Read Ninia Yali YEREMIA 30 Bible Online

YEREMIA 30 - Ninia Yali bible

YEREMIA 30

¹TUHAN, Allah Israel on enakni en,

²an nobam uruk kwit, “An den hweag-hirihi on etma abirangge buku misig fam baloho fein.

³Li andigim aik waruhu salim fam An den nomaliki Israel on mel Yehuda on mel hwaloho fesehuk anggere. An den it nikangge og-eneplug o kwenang it enombawi fam og-esauihik etma feseik waruhuk. Mu re kwenang ai it nikangge akni atlug welamuhup. Ulug An TUHAN en nele mundoho ihi” isi.

⁴TUHAN en omaliki Israel mel Yehuda mel fam uruk kwit,

⁵“An de ap enowag elek duruk on en nenek duruk ale mundoho holdihik, ap enenda seroho wereg fug on enakol en neg duruk on en uruk ale etma holdihik.

⁶Yaho wenggel-halug meneni eberiek! Ap on en enomalik enderuk alereg behep? Eleg. Aireg halug de nunggwelug ap on etman enorohole hesiloho enahum enenggik en seneko homi enomalik enderukoho duruk hag duruk?

⁷Nukoho fulu-bolan on anyo nukoho debag fug on anyo mundoho aik waha. It An nomaliki en de nukoho aire mundoho enenda fit-aruhu on; famen it enebe An den enahap wendat-enebuhuk,” isi.

⁸TUHAN Mun Along wereg on en At omaliki fam eke hweag-esauk kwit, “Nukoho ai mundoho aik waharuk halug de e beahan henomaloma hwelang deg on aire An den sombo esahuk, ne sabu het henusug on de An den lol-esahuk. Hit de ap bohon enamingming angge atlug welamuhup fug.

⁹Hit de An henakni TUHAN Allah nobahet duruk kwit welamuhup, ne ap misig eke at Daud ambiangma on en de An den raja unduhuk fohuk.

¹⁰ An nomaliki Israel on de henakol duk fug! An namingming angge Yakub on de howag elek duk fug! Hat nim hat hambiangman ondoho on nim de o kwenang yit-yatma hit sabu hetdoho henobahausa ma etman henahap wendat-henebuhuk. Hit nikangge henobam wamuhup deg henakol eleg angge welamuhup. Hiren henakol duk ale eke wereg fug mu henakol elegdoho bok welamuhup.

¹¹An waruhukdeg hit henahap wendat-henebuhuk. Ap enunggul unuk An den hit del-fol hesauihik kwe on etma re An den abirangge elehap debesehuk, famen hit de airoho henebuhuk fug. Demdoho hit oho unggum An den fesehuk on ai fam en lil amuhup fug, An den hit fam unggum og-hesahuk on aire katukdoho neg wereg aleroho henobahakuk. Ulug An TUHAN en nele mundoho ihi” isi.

¹²TUHAN en omaliki fam hweag-esauk kwit: “Hit henaouk de mundoho anggin anggolo deg, hit henayebil fahet de obat wereg fug.

¹³Ap misig en oho eke hit fano amag ulug duruk fug, hiren henambot etma fahet de obat eleg, ma re fano atuk ale fahet ebereg welam fug alereg.

¹⁴Hiren henenda hundig enepuk kahep on omano en hit enapeleg atswa; iren de hit fahet eke wenggel hesa fug alereg. Hit henesiag hum-ham alereg ma, ne hiren kwasikdoho duruhup on de lik-logdoho deg ma re, ap selei on fam hag An den henowarik waharihikdeg unggum haperoho og-hesauihik.

¹⁵Hit de henaouk fam en fano atuk ale eke deg fug anggere, ouk deg lahep on fahet sahal-nga duruk kam fug. Hit henesiag duruk kahep on hum-ham alereg ma, ne hiren kwasikdoho duruhup on de lik-logdoho deg ai fam An den unggum airoho og-hesauihik ai.

¹⁶Famen de ketiare hit bil henesauk katswa on etma bil esahuk, ne hit heneselei on de sabu hetdoho hwik enebik laukmu etma feseik lahup. An den de ap hit enenggik omamne fam sebel-henusug latswa on etma sebeloho fesehuk, ap hit henebe herag henepswa on etma An den herag enebuhuk.

¹⁷It heneselei on en uruk kwit, ‘Sion de hwik-esausa ma re ap en fu deberuk fug’ uruk, famen hit de An den henebe fano hilinggi he-nobahakuk, hit henayebil etma An den obat fam fanoe he-nobahakuk” isi.

¹⁸TUHAN ele eke nim uruk kwit: “Hit An nomaliki re nenda hundig-henebuhuk ne hit henanggwenang henonggwareg en on fam de An den hwale henobahakuk. O Yerusalem nikangge wireheg, ne ap raja wereg ma re nikangge buhun deheg, duhuk.

¹⁹Ap homi etma welamuhup on en de, suni fam An mot-nabeheg, enahayeg en anggiluk deheg, duhup. An den it enalong bolug leho feseruk kamag ulug debesehuk, ne enalitno debeseruk kamuhup fug, it enebe re eke nim dopno il lauk kamuhup.

²⁰Hit henunggul unuk on de endam deg latsi hag unuk bogdeg laruhu, ne An nomaliki ondoho on unduhuk laruhu. It mundoho sebeloho henobaharuk on de An den unggum og-esahuk neg.

²¹Raja hit melal-henepuk karuhu on de hit henunggul unuk on en welaruhu. An den at nakit wamag ulug wol-duruk em de kili-koloroho An horogma aik waharuk karuhu. Ap san eke amu endan wenggele folug ambong seroho An nolohotma aik wam alereg behep? Hit de An nomaliki on amuhupmu An de hit henakni Allah welaruhuk. An TUHAN en neg ihi” isi.

²³TUHAN olok duruk on de ik fu waharukmu mel hol sielu watuk mu mel hag deg ma ap enolok fam duruk on enowatuk, mu re Aren dimin ulug wenggelduk on anyo owan atuk eleg kweleg de bale foruk fug. Fobik en neg de At omaliki mundoho etma fahet fubi debehup.