Read Ninia Yali YEREMIA 31 Bible Online

YEREMIA 31 - Ninia Yali bible

YEREMIA 31

¹TUHAN ele uruk kwit, “Li andigim aik waruhu salim fam An de ap homi Israel on enunggul unuk abirangge fahet enakni Allah aruhukmu, it An nomaliki amuhup.

²Iliangge leimu etman de it waratuk on fam en lil atswa on etma fam An nenda hundig-enepuk kahi ale unug-esahuk. Ap homi Israel on hambuk deg ma kema amuk ulug hera duruk kweleg,

³An nebe yatman it fam enam aruhuk. Yaho ap homi Israel on, An de o endam en angge hit fam nenda hundig henepuk kahimu re, fobik mundoho-mundoho fahet nenda hundig neg henepuk kwit welaruhuk ale anyo unug-hesahuk.

⁴Hit henunggul unuk on de endam deg latuhup hagdoho An den unuk bogdeg debehuk. Hiren de nikangge binggong rebana wahupdeg henahayeg fam yunggulduk kamuhup.

⁵Hiren de heneyabuk o Samaria dom fene wiroho yaho fahat dalug anggen bal-dauk kamuhup neg.

⁶Demdoho, li aik waruhu on fam de ap o kota kahaleg wereg on en Efraim dom fam en hwiruruk kwit, ‘Nit de o Sion TUHAN akit lahauk kohon manik’ uruk kamuhup” isi.

⁷TUHAN ele uruk kwit, “Yaho hit Israel on An nomaliki etma, di ap su ap enunggul unuk en henunggul unuk misik-misig neg angge on ai henahayeg en suni uruk kamek. Hiren suni motdeg suni uruk kwit: ‘TUHAN en de At omaliki ando enoluk wereg on etmano enahap wendat enebeheik ulug fag-diek’

⁸Utara fil en An den it nikangge og-eneplug waruhukdeg it enebe kwenang ambiang-ambiang etman kabog-debesehuk. Ap inil hupnig on mel, ap eneyog siag on mel de it inim wamuhup, ai en homi enomalik ket endag dahup on mel, enomalik enahumu mundoho wirik aruhu on mel oho wamuhup. It enebe re esan humon fam o kwenang su fam wamuhup.

⁹It enebe re oban inilue hipik-hopo laukmu re, An den onggone feseheg, hondoko feseik laheg, duhuk. An den de ik humdoho wereg kwe en hondog-eneplug laheg, kwenang donggo deg kwe it eneyog unggul dungdoho wat-da fug kwe hondog eneplug lahuk. Israel on en de An de enakni hag; Efraim aire an namloho wandeba” isi.

¹⁰TUHAN ele uruk kwit, “Yaho hit di ap su ap henunggul unuk etman holiek! Ik laut foma fil etma An den uruk kahi on ai hweag-esakiek: An nomaliki An den del-fol esauihik on omano re, An den kabogdoho feseik waruhuk deg ap en domba hwalduk wereg hag, An den hwal-enepuk welaruhuk.

¹¹Ap homi Israel on de ap enunggul unuk mundoho enomamne on fam en enahap wendat-enepihikdeg fiselaroho feserihik.

¹²It de Duk Sion fam waharuk kwit, An den gandum mel ahalue mel, anggur mel, sapi, domba mel, og-esahuk on etma fahet enorohole healoho waharuk kwit suni enahayeg fam il waharuk kamuhup. It de yabukmu ik higitdoho wereg ma hagdoho deg lit iren di angge su angge mundoho wereg ma neg welamuhup.

¹³Nukoho ai salim de hwelani duhum de enenda enahayeg fam yunggulduk kamuhup, Ap sobal on mel sauwe on mel de, An den enenda onggone fesehukmu re enambono hauk kamuhup. Fong watuk on etma ahamdoho enahayeg on debehuk, enenda hesiloho wereg on etma re enenda healoho wereg on debehuk.

¹⁴Ap imam de An den nauk angge fam sigdoho homo debeseruk karuhuk; ne it An nomaliki en anggoloreg angge etma An den og-esauk karuhuk neg. Ulug An TUHAN en ihi” isi.

¹⁵ TUHAN ele uruk kwit, “O Rama en de oba yiyi-yeye uruk on mel, enenda hesilduk kwit anggolo-fanggolo duruk on holduk kahi. At hwe Rahel omaliki mundoho eleg ahesama, oba yatuk mu re bale foukwag ulug onggonuk fug alereg.

¹⁶Hat oba yatuk kahen on etma bale feheg, hilue somareheg din! Haren homaliki fahet airoho duruk kahen on etma re we alemaroho fug. Hat fahet ambiangma onggo welaruhu, hat homaliki o it eneselei on enanggwenangman wamuhup.

¹⁷Hat homaliki re enobam indipmu wamuhup, mu re hat de fobik fahet henda ebereg welaruhun on wereg.

¹⁸An nesanggo holduk men de ap homi Israel on de enenda hesiloho, enele uruk kwit de, ‘TUHAN nenakni, nit de wam maro owan il watuk eleg on hag deg lahe, famen de nit fu debelug dukwag ulug Haren mamul-nenepihin, ne ketia re nit sombandoho Hat hakit wamukoho duruk kahe, nenakni. Anggere, TUHAN Allah nenakni, Haren nit sombandoho og-neneplug lakin.

¹⁹Hat de niren nenambol yig-hutuhuk, famen niren duruhuk ale ai fahet nenenda wat-dauk kahe. Haren nit unggum og-nesauihin mu re nit nenenda hesilduk en de nenunggul wamboroho welahe. Nit nenebe sauwe deg li en siag duruhukmu re, nit nenenggaliroho sebeleg on atuk kahe, nenakni’ urukmu holdihik.

