Read Ninia Yali YEREMIA 25 Bible Online

YEREMIA 25 - Ninia Yali bible

YEREMIA 25

¹ Yoyakim hun Yosia amloho anyo raja inatfagdeg Yehuda fam melal-enepuk men neg de tahun ohwaneg on wereg kweleg, an TUHAN en enunggul unuk Yehuda on mundoho fahet wene hweag-esowag ulug hweag-nitsi. Eta li em de at Nebukadnezar o Babel fam raja inatfagdeg duruk li atsi.

²An den de ap enunggul unuk Yehuda on mel ap homi Yerusalem on mel fam nele uruk kwit,

³“Hun Amon amloho Yosia anyo en o Yehuda fam oma melal-enepuk wereg li em tahun nogwal on en angge o yoho huli, dua puluh tiga tahun welahe on eya fam de, TUHAN en an nobam wene hweag-nutuk mu re an den eke embesouk fug angge hweag-hesauk kwit neg welahi, famen hiren fu deberuk kahep fug.

⁴TUHAN en oho re hundig-hundig At amingming angge nabi omano hit henakit mon-enebik waharuk katsi, famen hiren it enele holeheg, fu debeseheg, duruk katuhup fug.

⁵Iren hweag-hesauk kwit, hit henanggwenang TUHAN en hit nim it henombawi nim henonggwareg henangge on amag ulug og-hesebag ma oma welamuhup en de, hit henobabut hape siag fam welaheg, siag deheg, duruk kahep on ai embeseyek ulug hweag-hesauk katswa.

⁶Nabi etman de hiren kembu ilah amu on fam apne weheg, obahet deheg, duruk kam fug, hiren airoho duruk fam de TUHAN olokap kwelapuk kahep, ulug hweag-hesauk katswa. Ne, hiren TUHAN ele uruk on muko duruk halug de hit unggum hwelahup fug, uruk katswa.

⁷Famen TUHAN onggwareg en uruk kwit de hiren At ele furoho hole folug duruk kamuhup fug isi. Hiren de kembu etma apne wauk fam At olokap kwelapukmu, hit henonggwareg en neg unggum henobam fahat-dauk kamuhup.

⁸Hiren TUHAN ele holduk ale henerim deg lahep fam de At TUHAN Mun Along wereg on en uruk kwit,

⁹‘An den de it enunggul unuk o utara fil wereg on abiangge wol-enebeheg, ne An namingming angge Nebukadnezar raja Babel ai mel wol-enebuhuk. An den it ai lit-eneplug de ap homi Yehuda on mel, enunggul unuk it enaluluk kwe wereg on mel inim weim yabukwag ulug feseik waruhuk. Enunggul unuk Yehuda on mel it enunggul unuk amu on it maseroho etma wereg on mel de An den elehapdoho fesehukdeg mundoho-mundoho luluhun esahuk. Ap homi inil esahup on en de enakol en enamelmel hauk kamuhup. Ulug An TUHAN en nele mundoho ihi.

¹⁰ Iren hwe lombo durukmu soni esetuk kwit enele anggiluk ale uruk on mel enahayeg en duruk kwit uruk on mel de An den bale fohuk. Iren de lampu fahet minyak welaruhu fug, ne it enangge gandum de mundoho eleg aruhu.

¹¹ O kwenang abirangge au fam de An den mundoho luluhun debehukmu re ap eleg laruhu. It enunggul unuk maseroho wereg on etma re raja Babel on fam tujuh puluh tahun obahet duruk kwit welamuhup.

¹²Airoho duruk welamuhupmen de An den raja Babel mel ap homi enunggul unuk etma on mel en enesiag duruk kamuhup on etma fahet unggum og-esahuk. O Babel kwenang ai fam de An den mundoho belabe fohukdeg mundoho-mundoho fahet luluhun deg welamag ulug embesehuk.

¹³Babel de An den anggin on di unggul unuk su unggul unuk fam fohuk ulug wenggeloho ferihikdeg, An den Yeremia fene en hweag-hesauihik on abirangge anggin on aik waruhu ale fahet buku su fam baleg wereg on etma fam unggum og-uruhuk.

¹⁴Ap homi Babel on en duruk ale etma An den ambiangma onggo debehuk; it de raja lohon mel, enunggul unuk humdoho en mel, enamingming anggeap debelug welamuhup’ ulug eheik” isi.

¹⁵TUHAN ap homi Israel on enakni Allah anyo en an nobam uruk kwit, “Haren waruk anggur ahalue hwenanggeg angge An nolok anyo hwenangge fehi angge ai wakin. Walug de hat hebe An den mon-hapmin kwe di ap su ap unggul unuk wereg kwe etma lalug de anggur au nowag ulug hweag-esakiyug.

¹⁶It nahupdeg de An den weim it enobam mondorik waruhuk on ai fam de it kup-kup angge duruk kwit enenda wenggel-ha fugdoho duruk kamuhup,” ulug hweag-nitsi.

