Read Ninia Yali YEREMIA 29 Bible Online

YEREMIA 29 - Ninia Yali bible

YEREMIA 29

¹ An den surat baloho ap imam mel, nabi mel, it enunggul unuk Yahudi on melal-enepuk on mel, ne ap homi mundoho o Yerusalem en o Babel Raja Nebukadnezar en feleleng eneplug lasi on etmano mel, fam mondotihik.

²Surat aire Raja Yoyakhin mel, at isinga mel, o at ebe wereg ma yabuk duruk katswa on mel, pemerintah Yehuda nim Yerusalem on nim enobahet yabuk lehoma duruk on mel, di on su on duruk ale enoluk on mel, yabuk amu-amu on duruk ale enggat on mel, mundoho feleleng eneplug hwik-enebik lausa man baldihik.

³An den surat aire baloho hun Safan amloho Elasa anyo ha, Hilkia amloho Gemarya anyo ha re raja Yehuda on Zedekia en de raja Babel on Nebukadnezar akit mon-enepsi on fam mondotihik. Surat ai ele diroho baldihik,

⁴“TUHAN Mun Along wereg on, Allah Israel on enakni anyo en hit ap homi o Yerusalem en Babel hwik-henebik lausa on fam diroho isi:

⁵‘Etma yugdoho wereg lit henobam wit-dakiek. Airoho dulug de yabuk wiroho anggen yihig nauk kamuk.

⁶Henohwesi henahunsi og-enebeheg dulug henomaliki endag-enebeheg, ne henomaliki en oho enomalik endag enebukwag ulug, enohwesi enahunsi hweleheg diyug. Hit henebe re doratuk kam fug ite log atuk kamuk.

⁷Hiren yabuk duruk kwit de o An den hwik-henebik lauihik mu etma fano welamag ulug duruk kamuk. Hiren de kota ai fam sigdoho welamag ulug An nobam somban uruk kamuk, ne kota-kota etma sigdeg halug de hit oho airoho sigdeg welamuhup anggere.

⁸An TUHAN Mun Nalong welahi on, Allah Israel on enakni en de, hit ap nabi henesahalimu wereg on en oho, ne ap sa en halug oho ele hweag-hesauk kwit, niren fobik aruhu ale fahet diroho aruhu ehe ha alereg urukmu hiren lal-nenebukwag ulug durukam fug ulug heneluge foruk kahi. It ena og-halug hweag-hesauk on etma fu debeseruk kam fug.

⁹Iren wene demdoho fug on hweag-hesakoho re An nunuk yiko uruk. An den it airoho iyug ulug mingming enepihik fug. Ulug An TUHAN en nele mundoho ihi’ isi.

¹⁰ TUHAN ele uruk kwit, ‘Babel fahet tujuh puluh tahun etano dip aik waharuk halug, An den hit fu henobahakuk deg, An den sali hweag-hesauihik ale higitdoho hit og-heneplug o suma nikangge waruhuk.

¹¹An den de hit henobahakuk ale ulug de An noluk deg fug a? Duhuk ale ulug wenggeleg lahi on aire hit nale henobahakuk ulug de fug, ite hit henenda seroho welamuhup ulug, ne hit fobik welamuhup ale fahet mundoho henenda ebereg neg welamag ulug wenggeleg lahi.

¹²Mu re hiren An fam let-nenebin ulug heng napuk kamuhup. Hiren An nobam somban ul ulug waharukmu re An den hit onggo hweag-hesauk karuhuk.

¹³ Hiren An hera naplug hweag-napuk kamuhup. Aire hiren henenda abirangge fam An hera napuk kamuhupmu atlug.

¹⁴Demdoho, hit de An hweag-napuk kamuhup. Hit henebe ap di on su on enunggul unuk enanggeleg kwe en mel, di kwe su kwe del-fol hesauihik kwe etman mel andogdoho henobahalug, hit nikangge An den og-heneplug waruhukdeg o kwenang hinindipmu suma henobahaik waheg, henebe deg ale hwale henobahakeg, duhuk. Ulug An TUHAN en nele mundoho ihi’ isi.

¹⁵Hiren boruk kwit de TUHAN en nit Babel wereg ma nabi og-nesasi boruk kahep.

¹⁶TUHAN en ap raja ketia melal-enepuk on, Raja Daud ambiangma on au mel, ap homi o kota su wereg on, it henori-henerekwi hit nim seberoho hwik-henebik lausa fug on oma fahet eheik ale henesanggo holiek.

¹⁷TUHAN Mun Along wereg on en uruk kwit, ‘An den de it ap homi etma fam weim yabeheg, siburu obok aheg, ouk amben siag on aheg, debeseik waruhuk. It enebe re e ara anggen mun filik deg ma na fug alereg on hag debesehuk.