²⁰Israel ao, hat hebe re omalik An nenda husug lahi on, nenda anggenman deg ma nenda hundig husug lahi on. An den hat betdoho mum healug de, Nenda fu nim hat ebet heauk kahi. Hat de An den mun nenda healug fanoroho hobahakuk.

²¹Kobokwe eneg ale debeil lalug de e sombol heheg feiyug kwe hat endam lauihin kwe anyo hera diyug. Yaho Israel on hobam ma! hobam kota indipmu keram on fam omano ma.

²²Yaho hit henunggul unuk An fam dipdoho duruk kahep fug on su, hit henenda biren-baren uruk kwit weregman neg de ke huli welamuhup? An den de o kwenangma suma mun keron eke wal-deberihik, mundoho atuk fug ale on, aire homi en ap enalong baloho fahat enusug on ai” ulug isi.

²³TUHAN Mun Along wereg on, Allah Israel on enakni anyo en ele uruk kwit, “An den nomaliki etma atam welatswa hagdoho enunuk bog debehukmu halug de, o Yehuda fam mel ne o desa maseroho wereg kwe etman mel ap en uruk kwit, ‘TUHAN en duk amu eneg on[19] o Yerusalem fam At ebe weregman mun amu eneg on fam ai fanoap deberuk kamag’ urukmu holuhup.

²⁴Ap homi re o Yehuda fam mel, desa-desa etma fene mel welamuhup. Etma re ap yabuk wutuk on mel ne wam domba, sapi endetuk on mel welamuhup.

²⁵It enobam si-sareg on de An den enobam heale feseruk karuhuk, ne siburu obok en lilipna deg on de An den homo-debeseruk karuhuk.

²⁶Eta li em ap homi en uruk kwit, ‘An noho homogdoho nohokireg nobam healeheik’ uruk kamuhup.

²⁷An TUHAN en uruk kahi anggere, li aik waruhu on fam de Israel on mel Yehuda on mel enanggwenang fam etma An den ap homi en mel di wam su wam en mel hopo dik debehuk.

²⁸An den endam it hwal-enepuk katihikdeg fobik en it heneko feseheg, meiyale feheg, luluhun eseheg, dirihik hagdoho An den it enomamne debeseheg, wiri feseheg, duhukdeg hwal-enepuk kwit welaruhuk.

²⁹ Eta li em de ap homi en uruk kwit, ‘Ap enaknisi en anggen ale on nausa ma enomaliki enaeg lil duruk’ uruk kamuhup fug.

³⁰Ite ap sa en anggen ale on nauk halug de at onggwareg amu aeg lil duruk karuhu. Ap homi enebe domog en enesiag duruk fam waramuhup” isi.

³¹ TUHAN ele uruk kwit, “Li andigim aik waruhu salim An den ap homi Israel on mel Yehuda on mel inim sali keron waruhuk.

³²Famen Sali An den it inim waruhuk on aire An den it enombawi nim o Mesir en og-eneplug wilibik waharuk kwit watihik on ai hag de fug. Iren An fahet de homi enahunsi hagdoho deg latihik, famen An ninim sali watuhuk on anyo iren dahandoho duruk katswa.

³³ An den nomaliki Israel on nim sali keron waruhuk on aire ebe su: An Nawene melaleg anyo it enenda anggenman feheg, enendama lisu bale feheg, duhuk. An nebe re it enakni Allah aruhukmu it de An nomaliki amuhup.

³⁴ Ap homi iron eke en eke fam TUHAN enoluk amag ulug hweag-esauk kamuhup fug. Aire it enebe doron et, lohon et, An enoluk aruhu mu anggere. Iren kwasikdoho duruk katswa on etma An den napelehapdoho embesehuk, it enesiag duruk katswa on de An den elehap duhuk. Ulug An TUHAN en nele mundoho ihi” isi.

³⁵Mo re TUHAN en nukoho ombagbag duruk kamag ulug fouk debesi; bigalem nim sohwalanggen nim de o hup anggo fahet fesi. Laut misigmu hahambik esaukmu re ik ahum funag-lenggag angge duruk on, unuk de TUHAN Mun Along wereg on ai.

³⁶TUHAN en sali uruk kwit, “Bohol kwe en kwenang kwe atuk ale etma aham duruk eleg kweleg de, Israel oho re ununggul unuk soaloho welamuhup.

³⁷Nukoho eke salim bohol ilit duk men, ne kwenang oboule doaleg on ai indip bilingguk men de, An den nukoho ai salim de Israel on enolok ale duruk on ulug domako embesehuk. Ulug An TUHAN en nele mundoho ihi” isi.

³⁸TUHAN ele uruk kwit, “Li aik waruhu salim Yerusalem de o kota An nobamdoho nikangge abirangge wuruhup, aire helep fam yatdoho wiroho lahabeg angge menara unuk Hananeel fam en de Sokole unuk Pintu Gerbang Sudut huli etma wuruhup.

³⁹Etan huli-huli re Duk Garep fil lahareg etman de yinggoho re o Goa fam etma.

⁴⁰Donggo ai abirangge fam ap homi sal-enepukmu ulug wereg ma etma mel, alalangge hwik durukmu etman de Ik Kidron ikman yabuk wirig on mundoho etma fene en de sokole unuk Pintu Gerbang Kuda il timur fil etma re An nobahet eneko fohup. Kota Yerusalem aire moluluk eseheg, luluhun eseheg, eke duhup fug” isi.