¹⁷Airoho isimu re an den waruk anyo TUHAN enggikmen oko walug, an nebe TUHAN en di ap su ap enunggul unuk wereg kwe TUHAN en mon-napuk kwe omano lalug, an den it etma anggur anyo nowag ulug duruk katihik.

¹⁸Yerusalem nim, o Yehuda fam en kota abirangge nim ap raja nim yabuk lehoma duruk enap nim de an den anggur anyo nowag ulug og-esauihik mu re it enebe re lei mundoho unggul ahap neg deg on hag atuk katswa. Ne, ketia huli en de it enunuk yiko ap en hururung enepuk.

¹⁹Ap fomane anggur TUHAN en waruk fam hwenanggeg angge ai nahup ulug on de enunuk su: raja Mesir on nim autsi pegawai nim ap yabuk lehoma duruk enap nim etma; ap Mesir on abirangge nim, ne ap bohon o Mesir wereg on nim mundoho etma; ap raja o Us kwenang fam wereg on mundoho nim; ap raja Filistin enap en kota etma fam wereg enap, o Askelon, Gaza, Ekron enap nim etma; ap homi o Asdod fam enoluk wereg on nim; ap homi o Edom, Moab mel, Amon mel fam mundoho nim etma; ap raja o Sidon on nim Tirus on nim mundoho mel, ap raja Laut Tengah elan kwe wereg enap mel etma; o kota Dedan mel, Tema mel, Bus mel etma; ap enoruk horogdoho balduk on mel; o Arab fam raja wereg on abirangge mel; ap raja enunggul unuk hwandohwaldoho aham-faham iliangge lei kwe wereg on nim; o Zimri fam raja wereg on mundoho nim, Elam, Madai fam mundoho nim etma; ap raja(...)

²⁷Ai en TUHAN en an nobam ele uruk kwit, “Haren ap homi etma fam uruk kwit, An TUHAN Mun Nalong welahi on, ap homi Israel enakni Allah anyo en de, hit mundoho en anggur ai mundoho nalug siomo duruk kwit me wiroho nowag eheik. An den de weim it enobam mondorik waruhuk on ai fam en it enebe waroho ying amuhupdeg de inam fug aleroho welamuhup.

²⁸Ne, hat henggikmen waruk anggur hwenanggeg ai walug nauk ale enerim en duruk halug de, TUHAN Mun Along wereg on anyo en mingming nabaheikma iyug.

²⁹An den de luluhun duruk ale aire An nobam kota fam en dag indip duhuk. Mu re iren boruk kwit nit unggum nenobam aruhu fug ulug boruk kamuhup i. An den de weim o kwenangma di ap su ap fam mondorik waruhukmu it de demdoho unggum hwelahup. Ulug An TUHAN Mun Nalong welahi on en nele mundoho ihi.

³⁰Yeremia ao, An den nele ihi on etare haren mundoho hweag-esakiyug neg. It enobam uruk kwit de, ‘TUHAN ele re boholman bererag duruk; At ebe weregman mun amu enegma omano en de omaliki nim weim yabikoho hum duruk. Aren enap durukmu re ap homi kwenangma on mundoho en holuhup ap anggur anggen baldukmu en ahaik berelduk kwit duruk hag deg.

³¹O kwenang ambiang-ambiang etma re At ele uruk on mil dik lauk, TUHAN en de ap di unggul unuk su unggul unuk fam wene balikoho duruk, Aren de ap homi mundoho enawene katukdoho baluhu ne ap enolok on de unggum og-esahuk’ eheik iyug” ulug urukmu hauihik.

³²TUHAN Mun Along wereg on anyo en uruk kwit, “O kwenang unggut-unggut etman de hol firoho eleg-wereg hauk; anggin-fanggin ap homi enunggul unuk domog fam enobam aik waruhu” urukmu hauihik.

³³Nukoho ai fam de ap homi TUHAN en enowaruhu on de o kwenangma mundoho waroho ying-beya uruk karuhu. It etma re enobahet oba yag-enebeheg, oko sal-enebeheg, duhup fug, ite kwenangma alal angge kabogdoho embeseruk on hag embesehup.

³⁴Yaho hit ap melal-enepuk kahep on! Yaho hit TUHAN omaliki hwal-enepuk kahep on! Oba henele hum fam yatuk kamek! Ul fene imbil-imbil angge lauk kamek, hit henebe honowaruhu li anyo mundoho horog aik waha, ne lil amuhup on de del-fol esahu anggere. Hit de ikwag kwenang on ebe angge famen wamburuk kwit erap duruk[14] on hag amuhup.

³⁵Hit de lil amuhup fug.

³⁶TUHAN ahumu olok en de hit henunggul unuk on anyo mundoho elehap debeseheg, hit henanggwenang mun ebema anyo luluhun debeseheg, deheikma re, hit henenda si eheg, oba siagdoho yareheg, duruk kamluhup.

³⁸No singa kwenang ahauk elman wilibik waharuk hag, TUHAN en oho omaliki unggum og-esaroho wilibik waharuk. TUHAN olok nim hape fam duruk on nim fam de o kwenang suno ahamdoho re iliangge lei aha.