Read Ninia Yali YEREMIA 3 Bible Online

YEREMIA 3 - Ninia Yali bible

YEREMIA 3

¹TUHAN ele uruk kwit, “Hwe eke ahun en embesesimu weregman hwe anyo ap amu on hwelauk halug de, ahun atam on anyo en nikangge hwe ai hwelahu fug, aire airoho duruk fam de o kwenang su fam siag aruhu anggere. Hat Israel de henda hundig on de hum alereg liren, An nakit sombandoho watmin ulug duruk kahen oma!

²Duk funu kwe etma hinil lahap hakiek! Hiren henebe hambena dakoho lauhup fug kwe re kea? Ap Arab on en ili angge leimu wereg hag, haren kwema enenda naukmu duruk ale dul ulug ap nangno duruk kwit welahen. Haren de o kwenang su re babi deheg, holok ale deheg, duruk kwit mundoho emere foruk kahen.

³Ai fam de ik bohol fam en wambik waharuk fug ai, ne osit enggela alit sobalduk li em folo-folo waharuk fug ai. Hat de hambena on nim de alit dindokdoho henggali eleg lahen.

⁴Hat hobam anggin deg ma etano haren An nobam uruk kwit, ‘Hat de an nakni, nebe dotman angge Haren henda hundig napuk kahen’ uruk kahen.

⁵Eke haren uruk kwit, ‘Aren olok nenobam foruk kwit neg welaruhu fug’. Ulug uruk kahen ai a, Israel ao, aireg famen de haren airoho uruk kwit omano foma re holok ale haren duk alereg on omano duruk kahen,” isi ebag.

⁶ Yosia Raja wereg lit melal-enepuk li em TUHAN ele an nobam diroho ebag, “Hwe ahun fam dipdoho wereg fug on, Israel ai en duruk ale etma hat de mundoho hil hauk kahen? At de An lin nealug duk funu fene nim e enggela heikdoho wilibig on apmane nim hambena dil noruk ai.

⁷An den boruk kwit de at mundoho airoho dulug de sombandoho An nakit watmisi ulug wenggel-hauk kahi. Famen at sombandoho wam fug anggere hambena duruk kaikoho lauk. Ai fam de An den at embeserihikdeg muko wilibi feserihik. Yehuda, Israel are ai en ohore mundoho etma il hauk, famen de aren akol atuk fug. Ite at oho hambena duruk kwit,

⁹enggali lohon hauk fug. Aren de helep mel e mel fam apne waukmu re babi duruk fam o kwenang su emere foruk.

¹⁰Etma abirangge airoho duruk katlug Yehuda dipdoho duruk eleg on aire sombandoho An nakit enda amureg liren de yamdalon waharuk. Ulug An TUHAN en nele mundoho ihi” ulug hweag-nitsi ebag.

¹¹Ai en TUHAN en an hweag-nutuk kwit de, Israel on en At enambol yig-utswa famen de, Israel de it Yehuda en dipdoho duruk eleg eta hagdoho deg fug it de mun fanoreg.

¹²TUHAN en wene su ap homi Israel on fam hweag-esa lakin ulug an mon-napuk kwit diroho isi, “Hat Israel dipdoho duruk kahen fug on su, An nakit sombandoho ma! An de nendan enelaheg esauk kwit li anunuroho fahet nolok duruk kahi fug on.

¹³We haren fag-duruk kwit, ‘An nakni TUHAN Allah fam siag deheg, ele sahaloho feheg, dirihik’ ulug fag-duhun ale ai neg. Ne, haren fag-duruk kwit, ‘E enggela heikdoho wilibig on apmane etma an den kembu ilah it enunggul unuk amu on en omano fam nenda hundig duruk kwit dirihik, ne nakni TUHAN ele holoho duruk katihik fug’ ulug fag-din. Aire An TUHAN en nele mundoho ihi” ik lakin ulug mon-napsi.

¹⁴TUHAN ele uruk kwit, “Yaho hit An nomaliki dipdoho duruk kahep fug on etma, An nakit sombandoho manik! Hit de An nonggwareg nangge. An den de ap hiron o kota misig en de ap misig heg, ne enunggul unuk agdoho deg on enemu domog en de ap biren heg, og-eneplug de nikangge Duk Sion fam lahuk.

¹⁵An den de hit henowesi melal-henepuk on fahet An nele holoho neg duruk on og-hesahuk. Iren de enenda wereg fam wenggel-halug neg melal-henepuk kamuhup.

¹⁶Ne, hit lahe o kwenang su fam henebe hum-ham amuhupdeg de hiren Peti Sali Wene wareg yohwareg anyo fahet eke uruk kamuhup fug. Iren de ai fahet eke wenggeleheg, ebet heheg, duruk kamuhup fug, ite iren ai fahet nenenda eheg, ne Peti Sali Wene wareg yohwareg ai amu on eke wuruhup ulug uruk kamuhup fug.

¹⁷Eta li em de o Yerusalem fahet de, ‘Takhta TUHAN’ ulug uruk kamuhup, ne ap di enunggul unuk su enunggul unuk de o kota ai fam An napne wakoho kabog-duluk kamuhup. Iren de it enendama nong-hongdoho wenggelduk on mel enolok ale mel fam duruk on etma muko duruk kamuhup fug.

¹⁸Israel de Yehuda nim seberuhupdeg de it enebe ambine o sabu hetdoho hwik-enebik lahupmu etman utara fil en wamuhup. It de o kwenang An den it enombawi fam it enangge on amag ulug og-esauihik mu etma sombandoho wamuhup,” isi ebag.

¹⁹TUHAN ele uruk kwit, “Israel, An den hat de nonggwareg nomalik ondoho og-habuhuk deg, kwenang hat hambono deg ma, o kwenangma abirangge oman de mun ebema on og-huruk. An nenda boruk kwit de haren An fahet nayon elen, ne an weregman heye lelen fug ulug nenda boruk kahi.

²⁰Famen de hwe eke ahun fam dipdoho wereg fug hag, hat oho An nobam dipdoho welahen fug. Ulug An TUHAN nele mundoho ihi” isi ebag.

²¹Dom anggolopman ap enele lenggu kululung uruk; aire ap homi Israel on siag deheg, it enakni TUHAN Allah anyo enapeleg atswareg let-nenebukwag ulug heng uruk kwit oba yatuk mu.

²²Yaho hit abirangge TUHAN domako embeseruhup on etma, sombandoho manik! Aren hit hiling henebeheg, hit dipdoho duruk kamag ulug henobahakeg duhu. Hiren uruk kwit, “Yu, ketiare At ai nit nenakni Allah deg ma nit TUHAN akit waharuk kahe.

²³Niren anggiluk fam dom anggolop kwe kembu wutuk kahe ale etma re we alemaroho neg! Nit Israel on fam let-nenepuk on aire we nit nenakni TUHAN Allah fam en neg waharuk.

²⁴Baal mun nenggali kwelapuk on ai fam apne wauk katuhuk fam de nit nenomaliki nal aheg, nit nenangge sapi, domba mel o endam en angge nenombawi en hwalduk katfag angge omano eleg aheg, disi.

²⁵Anggere nit duruhuk on ai fahet nenenggali en deheg, enal belesim wareg on aheg duhuk aire fano neg. Aire nit nim nit nenombawi mel en nit nenakni TUHAN Allah anyo fam siag duruk kwit, At awene melaleg omano holoho duruk katuhukmu anggere” uruk kahep. Ebag.