Read Ninia Yali YEREMIA 26 Bible Online

YEREMIA 26 - Ninia Yali bible

YEREMIA 26

¹ Hun Yosia amloho Yoyakim anyo o Yehuda fam raja inatfagdeg duruk kweleg etano,

²TUHAN ele an nobam uruk kwit, “Hat de An nobam ambe lilimol fam etma lalug de ap homi Yehuda on An nobahet dukoho waharuk on etma fam hele iyug. Haren imihin ale ulug An den hweag-hitmin on etma re abirangge hweag-esakiyug. Haren dorangge ulug oho eke belabuk fug.

³Airoho imihin ai fam de it enunggul unuk ai en An nele holduk ale enenda dulug, iren enolok ale duruk on omano bale feil lauk em, it duruk ai fam An den nale fesehukmu ulug wenggeldihikdeg deg lahi on ai sebel hihi ha ano” ulug hweag-nitsi.

⁴TUHAN en an nobam de diroho hweag-esakiyug isi, “An TUHAN en wene melale-henobaharuk kwit, hiren An nele holoho deheg, wene diroho airoho diyug ulug hweag-hesauihik on anyo deheg, duruk kamuk ulug hweag-hesauihik.

⁵Ne, eke hiren de An namingming angge nabi hundig-handig henekit mon-enebik waharuk kahi on etman uruk ale holduk kamuhup fano. Famen de hiren it enele holduk ale henerim deg lahep.

⁶ Hiren henenda omamne ale neg duruk kamuhup halug de, o wene kabog-duruk kwit An nobahet duruk kahepma aure An den o Silo[15] deberihik hagdoho debehuk, mu re di ap su ap enunggul unuk kwenangma wereg on en de o Yerusalem unuk yiko hururung enepuk kamuhup” isi.

⁷Airoho isimu re An den o TUHAN Obam ilonggoman wene irihik on etmano mundoho re ap imam mel, nabi mel, ap homi mundoho en mel enesanggo holswa.

⁸An den wene TUHAN en mundoho iyug ulug isi ale omano nele kikobog de, iren an sen-napswareg enele amitmit duruk kwit de, “Hat de waratmihin!

⁹Hat hambong si-se angge TUHAN unuk fam hele uruk kwit hehendeg o TUHAN obam su re o Silo atsi hag aruhu eheg, ne o kota su mundoho eleho fohumu re ap welamuhup fug eheg, uruk kahen au a” ulug uruk kwit de an nebe ap humdoho en walinggoho kwelap napswa.

¹⁰Airoho duswa ma re it ap Yehuda on pemerintah enobahet yabuk lehoma duruk on omano en holswareg de, it enebe hun raja obam bumbukmu en folo-folo wilip atlug wahausareg de o TUHAN Obam wirigmu omano en sokole unuk Pintu Gerbang Baru uruk on fam etano hwerieg latswa.

¹¹Airoho wereg ma it imam mel nabi mel en de ap yabuk lehoma duruk on mel, ap homi we on mel fam uruk kwit de, “Ap su en de o kota su aruhu ale fahet ulugdoho eheikma re at de unggum og-utlug ebe binggi waratmisi. Hit mundoho en de holehep neg ai” ulug uruk katswa.

¹²Airoho urukmu an den uruk kwit, “An de TUHAN en mingming napuk kwit o TUHAN Obam mel kota su mel aruhu ale fahet hweag-esa lakin isimu an den urukmu holehep ai.

¹³Anggere hit henebe welahep ale mel, duruk kahep ale mel aham diek; At TUHAN en duhuk ulug wenggelsi ale ai suhwi amagdoho re, hiren henakni TUHAN Allah ele holoho neg duruk kamek.

¹⁴An nebe fahet de hit henenggik fam neg wereg ma re hiren henenda boruk ale neg debeluhup.

¹⁵Famen de henenda wenggel-hakiyug, hiren an binggi nowatluhup men de, hit nim ap homi kota su on nim de ap siag duruk eleg kweleg watluhup on ai fahet ambiangma hit wahup. Aire an de TUHAN en mon-napuk kwit wene airoho eneluge feiyug isimu dirihikmen anggere” ulug hweag-esauihik.

¹⁶Airoho irihik mu re it ap pemerintah en yabuk lehoma duruk on omano en de imam mel nabi mel omano fam uruk kwit, “Ap su re nit nenakni TUHAN Allah unuk fam urukmu re, ebe binggi watuk ale re duk fug alereg” ulug uruk katswa.

¹⁷Airoho uswaman de ap homi enunggul unuk ai melal-enepuk on foma it enalukwema in aik lausareg ap homi kabogdeg on omano fam uruk kwit,

¹⁸ “Hun Hizkia o Yehuda fam raja unduhuk wereg kweleg de Nabi Mikha o Moresyet on anyo en wene TUHAN Mun Along wereg on anyo en isi ale ap homi hweag-esauk kwit, ‘Sion de yabuk kwenang moholduk hagdoho moholuhu, Yerusalem de o meiyaleg en kabog laharuk karuhu, ne o TUHAN Obam wirigmu en duk anyo re ohwei aruhu’ ulug hweag-esauk katsi.

¹⁹Famen de Raja Hizkia mel ap homi Yehuda on mel en de Mikha watswa fug. Ite at Hizkia akol atsireg de TUHAN en enda nabukwag ulug heng-disi. Ai fam de TUHAN en enowaruhuk ulug deg latsi on anyo lisoho wasi. Ne, ketia re niren nenonggwareg fam mundoho hum ale nal-amukoho dobahat-dauk kahe” ulug uswa.

²⁰Ne, eke re an den dirihik hagdoho ap amu on eke en oho kota su mel it enunggul unuk su mel TUHAN unuk fam aruhu ale ulug hweag-esasi. Ap ai unuk de Uria hun Semaya amloho o Kiryat-Yearim on anyo.

²¹Raja Yoyakim nim ap sehen seneg enap enowesi perwira inim, ne ap pemerintah enobahet yabuk lehoma duruk on nim en de Uria en ele uruk ale ai holswareg de raja en ebe watmin ulug duruk katsi. Famen airoho duruk ale anyo fahet Uria akol atsireg de akol en o Mesir heye lasi.

²²Famen de Raja Yoyakim en de Elnatan hun Akhbor amloho anyo ha ap fomane ha re o Mesir lalug Uria wag-lowag ulug mingming enepsi.

²³Airoho isimu re it wag-lausareg walug Raja Yoyakim akit wahausa. Ai en de raja en at ebe binggi warukwag ulug hweag-esasimu, ap en watswa ma re ebe wareg de ap sal-enepukmu omano hwik-esausa.

²⁴Famen ketia an de at Ahikam hun Safan amloho anyo en let-nabeheik fam de, an Yeremia nebe ap homi en yeik waroho binggi noarukwag ulug og-esehesa fug ai.