Read Ninia Yali YEREMIA 24 Bible Online

YEREMIA 24 - Ninia Yali bible

YEREMIA 24

¹ Nukoho eke salim at Yoyakhin hun Yoyakim amloho ap homi Yehuda on fahet raja welatsi on anyo mel, ap pemerintah Yehuda on enobahet yabuk lehoma duruk on mel, di angge su angge lalduk enoluk on mel, yabuk duruk ale enoluk deg on mel de, raja Babel on Nebukadnezar anyo en o Yerusalem en sabu hetdoho o Babel og-eneplug lausa ma weregman, TUHAN en ena hauk hag fam eke ename fesi. An hauk men de si yihig biren angge fam de e ara anggen yohwaroho o TUHAN Obam olohotman etano wereg ma hauihik.

²Hauk men de si yihig keram on fam de e ara anggen mun ebe on neg yohwareg latsi, ne si yihig eke fam de e ara anggen filik on yohwareg ma na fug aleroho deg ma hauihik.

³Airoho hauihikmen, TUHAN ele an nobam uruk kwit, “Yeremia, haren ai nunggwangge hehen?” ulug hein og-neasimu, an den onggo uruk kwit, “TUHAN nakni, aire e ara anggen hihi. Mun ebe on de ebe-ebe ale neg deg, ne mun filik on de filik deg ma re na fug alereg, nakni” ulug hweag-itihik.

⁴Airoho irihikmen TUHAN ele ekenim uruk kwit,

⁵“Ap homi o Babel het-eneplug lowag ulug nil ferihik on etma re e ara anggen ebe on oma hag; deg ma re An TUHAN Allah Israel on enakni en de fano ale neg debesehuk.

⁶An den de it hwal-enepuk kwit welaruhukdeg, nikangge og-eneplug kwenang su fam waruhuk. An den de it wiri fesehuk, ne moluluk debesehuk de fug; An den yaho fesehuk, hene fesehuk de fug.

⁷An den it fam enenda anye fam An TUHAN welahi ale anyo fu-nobahaukwag ulug og-esahuk. Ai fam de iren enenda abirangge fam An nakit sombandoho wamuhupmu re it enebe An nomaliki amuhupmu, An de it enakni Allah aruhuk.

⁸Famen hun Zedekia raja Yehuda fam wereg on ai mel, ap yabuk lehoma duruk enap at ebe nim horogdoho deg enap mel, ne ap homi Yerusalem on ando o suma wereg lit en o Mesir o oko lahup on mel, de An den e ara anggen filik on, na fug alereg on oma hag debesehuk. Ulug An TUHAN en nele mundoho ihi.

⁹An den mundoho wil-wal halug enebe alemare fesehukmu re di ap su ap o kwenangma wereg on abirangge en de enakol duruk kamuhup. O it lowag ulug debesehukmu etma laukmu re ap homi it bulip enebeheg, unda yako belap enepuk on debeheg, horogap debeseheg, duruk kamuhup. Ap en hururung enepuk kwit halug de it enunuk yiko uruk kamuhup.

¹⁰An den de it fam weim mel, siburu obok mel, ouk amben siag on mel, mondorik waruhukmu re, it enebe mundoho waramuhup, o kwenang An den it enombawi fam og-esauihik on au fam de eke welamuhup fug” isi.