Read Ninia Yali YEREMIA 28 Bible Online

YEREMIA 28 - Ninia Yali bible

YEREMIA 28

¹ Tahun anyo fam[17] neg at Zedekia raja inatfagdeg wereg kweleg neg de tahun ohwaneg on bigalem foab angge wereg kweleg, nabi misig o kota Gibeon on eke unuk Hananya hun Azur amloho anyo en de o TUHAN Obam wirigmu etano en an fam ele matsi. Matuk kwit ap imam mel, ap homi mel enolohotma etano en an nobam uruk kwit de,

²TUHAN Mun Along wereg on, Allah ap homi Israel enakni ai en diroho eheik, “Raja Babel on along wereg anyo re An den ambol sirebehi.

³Tahun biren welahe on eya fam de An den di angge su angge Nobam olman Nebukadnezar raja Babel on en feleleng dulug lasi on etmano nikangge An nobam feik waruhuk.

⁴Eke An den de Yoyakhin raja Yehuda on hun Yoyakim amloho anyo ha, ne ap homi Yehuda on inim seberoho o Babel og-eneplug lausa on etmano ha, nikangge og-eneplug waruhuk. Demdoho An den de Babel on omamne wereg on ai abi sirebehuk. Ulug An TUHAN en nele mundoho ihi” eheik isi.

⁵Airoho isimu re ap imam mel, ap homi mundoho mel TUHAN Obam wirigmu etmano unduhukmu, an den Hananya fam uruk kwit,

⁶“Fano ehen! Haren diroho suroho aruhu ulug ehen on ai ebe demdoho neg aruhu lamag, ne TUHAN en ebe demdoho di angge su angge o TUHAN Obam anyo en omano mel, ne ap homi enebe nim seberoho hwik-enebik lausa on omano mel nikangge og-eneplug waruhu lamag.

⁷Famen hat Hananya mel, hit ap homi mundoho mel en de wene su holiek:

⁸Ap nabi nit wereg fug kweleg atam welatswa on en aruhu ale ulug uruk kwit de, weim yabeheg, anggin-fanggin aheg, ouk amben siag on saha eheg, duruk kwit ap enunggul unuk mel, kerajaan mel enomamne on etmano enobam aik waruhu, uruk katswa.

⁹Famen, nabi etma re iren lahe ap homi enenda seroho wereg ale neg uruk halug de nabi etma demdoho TUHAN en mon-enebik wahasi on ulug uruk katswa, ai oho re iren uruk on etmano dip aik lauk halug” ulug hweag-esauihik.

¹⁰Airoho irihikmen de at Hananya en de an nomaloma e beahan hareg latihik angge anyo dalukdoho wasireg de sombo esasi.

¹¹Airoho disireg, ap homi mundoho kabogdeg latswa on etmano inil hanim aren uruk kwit, “TUHAN ele uruk kwit de, airoho neg at Raja Nebukadnezar en ap enunggul unuk fam anggin hwelang debesesi on etma sombo esahu; TUHAN en de tahun biren eya fam neg duhu,” ulug isimu re an nebe lauihik.

¹²Airoho atsi mu anyo welatlug horog etano re TUHAN en

¹³an hun Hananya akit lalug, diroho hweag-umuk isi, “TUHAN en uruk kwit de haren de beahan aire sombo esehen ha ale neg, famen Aren bosie on obalma fohu.

¹⁴TUHAN Mun Along wereg on, Allah ap homi Israel enakni en uruk kwit, Aren de bosie beahan anggin on di ap su ap enunggul unuk fam fesehu. Ne, iren de raja Babel on Nebukadnezar obahet duruk kamuhup. TUHAN en eke uruk kwit de di on su on maro etma oho re Nebukadnezar enggik apma fohu” isi irihik.

¹⁵Abirangge etma an den Hananya hweag-utlug an den eke uruk kwit, “Hananya ao, hat hesanggo holin! TUHAN en de hat mon-habik wahasi fug; haren de ap enunggul unuk su fam hele seiale hweag-esauk on omano demdoho boukwag ulug dehen.

¹⁶Ai fam de TUHAN ebe en uruk kwit hat de o kwenangma oman TUHAN en mundoho elehap hobahaku. Haren de it enunggul unuk au en TUHAN ele sahaloho dukwag ulug hweag-esauihin mu re tahun su fam hebe wararuhun” ulug hweag-itihik.

¹⁷Airoho hweag-itihik mu re tahun anyo fam neg bigalem sabiron wereg kweleg, Hananya waratsi.