de An nomaliki en de it enombawi en An enapeleg atlug Baal apne wauk katfag hag dulusa boruk kwit duruk a.

²⁸Ap nabi a og-hauk on de, ‘Su re na wihi ale’ urukam on. Ite nabi An den nele uruk on holug halug de wene ai ebe demdoho on neg hweag-esauk kam on duruk. Gandum de jerami nim higit-ap duk fug alereg.

²⁹An nele aire indok hag deg, ne matilo en helep watuk on hag deg.

³⁰An den de ap nabi wene enori en urukmu holug famen wene An den eheik on ulug uruk on etma re il enebuhuk.

³¹An den eke re it nabi wene enele en felal-heheg ulug en wene ai An den eheikma uruk on mel il enebuhuk.

³²An TUHAN en de ap nabi ena seiale on hweag-esauk on etma il-enebuhuk. It de seiale enele en werahap heheg An nomaliki kwe siagma feseruk. It etma re An den iyug ulug hweag-esauihik mu re fug. It etma re An nomaliki fahet de ebe on fug. Ulug An TUHAN en nele mundoho ihi” isi.

³³TUHAN ele uruk kwit, “Yeremia, An nomaliki on misig en oho, ite nabi ane, imam ane misig en oho, hat hein og-heauk kwit, ‘Wene TUHAN en nunggwe eheik?’ ulug uruk halug, ‘Hat de TUHAN obam anggin[12] kwelapuk kahen on welahen; ai fam de hat hebe hwik heasi’ ulug hweag-umuk.

³⁴Ne, An nomaliki on misig en oho, ite nabi en ane imam en ane, enele uruk kwit, ‘TUHAN obam anggin’ ulug uruk halug de, at ai ahain elekwe on nim de An den unggum og-esahuk.

³⁵Famen ahamdoho it ap eke en enori fam oho ite it enahain elekwe on fam oho hein og-esauk kwit, ‘TUHAN en wene onggo eke eheik a?’ eheg, ite ‘TUHAN en nunggwe eheik?’ Uruk kamuhup aire fano.

³⁶Iren de enele fam en, ‘TUHAN obam anggin’ ai eke uhup hayog. Ap homi eke en lahe ele ai on uruk neg halug de, An den dik-demdoho nele uruk kahi on ai obam anggin debehuk. Ap ele fam uruk kwit, ‘TUHAN obam anggin’ uruk on de An it enakni Allah nele, An Allah noluk neg welahi on, TUHAN Mun Nalong on anyo nele aham-faham hauk.

³⁷Iren ap nabi fam uruk kwit de, ‘TUHAN en hat hobam wene onggo keroho hweag-hereheik? Ne, TUHAN ele keroho eheik?’ Ulug neg uruk kamuhu eta.

³⁸Ai famen ap homi eke en An nele uruk kahi on holoho duk eleg angge en iren enele uruk kwit, ‘TUHAN obam anggin’ uruk on anyo neg uruk,

³⁹halug de An den it nenggikmu yinggiloho[13] wahukdeg it enebe nim it enobam kota An den it enombawi fam og-esauihik mu nim yit-yatma hwik-esahuk.

⁴⁰An den it li mundoho-mundoho etma fam enenggali heheg, enalitno enepuk kamag ulug debeseheg, duhuk ne it fam airoho hauk kamuhup ale aire ap homi en enapeleg amuhup fug” isi.