¹⁸An den it enebe weim en mel, siburu obok en mel, ouk amben siag on en mel, sik-mug esahukmu re di ap su ap enunggul unuk kwenang wereg on en it deg ale esalug enamelmel hauk kamuhup. An den mundoho del-fol esahuk kwe etman ap homi it fam deg ale esalug de enamelmeldoho enakol hauk kamuhup. It de ap en bulip enepuk kwit hururung enebukoho re it enunuk yiko uruk kamuhup.

¹⁹Mundoho etma aruhu ale aire An den diroho suroho ulug it fam uruk ale, hundig-handig An namingming angge nabi en hweag-esauk kweleg higitdoho duruk katswa fug ai fam hahup.

²⁰Ne, hit mundoho An den o Babel hwik-henebik lauihik on de An TUHAN en nele hweag-hesauk kahi on holiek’ ulug isi.

²¹TUHAN Mun Along wereg on, Allah Israel on enakni en de hun Kolaya amloho Ahab ai mel, Maaseya amloho Zedekia ai mel en TUHAN unuk yiko hit henobam wene seiale on hweag-hesauk on eta fahet ele isi. TUHAN ele uruk kwit de, Aren it enebe Nebukadnezar raja Babel on enggikmu fesehukmu re hit hinil hanim it enebe binggi enowaruhu.

²²Mu re ap o Yerusalem en o Babel og-eneplug lausa on eke en ek hururung duruk kwit de diroho uruk kamuhup, ‘TUHAN en hat hebe re Zedekia nim Ahab nim fam debesesimu raja Babel on en enoluk kengge han yal-enepsi hag aruhun,’ ulug uruk kamuhup.

²³Iren de siag humon ap homi Israel on weregman duruk katswa on de: Babi deheg, TUHAN unuk yiko wene seiale on fahet eheg, duruk katswa ma it fam airoho aruhu. Iren duruk katswa ale etma re TUHAN enda boruk ale nim aham deg on deg ma iren duruk ale[18] At mundoho oluk deg lit, it enalong elehapdoho feikoho re At amu en il esauk katsi. Ulug TUHAN nele mundoho ihi isi” ulug baloho mondotihik.

²⁴TUHAN Mun Along wereg on, Allah Israel on enakni en Semaya o Nehelam on ai en at unuk fam lisu baloho ap homi Yerusalem on mel, Imam Zefanya hun Maaseya amloho anyo mel, ne imam amu on abirangge fahet mel, baloho mondotsi mu wene hweag-omag ulug an hweag-nitsi. Surat ai fam Semaya en Sefanya fam diroho balsi:

²⁶“TUHAN en de hat hebe imam welamag ulug at Yoyada obalma unduhuk hobahasi, ne ketia re hat o TUHAN Obam anyo en yabuk leho on duruk kahen. Hat heyabuk de ap wenenebo on en an nabi welahi ulug uruk on omano enanggolobag fam sabu bosimanggen on en het-debesoukwag ulug welahen.

²⁷Famen haren at Yeremia o Anatot on ai en nit nenunggul unuk sahalimu oma nabi hagdoho atsireg duruk on ai nunggwelug airoho dirihin fug?

²⁸Ap ai en de ap homi Babel wereg on fam hweag-esauk kwit it enebe anunuroho etma welamuhup ulug uruk. Ai fam de ap homi etman de enobam wit-deheg, eneyabuk wiroho anggen yihig nenggeg, duruk. Mu re ap aire ambilik ele dopno esahup,” ulug baloho mondotsi.

²⁹Airoho mondotsi mu re surat anyo Imam Zefanya en an nobam bilinggisi.

³⁰Ai fam TUHAN en an mingming napuk kwit

³¹ap Semaya ai fahet ap homi Israel on o Babel hwik-enebik lausa on etmano mundoho fam wene mondorukwag ulug mingming napsi. Wene mondorin isi on aire ebe diroho: “Semaya en de at ebe nabi on hag atsireg hit henobam wene hweag-hesasi; famen An TUHAN en at mingming dirihik fugmen. Aren de hit ele seiale hweag-hesauk on etmano fam fu deboukwag ulug hweag-hesauk kwit

³²hiren An nele sahale folug dukwag ulug hweag-hesasi. Mu re An den at ebe nim at ambiangma on nim unggum og-esahuk. It enesahalimu on etman de ap misig oho eke hit nenesahalimu wereg lit An den nomaliki enobahet ebe ale duhuk on etma inil hahup fug. Ulug An TUHAN en nele mundoho ihi” isi ulug mondotihik.