Read Ninia Yali YEREMIA 33 Bible Online

YEREMIA 33 - Ninia Yali bible

YEREMIA 33

¹An nebe hetdoho o ambe lilimol fam etmano wereg kweleg TUHAN

²kwenang wal-debagdeg ahut ilitdoho obale fam febag on anyo en wene amu on eke hweag-nitsi. Aren uruk kwit,

³“An hwi-napuk halug An den nele onggo uruk karuhuk; An den de wene mun ebe ale on, yande fouk duruk on mun hapeleg on hweag-huruhuk.

⁴O raja Yehuda on ebe weregma mel o Yerusalem fam wirig on mel de ap selei on en bin kwik waharuk ale anyo omamneroho ulug de mundoho moluluk dusa. Famen An TUHAN, Allah Israel on enakni en uruk kwit,

⁵we alemaroho neg ap Babel on nim weim yapul ulug duruk, iren airoho duruk on aire An nahumu nolok ahe en it fam foruk kwit enowaruhukmu kota su ap wareg en neg ahum buag uhu ale fahet uruk. Ap homi en de mun enolok ale neg durukmu re Anden kota su kumu enusug lit welam ale nerim napuk.

⁶Famen de fobik en de An den kota su nim ap homi wereg on nim enebe hwale fesehuk, mu re it enebe nikangge enomamne amuhup. An den de it fam enenda seroho welaheg, enakol eleg angge welaheg, dukwag ulug hum-hamdoho og-esahuk.

⁷Yehuda nim Israel nim de atam deg latswa hagdoho it enunuk bogdeg laruhu, ne it de An nomaliki on doho unduhuk lamuhup.

⁸An den de iren siag An nil hanim duruk katswa on etma horoho embesehuk; it enesiag mel enobabut siag nim etma An den napeleg-apdoho fesehuk.

⁹Yerusalem de An nahayeg deheg, nawonog aheg, duruk on aruhu. Di ap su ap enunggul unuk kwenang wereg on en de, An den mun fano ale ap homi Yerusalem fam debeseruk karuhuk ale mel, ne kota ai fam di on su on sigdoho welamag ulug og-esauk ale mel hol halug de it enakol en enoag elek deheg, An leho nobahakeg, duruk kamuhup.”

¹⁰TUHAN ele uruk kwit, “O suma re iliangge leimu hag deg, ap oho amu anggen oluk wereg angge oho wereg fug uruk. Iren uruk ale aire demdoho uruk, aire o Yehuda fam kota omano mel o Yerusalem fam kobokwe omano fene mel, de mun dereng deg, ap oho oluk-oluk angge oho re etma eke wereg fug mu.

¹¹ Famen o etma fene re enele enaheyeg on uruk on mel, enambono en uruk on mel, hweap lombo enepuk kwit enele uruk on mel holduk kamuhup. Ne ap homi en An nakit An dang-napuk kwit ulug enangge folug walug lauk kwit suni uruk on oho enesanggo holuhup. Iren uruk kwit, ‘TUHAN Mun Along wereg on ai dang diek, At de fano deg lit enda hundig fam dipdoho neg duruk on aire mundoho-mundoho welaruhu’ uruk kamuhup. O kwenang su re An den atam deg latsi hagdoho sigdoho debehuk. Ulug An TUHAN en nele mundoho ihi” isi.

¹²TUHAN Mun Along wereg on en uruk kwit, “O kwenang su nim kota nim de iliangge lei hag deg lit ap homi oho enoluk wereg angge oho eke wereg fug. Airoho deg famen de fobik etma re enggelangge lei ap homi en domba hwal-enepuk kamuhupmu welaruhu.

¹³O kota fene mel, dom kwe mel, dom indip kwe mel, o Yehuda il selatan fil mel, wilayah Benyamin en on fam mel, desa-desa o Yerusalem maseroho wereg on mel, o Yehuda fam kota wereg on mel, de it ap domba hwalduk on en enan domba wenag-enepuk kamuhup. Ulug An TUHAN en nele mundoho ihi” isi.

¹⁴ TUHAN ele uruk kwit, “Li andigim aik waruhu on fam de An den ap homi Israel on mel Yehuda on mel nim sali watihik on anyo higitdoho debehuk.

¹⁵Eta liem de ap misig eke katukdoho neg duruk on hun Daud ambiangma on de raja welamag ulug unduhuk fohuk. Raja ai en de o kwenang abirangge fam etma katukdoho duruk on deheg, demdoho on neg deheg, duruk karuhu.

¹⁶Ap Yehuda on mel o Yerusalem wereg on mel enahap wendat- enebuhumu re it enenda hambukdoho welamuhup. Kota Yerusalem aire unuk de, ‘TUHAN nit nenahap wendatuk on’ uruk kamuhup.

¹⁷ An TUHAN en nele sali watuk kahi anggere, ap Daud ambiangman ondoho on en neg ap homi Israel on enobahet raja inatuk kwit neg welamuhup;

¹⁸ Ne it enunggul unuk Lewi on en de imam wereg lit An nobahet deheg, wam waroho feheg, gandum mel, di angge su angge yaloho og-nutuk on mel deheg, duruk kamuhup” isi.

¹⁹TUHAN ele an nobam uruk kwit,

²⁰“An den de nukoho nim hup nim fam sali watuk kwit, li higitdoho neg waharuk kamag ulug sali watihik; ne sali watihik on aire elegap debouk fug ale deg.

²¹Ai hagdoho re An den namingming angge Daud nim sali watuk kwit de, at ambiangma on en de hundig-hundig raja welamuhup irihik; ne Anden Imam Lewi enap nim sali watuk kwit de, iren hundig-hundig An nobahet duruk kamuhup irihik. Mu re sali airoho watihik on etma re eleg-ap debouk fug ale deg.

²²An den de namingming angge Daud ambiangma on nim, imam enunggul unuk Lewi on nim de enebe iren ondohoma on eke nim dopno deberukmu re, it enebe deg ale re iliangge ik laut elan kwe mel, sohwalanggen bohol fam wereg ale mel hag degma mun wenahauk fug aleroho deg laruhu” isi.

²³TUHAN ele an nobam uruk kwit,

²⁴“Ap en it Israel on mel Yehuda on mel fahet uruk ale etma haren fu deberuk kahen a? Iren uruk kwit, An den it enunggul unuk biren momal-enepihik on eta re hwik-esasi uruk. Airoho uruk kwit atlug de An nomaliki maben hag boruk kwit kumu esauk, ne it su re enunggul unuk misig wereg de boruk fug.

²⁵Famen de An TUHAN en nukoho nim hup nim fam sali wareheg, ne bohol inim kwenang inim en duruk ale fahet wene melaloho feheg, dirihik hagdoho,

²⁶An den de sali at Yakub ambiangma on mel ne namingming angge Daud ambiangma on mel watihik on aire seneg lit neg welaruhuk. Hun Daud en ondoho on ambiangma on misig eke en de Abraham, Ishak, Yakub enambiangma on melal-enepuk kamag ulug Anden momaloho fohuk. An den de nomaliki fam nenda enebeheg, it enebe fam sigdoho welamag ulug debeseheg, duhuk” isi.