Read Ninia Yali YEREMIA 27 Bible Online

YEREMIA 27 - Ninia Yali bible

YEREMIA 27

¹ Hun Yosia amloho Zedekia[16] anyo o Yehuda fam raja inatfagdeg duruk kweleg etano, TUHAN en an mingming napuk kwit,

²sabu e ahap on fam hilinggeheg, anggin beahan hag on de e on fam hilinggeheg, dulug de an nanduhunmu sahali deboukwag ulug isi.

³Aren de eke wene ap raja Edom, Moab, Amon, Tirus, Sidon enap omano fam hweag-esowag ulug isimu re ap it enayonggo o Yerusalem hun Zedekia akit wahausa on fene en hweag-esowag ulug isi.

⁴An den it hweag-esauk kwit, TUHAN Mun Along wereg on, Allah ap homi Israel on enakni anyo en uruk kwit,

⁵“An Nalong humon fam nim, ne An nomamne fam bohol kwenang nim, ap homi nim enoluk wereg angge nim wal-dirihik on aire An den ap sa og-itmin boruk on fam og-irihi ha alereg.

⁶An den neg di ap su ap enunggul unuk etma An namingming angge Nebukadnezar raja Babel on ai fam og-itihik. Ne, wam di angge su angge oho re at along apma welamag ulug og-itihik neg.

⁷Di ap su ap enunggul unuk de at obahet deheg, at amloho obahet deheg, at omba obahet deheg, neg duruk men de o kwenang ai sebel aruhu huli etma welaruhu. Eta li em de it enunggul unuk Babel on de enunggul unuk mun enomamne on mel, raja humon mel fam enobahet duruk kamuhup.

⁸It enunggul unuk eke, ite kerajaan eke Nebukadnezar apma sebe uruk ale enerim deg halug de An den weim fam en nim siburu obok fam en nim, ouk amben siag on fam en nim, unggum og-esauk men neg de it enunggul unuk ai en raja Babel on apma sebe uhup huli etma.

⁹Iren uruk kwit nit de na fam en nim, oluk heime en nim, ite nik aleroho duruk fam inim en hweag-neseheikma uhup famen oho re, ai it nabi en halug oho it amu on en halug oho raja Babel on apma sebe uruk eleg ulug ili uruk on etma enele holuk fug.

¹⁰Iren de hit lal-henepuk kwit de o kwenang yatma og-heneplug lahup. An den de hit henanggwenang fam oman muko wilibi henobahakuk mu re hit henebe mundoho eleg amuhup.

¹¹Famen de it enunggul unuk eke raja Babel apma sebe ulug at obahet duruk kamuhup on de An den it enanggwenangma etma welamag ulug embesehuk mu iren eneyabuk wit-dalug yag-dauk kamuhup. Ulug An TUHAN en nele mundoho ihi” isi.

¹²Hun Zedekia, raja Yehuda fam welatsi on anyo fam oho re an Yeremia en wene nika on hweag-itihik. An den uruk kwit, “Hat de raja Babel on sebel amin. Hat nakni hebe hahap wendar amagdoho re at ai ele holoho deheg, it enunggul unuk etma fam deheg, din.

¹³TUHAN ele uruk kwit it enunggul unuk eke raja Babel on apma sebe uhup fug on de weim fam en nim, siburu obok fam en nim, ouk amben siag on fam en nim, waramuhup isi. Mu re nunggwelug nakni hat nim ap homi etma nim airoho eta waramuhup no?

¹⁴Ap nabi etman hat nakni lal-hapuk kwit, raja Babel on apma sebe uk fug ulug alele og-hapuk kwit uruk on etma holduk eleg.

¹⁵Iren de nit TUHAN unuk fam uruk kahe uruk famen de iren seiale uruk. TUHAN ebe en uruk kwit de aren it mon-enepihik fug isi. Anggere Aren neg nakni hat nim ap nabi nakni hat lal-hapuk on etma nim del-fol hesalug eleho henobahaku,” ulug hweag-itihik.

¹⁶Ai en an den it imam mel ne ap homi holduk on mel fam TUHAN en diroho eheik ulug hweag-esauihik, “Nabi etman uruk kwit di angge su angge o TUHAN Obam olma wereg ma duruk angge omano re nikangge o Babel en horog il misig fam walug wamuhup ulug uruk on etma holduk eleg. Iren de enele seiale uruk.

¹⁷It enele henesanggo holduk eleg! Hit henahap wendareg welamuhup en de raja Babel on apma amek. Nunggwelug kota su luluhun aruhu no?

¹⁸Ne, it etma demdoho nabi wereg halug, ne wene An den hwag-esauihik mu uruk halug de, iren An heng-napuk kwit di angge su angge An nobam olma mel, raja ebe wereg ma mel, etma o Yerusalem en walug Babel lahup fug ulug An TUHAN Mun Nalong welahi on fam heng-naplep.

¹⁹An TUHAN Mun Nalong welahi on, Allah ap homi Israel enakni en mundoho kong-duruk kwit, di angge su angge etma re o Babel walug lahup, mu re etma weregman neg de An den furebesehuk huli. Ai salim de An den nikangge walug sombandoho obale su fam walug waruhuk. Ulug An TUHAN en nele mundoho ihi” isi. Di angge su angge TUHAN obam wereg angge etma re: Waruk perunggu on hulugdoho lahabeg angge mel, kereta mel, nin amu on o TUHAN Obam ai obahet wereg angge mel eta. Unuk eta neg de Raja Nebukadnezar en hun Yoyakim amloho Yoyakhin raja Yehuda fam welatsi on anyo mel it Yehuda on enap enowesi ap log-lohon on mel o Yerusalem en hohouk eneplug Babel lauk li em walug lausa fug on welatsi.